Presidente di FTA, sr Hubert Dirksz a anuncia cu nan lo bin cu un accion si Gobierno no ta elimina oficialmente su intencion pa asunto di articulo 1613x . El a bisa cu nan lo consulta nan miembronan riba nan posicion ya cu elimacion di e articulo aki ta un menasa di clase trahado. El a bisa cu FTA no lo participa mas den Dialogo Social pa e forma cu el a wordo uza pa parti di Gobierno. Aunke a wordo bisa cu no lo elimina e famoso articulo 1613x, FTA kier wak esaki preto riba blanco mas pronto posibel. Pero segun NoticiaCla minister Paul Croes di Labora ta desmenti cu lo elimina e articulo aki.
Articulo completo cu a sali den Bon Dia Aruba di banda di FTA:
FTA ta menasa cu accion si gobierno elimina of cambia articulo 1613x
Ayera den oranan di merdia, e veterano sindicalista y presidente di FTA, sr. Hubert Dirksz a bisa cu loke nan kier pone bon cla dilanti ta cu den nan congreso nan a wordo informa cu no obstante e lucha cu FTA a tene cu otro sindicato pa para eliminacion di 1613x, gobierno y dunado di trabou a expresa cu lo continua cu e cambio riba e articulo menciona.
Presidente di FTA a laga sa cu a pesar di tur reunion cu a tuma luga, gobierno ta mustra cu ta continua cu su intencion. Pa tal motibo FTA a aproba den su congreso extraordinario cu ta culmina awe, cu nan ta continua cu e lucha contra intencion di gobierno pa elimina 1613x.
“Nos lo continua cu nos luchanan y nos lo mobilisa nos hendenan pa cualkier situacion si nos mester bay den accionnan mas fuerte”, presidente di FTA a bisa.
Nan lo percura pa mas tanto trahado firma cu nan ta contra di intencion di gobierno. El a bisa categoricamente cu cualkier indicacion serio cu ta mustra cu gobierno ta bay den direccion di elimina e ley menciona, “e por ta sigur cu lo bin accion”, segun sr. Dirksz.
Union sindical
FTA a bin cu e iniciativa pa papia cu tur sindicato pa yega na un union sindical bou e nomber di Union Sindical Aruba (USA). E sindicalista a bisa cu FTA ta kere den union sindical pa defende e clase trahado.
“Bo ta haya respet na momento cu bo mustra bo poder”, presidente di FTA a bisa. El a recorda cu un par di luna pasa FTA a cuminsa cu un lucha contra intencion di gobierno pa elimina e ley 1613x fei nos Codigo Civil. Esaki ta e motibo cu nan a uni cu tur sindicato local, y tambe nan a cuminsa cu un campaña internacional.
Despues di esaki gobierno a declara cu nan no lo sigui cu eliminacion di e ley 1613x. Esaki a keda confirma verbalmente tambe durante e ultimo reunion cu minister di Labor a sostene cu USA. FTA ta considera esaki un “bon decision”. Sinembargo FTA ta considera lamentabel cu a pesar di loke a wordo papia informacion ta yegando cerca nan cu gobierno ainda tin intencion pa elimina of haci cambio e ley menciona. P’esey nan ta pidi cu esaki lo wordo poni preto riba blanco.
