Dr. Kelvin Cayama, kende ta dokter di cas, su nomber lo keda graba den historia di Aruba como e prome ciudadano di nos pais cu a haya e vacuna BNT162b2 contra e COVID-19 of SARS-CoV-2 di Pfizer-BioNTech. E acontecimento aki a tuma luga banda di 3or atardi den Centro Don Bosco na Noord.

E vacuna a wordo transporta debidamente bao tur medida di siguridad y proteccion. Unabes cu nan a yega cu ne na Centro Don Bosco, Dr. Jan Hubert a tuma nan over, ya cu e tin basta experiencia riba maneho di vacuna na Aruba. Pa añas Dr. Hubert ta encarga cu e campaña di vacunacion escolar di JGZ.

Un rato despues Ronchi de Cuba a bira e dos ciudadano cu a ricibi e vacuna. E prome lote di 11.700 vacuna contra Covid-19 di e compania farmaceutico Mericano Pfizer cu a yega Aruba diamars atardi. Nan a bin abordo di e coloso di KLM for di aeropuerto Schiphol di Amsterdam na Hulanda.

Un grupo di persona entre nan minister di Salubridad, Dangui Oduber, personal di DVG y miembronan di prensa tabata testigo na momento historico cu Dr. Cayama a haya pick den su musculo parti superior di su brasa robes for di man di enfermera Destiny Isabela. E prome dosis aki tabatin 0.3 mL di BNT162b2 cu ta e nomber cientifico di e asina conoci vacuna Pfizer-BioNTech. Esaki ta nomber di e compania farmaceutico Mericano cu a fabrica e vacuna.

Dr. Cayama a declara na Bon Dia Aruba cu e ta aprecia di a cay den e prome grupo di hende cu a haya e vacuna. Ademas cu e ta dokter, e ta cay tambe den e grupo di 60plus. P’esey e ta haya cu esaki ta un bon motibo pa kico e mester tum’e, ya cu e ta cay den e grupo vulnerabel. Dr. Cayama su mensahe pa pueblo di Aruba ta: “Tuma e vacuna!. Proteha bo mes, proteha bo sernan keri y esnan cu ta rond di bo y evita escalacion di Coronavirus.”

Mas tarda aki 21 dia, Dr. Cayama y tur esunnan cu a ricibi e prome vacuna, mester ricibi e di dos dosis pa asina sigura un efectividad di un 95% di prevencion contra e malesa di Covid.

E vacuna aki ta bira un speransa pa nos poblacion, mirando e casonan registra di mas cu 7513 positivo for di dia 13 di maart 2020, ora cu Covid a bati nos porta cu dos caso importa. E cifra lamentabel di morto ta yega 69 victima di Covid-69 caba.

Distribucion

Dr. Cayama a forma parti di e grupo di 12 persona conoci den comunidad cu a ricibi e prome dosis di e vacuna. Nan ta cay den asina yama grupo di riesgo, nan ta: Dr. Kelvin Cayama, Ruben Garcia, Jacky Wernet, Jossy Lacle, Siomara Everon, Dr. Joaquin van Trigt, Dr. Dhyani Giel, Ronchi de Cuba, Pastoor Toti Fuentebella, Olindo Koolman, Emira Rodriguez-Tromp, Jourraine Halabi-Figaroa.

E prome grupo di e linea di distribucion di e vacuna aki ta consisti di e personal di cuido, entre otro empleadonan di Hospital Dr Horacio Oduber, IMSAN, DVG, dokternan di cas, specialista-, enfermeronan, personal di casnan di cuido, dentista, fisioterapista y demas trahadonan den cuido.

 

Segun programacion entrante dialuna lo cuminsa vacuna e comunidad di 60plus. Den e grupo aki ta cay e adultonan di edad avansa cu ta den casnan di cuido. Nan lo haya bishita di un ekipo special cu lo bay vacuna na e casnan di cuido, pashentnan drumi riba cama (bedlegerig).

Pa atende e grupo aki e prome dos localidadnan cu lo habri pa cuminsa cu e vacunacion ta Centro Deportivo Libertador Betico Croes na Santa Cruz y Teresita Center na San Nicolas. E localidad na Santa Cruz a wordo diseña specialmente pa por brinda servicio special na adultonan mayor.

Vacuna

 

BNT162b2 ta un vacuna: ARNm. E vacunanan di ARNm ta un tipo nobo di vacunanan cu ta protege contra enfermedad infeccioso. Pa lanta e reaccion immuun, e sistema di traha di hopi vacuna ta consisti di inyecta e germ inactivo den nos organismo of curpa. Esaki no ta e caso di e vacunanan di ARNm.

Cu palabra simpel esaki kiermen e vacuna aki ta traha pa un ARN mensahero modifica (modRNA) formula cu na ‘nano particulanan’ lipidiconan (ARNm)cu ta codifica e glicoproteina “spike” (S). E proteina aki ta esencial pa e virus ta adheri na e cel humano y infecta nan.

Pa medio di e vacunacion aki, e celnan di huesped ta capta e ARNm. Nan ta genera e proteina y despues nan ta presente na e sistema inmunologico. Esaki ta trece cune cu e huesped por desaroya un reaccion immuun contra e proteina Spike cu ta yuda pa protege contra e infeccion causa dor di SARS-CoV-2