Presupuesto a conoce 5 cambio for di 13 recomendacion di CFT: ‘Eigen bijdrage’ pa alivia gasto di AZV ta un punto pendiente

Minister di Finanzas y Asunto Economico, Xiomara Maduro ta premira cu pa fin di februari of comienso di maart venidero, ley di presupuesto lo drenta den Parlamento pa wordo trata.

Esaki despues di atende cu e 13 recomendacionnan di e organo di supervision financiero CFT a haci y aworaki tambe wardando riba e consehonan di Raad van Advies (RvA) pa haci e cambionan cu ta necesario pa finalmente presupuesto 2021 por desemboca den nos organo legislativo pa su tratamento y aprobacion. E concepto di presupuesto aki ta registra un entrada di 1038 miyon florin y un gasto di 1916 florin. Kiermen un dificil financiero di 878 miyon florin. Mientras cu e necesidad financiero ta wordo calcula rond di 1138 miyon florin.

Recomendacion

E mandatario a bisa cu gobierno a haci cambio riba cinco di e 13 recomendacionnan di CFT. E ocho puntonan pendiente di cambio ainda di CFT su recomendacion, sea cu e cambionan aki ta sigui cu un nota di cambio ora e presupuesto ta wordo trata den Parlamento. Of nan lo bini ora cu lo cambia e presupuesto mes, segun e mandatario.

Un recomendacion sigur cu gobierno no por cumpli cu ne ta e fecha di 1 di februari cu CFT a recomenda pa presenta e presupuesto na Parlamento di Aruba. El a bisa cu e deadline aki ta ‘irealistico’ pa motibo di e mesun tardansa cu a tuma luga despues cu e presupuesto tabata cla na fin di aña.

Dia 18 di januari CFT a manda su recomendacion y dia 1 di februari Gobierno a reacciona riba dje, caminda CFT a haci e cambionan necesario y mand’e pa RvA. Den e organo ay e concepto di ley di presupuesto ta tarda cuater siman pa asina manda su conseho pa gobierno cu ta loke e organo ehecutivo ta wardando aworaki.

‘Eigen bijdrage’ y AZV

Bon Dia Aruba a puntra e mandatario si riba e recomendacionnan ainda pendiente di CFT ta inclui un ‘eigen bijdrage’ pa esnan cu ta haci uso di servicio medico pa yuda alivia AZV su gastonan.

Segun minister Maduro, gobierno a contesta CFT riba e ‘preocupacion’ aki. Kiermen e ta un punto pendiente cu nan lo mester discuti riba dje.

E matutino aki a trece dilanti cu e reduccion di 60 miyon florin riba presupuesto di AZV cu CFT a yega di recomenda pa gobierno, y cu a bira un instruccion di Hulanda, ta nifica alrededor di un 12% di nan gasto total. Mientras cu di otro banda tin e gasto di personal di gobierno cu ta e peso mas grandi riba presupuesto di gobierno. Pero alrededor di un 10% so a wordo reduci di e gasto aki. Mientras e cortamento pa cuido ta mas grandi. Segun e mandatario nan a yega di hiba e discusion aki meymey di e crisis.

Gobierno nan punto di salida tabata cu no ta husto cu den un pandemia cu ta suta full mundo, Aruba mester corta 5 miyon riba tereno di salubridad den e momento ey. El a bisa cu hasta CFT a laba man bisando cu nan no a recomenda e cortamento aki. Pero di otro banda, conseho di minister di Reino a tuma e decision pa corta e suma ey, ya cu CFT a recomenda esey. Te hasta e sector di salubridad a vocifera nan malcontento, ya cu meymey di un pandemia bo no ta spera cu lo bin un cortamento di 5 miyon florin pa luna. Mientras cu e situacion di Covid ta demanda cu mester bin cuido cu ta nifica mas gasto.

Pero a pesar di e discusion aki mester tene na cuenta cu e placa ta bin di Hulanda y ta nan esun cu ta pone e condicionnan. E ta remarca cu ora e presupuesto 2021 a bay pa CFT ainda e landspakket su agenda no tabata cla. E ta puntonan cu tin den e landspakket tambe, caminda recientemente e sector di cuido medico a bini hunto pa busca alternativanan pa atende e cortamento aki.

“Akinan tin movecionnan cu nos tin cu tene cuenta cu ne,” el a bisa. Gobierno a informa CFT riba e movecion aki. Tambe tin e landspakket, unda cu mester tin cuenta cu e gastonan den e sector aki. Tambe na nivel di gobernacion, nan a pidi e expertonan di autoridadnan di salubridad na Hulanda pa nan wordo inclui den e proceso aki. E ta spera cu di parti di Hulanda por bini un comprondemento riba e suma di 60 miyon pa aña, pasobra el a haci un daño grandi.

Den sintesis e ta haya cu tin un conseho di CFT, pero aworaki gobierno no por sigui e conseho ey. Kiermen e conseho di CFT riba ‘eigen bijdrage’ pa esnan cu ta haci uso di servicio medico ta pendiente debi na cierto desaroyo cu ta tumando luga riba e tereno aki.

Mas cambio

Un punto cu a wordo cambia a base di e recomendacionnan di CFT ta e suma di 89 miyon pa SVb cu gobierno a pone prome den presupuesto. Pero den su recomendacion, CFT a pidi pa baha e cifra aki y laga SVB usa su reservanan. Pues e cifra di 89 miyon a bira 12 miyon, e resto cu SVB mester us’e for di su reservanan.

Otro punto controversial cu a wordo cambia ta e cortamento di 12.6% pa financia e fondo di solidaridad di FASE for di sector publico, semi-publico, empresa estatal, fundacion, etc… CFT a pidi gobierno pa hinca e suma aki den presupuesto y nan a tene na cuenta e conseho aki. Kiermen e ta wordo corta henter e aña aki, manera a wordo bisa ‘ter beschikking,’ segun e mandatario.

Tratamento

Encuanto e tratamento di presupuesto 2021 cu eventualmente lo tuma luga proximamente, Bon Dia Aruba a confronta e mandatario si ta bal la pena hinca tanto ora den dje, mientras cu instruccion ta bin di Hulanda a base di e acuerdo cu a keda firma. Ki balor por tin un mocion y/of un amienda, mientras cu aprobacion di presupuesto lo keda un cuestion gewoon di formalidad?

Minister Maduro a contesta cu sigur reino Hulandes ta conoci rond mundo como un di esunnan cu ta duna balor na nan institutonan. E hecho cu nos ta un pais den Reino cu tin su mesun Parlamento, ‘e mester por tin su balor. Te hasta den momento di necesidad den Reino, prestando placa for di Hulanda,’ el a expresa.

Den e caso aki e ta kere cu un amienda of mocion presenta pa Parlamento mester tin su balor. “E institutonan tin cu keda cu nan balor di e trabao cu nan ta haci. Aunke cu nos ta den un situacion di necesidad di cual nos ta prestando placa for di Hulanda,” el a bisa.

Den tur e debate cu e firma di e acuerdo entre Aruba y Hulanda a trece cune pa sigui ricibi prestamo financiero na cero interes –segun minister Maduro – no mester pensa cu Parlamento di Aruba a perde su balor of rol den nos structura estatal y democracia.

Minister Maduro a bisa cu den Reino nos ta bay tin oido di tur dos banda. Aunke e presupuesto tin e condicionnan pa cumpli cu e landspakket, pero e deseo y cambionan cu ta wordo destila y treci for di Parlamento, tambe ta wordo inclui den e tratamento aki. Sino nos ta kibrando institutonan cu den Reino tin hopi balor.