Presion di Union Europeo riba Luxemburgo a expone internacionalmente con biyonario Hushang Ansary… A usa fondonan di ENNIA Caribe pa sostene politiconan Republicano na Merca

Banco Central di Corsou y St. Maarten a logra recupera 290 miyon dollar for di e ex-accionista mayor di ENNIA, Hushang Ansary. Pero, un investigacion cu Miami Herald a haci a ilustra con fondonan di ENNIA a bay pa paga avionnan priva y tambe donacion na institucionnan politico Mericano y fundacionnan educativo di lidernan Mericano cu tin nombernan hopi conoci.

Entre otro George Bush, ex-presidente Mericano y James Baker, cu ta ex Minister pa Asuntonan Exterior di Merca. Un total di 6.5 miyon dollar di ENNIA a bay pa e U.S Peace Institute, un think tank crea pa Congreso Mericano na Washington; a paga conseheronan di Ansary pa servicionan cu no tabata relata na ENNIA y tabatin un gasto di salario di 6 miyon dollar pa ENNIA, cu a bay pa personal cu no a traha cu e compania, pero tabata den servicio di Ansary y su otro companianan. Tambe a usa 2.5 miyon dollar di ENNIA pa biahe y hotel y 15 miyon dollar pa dos avion priva cu Ansary a usa. Ningun tabata pa ENNIA.

Miami Herald a haci un trabou investigativo pa ilustra con biyonarionan a haya manera pa sconde nan placa na Luxemburgo y a topa cu e caso di e amigo di pilarnan den e partido Republicano di Merca.

Registro Luxemburgo

Hushang Ansary tabata un di e personanan cera cu e ultimo Shah di Iran, pero despues di e caida di e Shah, a bay Merca, a cuminza cu un negoshi di petroleo y a bira un contribuidor grandi pa e partido Republicano. E tabata cerca di famia Bush, como contribuidor financiero. Mientras cu e tabata move den e circulonan halto di poder Mericano, Ansary tabata move placa pa asina yama tax havens y otro offshore pa sconde biyones, di forma cu ningun regulado por tin bista riba kico tin.

Ansary, cu awor tin 95, ta riba lista di 71 biyonario cu lasonan na Luxemburgo, cu ta duna beneficionan di belasting y ta priminti secresia. Pero, Union Europeo ta presionando Luxemburgo pa publica informacion corporativo. Miami Herald, cu su compania madre, McClatchy a cera un cooperacion cu 17 otro media renombra, manera Le Monde di Francia, Süddeutsche Zeitung di Alemania, como tambe e Anti-Corruption Data Collective pa analisa e registro cu ta contene mas di 140 mil compania activo, como parti di un proyecto cu a cuminza publica e luna aki, yama OpenLux.

Asina a logra tira bisa riba e registro, ainda priva, di doñonan beneficiario di companianan registra na Luxemburgo, manera e atleta Magic Johnson, generalnan Cubano, pero tambe Ansary, cu a capta atencion pa motibo cu ainda tin e caso civil na Corsou relaciona cu ENNIA Caribe.

Den e caso civil, ENNIA, cu awor ta bou control di Banco Central di Corsou y St. Maarten, ta acusa Ansary di a cumpra e compania na 2006 pa us’e como su banco personal, unda tabata saca fondonan di ENNIA pa manda na Luxemburgo. E accionnan aki a trece den peliger e obligacion di ENNIA pa cumpli cu su responsabilidad na su clientenan, cu tin seguro cu e compania. E caso civil ta acusa Ansary a usa fondo di ENNIA, cu ta procedente di e primanan, pa haci donacion na George Bush y James Baker. E otronan cu Banco Central di Corsou y St. Maarten ta nombra den e caso civil ta yiu muhe di Ansary, esta Nina Ansary, y tres asociado, cu ta Abdallah Andraous, Ralph Palm y Gijsbert van Doorn. Ansary a bisa di no por papia di e caso, pero a nenga e acusacionnan y a bisa cu e compania tabata bay bon ora cu Banco Central a tuma cargo. ENNIA tambe a nenga di duna comentario.

Placa di ENNIA a move di un hurisdiccion pa otro

Aunke cu legalmente no tin nada robes pa manda placa pa Luxemburgo, e lista ta crea inkietud. Pa loke ta Ansary, el a usa 90 miyon dollar di ENNIA y 5 miyon dollar di un otro compania, pa cumpra e compania petrolero na Houston, Stewart & Stevenson. E ganashi di e inversion aki a bay incorrectamente pa e Irani y su yiu muhe Nina, cu tabata un director na ENNIA.

Ta acusa Ansary y su asociadonan di a devalua e balor cu ENNIA y Banco Di Caribe tabatin den e compania petrolero, y a saca e fondonan pa hinca den otro dos otro compania holding cu no tabata suheto pa supervisornan na Corsou. ENNIA a saca tur su interesnan den Stewart & Stevenson na 2012, prome pa un compania na Cyprus y despues pa Luxemburgo, EC Investments, cu e aña ey a raporta un activa di 279 miyon dollar. E ultimo cuenta anual ta indica cu e balor aumenta na 303 miyon dollar na 2019. Den e mesun periodo a mustra cu a haci prestamonan na e compania petroleo y na e compania principal di Ansary, Parman Capital Group.

E ta yamativo pa controladonan, ora cu ta move fondonan of activa di un hurisdiccion pa otro, den e caso aki, e fondonan di ENNIA a bay di Corsou, pa Houston (inversion), Cyprus y despues pa Luxemburgo. Profesor di Ley specialisa den labamento di Placa, William Byrne di Texas A&M University a bisa cu no tin motibo comercial pa move placa di e forma aki.

Segun e keho contra Ansary na Corsou, e ex doño di ENNIA, pa medio di su compania Parman, a saca tur e beneficionan di e inversionnan cu ENNIA a haci. Es mas ta ENNIA a contribui mas capital. Ora cu a bende Stewardt & Stevenson na 2017, ENNIA a ricibi 286 miyon dollar y Ansary y su otro entidadnan a ricibi 458.5 miyon dollar. Tur mientras cu accountantnan interno y externo tabata expresa preocupacion cu e solvabilidad di e compania di seguro.

Asina mes Ansary tabata usa avionnan priva paga pa ENNIA, pa uso personal y pa hiba placa di ENNIA pa institucionnan politico Mericano.

St. Maarten

Ansary a priminti di lo haci un inyeccion financiero den ENNIA na 2006, ora cu el a cumpra e compania. El a haci esaki door di contribui accionnan na balor di 300 miyon dollar di un hotel resort SunResorts Inc. di cua e tabata indirectamente e accionista mayor. Henry Kissinger, ex Secretario di Estado pa Richard Nixon tabata un di e directornan di SunResorts Inc., cu tabatin casi 68 hectarnan di tereno na Mullet Bay, St. Maarten. E propiedad ta inclui un golf resort, un hotel y timeshares. Pero, e area a keda destrui na 1995 pa Horcan Luis y no a haci nada pa restaura e propiedad desde e tempo ey.

Pues, e accionnan di Mullet Bay tabata diripiente mas cu mita di e total di accionnan di ENNIA. Pero, e balor tabata infla pa Ansary, kende a hisa e prijs di 55 miyon na 2002 pa 400 miyon dollar na 2014. E compania internacional Cushman & Wakefield, riba peticion di Banco Central di Corsou y St. Maarten, na 2018 a balora e tereno na Mullet Bay na 50 miyon dollar. Locual a descubri tambe ta cu Ansary, na 2006, a usa 35 miyon dollar di ENNIA pa paga e doñonan di e apartamentonan na Mullet Bay, despues di disputanan cu SunResorts Inc. a base di e dañonan haci pa Luis. Tambe a usa metodonan artificial pa hisa e balornan financiero di ENNIA, pa e compania Parman International di Ansary, saca 120 miyon dollar pa parti entre socionan.

Alarma

E situacion financiero di ENNIA a pone cu Banco Central di Corsou y St. Maarten a dicidi pa cuminza monitoria na 2016, y locual a mustra ta cu Ansary tabata mas interesa pa saca mas placa posibel cu percura cu e clientenan tin nan seguro garantisa. Pero ta ora cu Ansary a saca 100 miyon dollar di ENNIA na 2018, pa transferi esaki pa Parman International, sigui pa otro 150 miyon dollar, cu e institucion di Corsou y St. Maarten a dicidi pa tuma cargo. E revoca e licencia di ENNIA y Banco Central a tuma encargo. E Corte di Bancarota di Southern District of New York, SDNY, a yuda Banco Central di Corsou y St. Maarten cu a permiti logra recupera e 240 miyon dollar inicialmente na 2019, a pesar di intentonan di Ansary pa stroba esaki. Finalmente, el a saca e otro 50 miyon dollar, no for di Parman International, sino cuentanan priva, cu tambe a bay pa ENNIA. Segun Miami Herald, esaki ta djis otro indicacion con e biyonario ta mescla su interesnan personal cu interes corporativo.

Mester bisa cu Hushang Ansary y su socionan tambe a contribui na e campaña politico di Donald J Trump.

Potret: The Daily Herald.