Un cantidad di 11.700 vacuna contra Covid-19 di e compania farmaceutico Mericano Pfizer a yega Aruba ayera despues di 6or di atardi, den un vuelo di aerolinea KLM cu a bin for di aeropuerto Schiphol di Amsterdam na Hulanda.

E vuelo cu a sali casi 11or di mainta ora di Aruba a wordo coordina door di secretario di estado di Salubridad Publico, Bienestar y Deporte, sr. Paul Blokhuis conhuntamente cu president director di KLM, pa presencia con a pone e vacunanan riba e avion cla pa wordo transporta pa Aruba.

Den un conferencia di prensa di Gobierno di Aruba, na unda prome minister Evelyn Wever-Croes cu minister di Turismo Dangui Oduber tabata presente hunto cu representantenan di VNO, prome minister a trece dilanti cu esaki ta un momento historico y e comienso di un etapa nobo, di speransa y perspectiva. Ademas el a gradici e sosten cu Hulanda a duna Aruba, pa motibo cu esaki ta vacunanan cu a haya for di Hulanda.

“Esaki ta e prome badge cu nos a haya di e prome vacunanan y nos ta spera pa cada tres siman haya e resto di e badge” el a sigura.

Di su parti, minister Oduber a expresa cu nan ta stimula tur hende pa tuma e vacuna. No tin motibo pa personanan ta preocupa: “Nos ta wak personanan na Hulanda, Merca, Israel con efectivo e vacuna ta y con e cantidad di personanan hospitalisa a baha”, Oduber a declara.

Nan como mandatario lo tuma e vacuna na momento nan grupo bin dilanti, pa motibo cu nan no kier corta e linea. “Ora ta mi turno, lo mi tum’e”, prome minister a sigura.

Di mesun manera, nan a informa cu e prome grupo di personanan cu mañan lo tuma e vacuna ta consisti di 12 persona cu ta conoci den comunidad y cu ta cay den grupo di riesgo. Igualmente dos enfermera, un di IMSAM di nomber Kisiah Trimon y un otro di Hospital Dr Horacio Oduber cu ta yama Jourraine Halabi.

Manera a keda conoci for di siman pasa den un conferencia di prensa di Crisis Team, un prome lote di 11.700 vacuna lo mester a yega den siman aki bao protocolnan di seguridad hopi stricto pa asina nan por cuminsa administra esaki den e prome grupo di e linea di distribucion, cu ta personal di cuido, desde dia di awe, 17 di februari.

Aki ta referi na entre otro empleadonan di Hospital Dr Horacio Oduber, IMSAN, DVG, dokternan di cas, specialista-, enfermeronan, personal di casnan di cuido, dentista, fisioterapista y demas trahadonan den cuido.

Departamento di Salud Publico (DVG), den marco di preparacion pa ricibimento di e vacunanan, a informa cu DVG a planifica, organisa y controla tur proceso di logistica, distribucion, entrega y wardamento di e vacuna.

Ta importante pa trece dilanti cu pa warda e vacuna di forma cu e ta mantene su efectividad y no degrada, DVG a busca freezernan special cu por mantene e vacunanan den un temperatura constante di -80⁰ C.

Igualmente a comenta cu un ekipo di representante di RIVM di Hulanda a bin Aruba specialmente pa haci un control riba tur e preparacionnan cu a haci pa ricibi e vacuna, y nan a cualifica cu Aruba ta cumpliendo cu tur rekisito.

Ademas, entrante 22 di februari lo cuminsa vacuna e comunidad di 60+, cu ta trata di adultonan di edad avansa cu ta den casnan di cuido. Nan lo haya bishita di un ekipo special cu lo vacuna na e casnan di cuido, pashentnan drumi riba cama (bedlegerig). E famia por haci e peticion cerca dokter di cas pa e team mobil por pasa na cas y vacuna e persona. Nan a specifica cu e servicio aki ta unicamente pa pashent drumi riba cama.

E prome dos localidadnan cu lo habri pa cuminsa cu e vacunacion ta Centro Deportivo Libertador Betico Croes na Santa Cruz y Teresita Center na San Nicolas. E localidad na Santa Cruz a wordo diseña specialmente pa por brinda servicio special na adultonan mayor, di manera cu nan no mester para hopi largo riba nan pia. Unabes cu yega na e localidad, e grandinan lo por sinta y tur servicio lo yega cerca nan na nan stoel, ademas nan a bisa cu pa esunnan cu ta den rolstoel lo no tin problema tampoco.

Tambe, a keda conoci cu esunnan cu ta interesa pa haya e vacuna lo mester registra via e plataforma Aruba Health App, sinembargo, si e persona ta haya algun incoveniente pa cu esaki tambe lo por haci’e na tur MFA for di 7:30 te cu 4:30 non stop di dialuna pa diabierna, e persona mester presenta su carchi di AZV of si no tin AZV pero ta biba na Aruba por presenta cu paspoort.