Tres ora a dura e tratamento di e caso cu sindicato SIWA a entabla contra WEB relaciona cu e cortamento di un forma unilateral di un 12.6% di nan condicion laboral. Na final hues a dicidi cu lo duna un sentencia dia 10 di maart proximo.
Tres abogado, mr. Bryan Coffie, mr. Dello Gomez y mr. D. Canwood a representa e trahadonan di e compania di utilidad aki afilia na SIWA. Mr. Coffie kende hunto cu su colega mr. Gomez a hiba e presentacion di nan cliente dilanti hues. Den cuadro di esey nan a presenta cu e caso aki tin di haber cu e cortamento unilateral cu a wordo haci di parti di WEB den e salario di e miembronan di SIWA, entre otro. Sin duna SIWA chens pa sinta na mesa y sin cu nan por negocia algo extra.
El a bisa cu pa SIWA e forma con e cortamento aki a tuma luga di forma unilateral, no ta algo cu nan por tabata di acuerdo cune. Otro punto cu e abogado mr. Coffie a referi na dje, y cu e ta considera importante pa SIWA tabata, cu no tin nada of niun tipo di algo cu e sindicato tabata contra di esey. Kiermen el a trece como ehempel cu den cualkier negoshi di e sector priva, ora bo tin un hende cu ta cuminsa acepta un recorte di un 20% of 40%, e persona ey lo traha un 20% of 40% menos.
Mientras cu e empleadonan di WEB cu ta miembro di SIWA a wordo corta den nan condicion laboral 12,6%. Pero nan si mester traha 100%, sin cu WEB ta dispuesto di duna nan nada a cambio. Kiermen den cierto sentido tur dos partido mester por a duna algo y ricibi algo. Pero den e caso aki no a sosode asina y pa SIWA esaki ta algo inaceptabel.
Un punto importante -segun mr. Coffie- pa tene cuenta cune cu SIWA su miembronan tabata un di e prome nan cu a aporta cu 12.6% na e fondo di solidaridad a base di un protocol. Nan tabata dispuesto pa duna parti di nan salario y otro beneficionan pa yuda cu e FASE.
