Un buraco di mil miyon… Y nos ta sigui fia…?

Den nos edicion di ayera nos a publica e panorama cu tin riba presupuesto 2021, for di e reaccion oficial di CAft, cu den su conseho a duna un vista parcial di esaki. Un di e conclusionnan mas importante ta cu pa di dos aña sigui, nos ta confronta un situacion unda gobierno su entrada ta mas o menos mitar di loke e gastonan total ta… E diferencia? Como mil miyon florin.

Gastonan di 2020 probablemente, mester warda ainda riba e cifranan di cuenta anual 2020, tabata mas o menos mil miyon florin mas cu loke gobierno a ricibi. E situacion aki lo bay ripiti su mes e aña aki, unda gobierno lo haya alrededor di 40 miyon florin menos, y gasto ta proyecta na baha cu un poco mas di 60 miyon florin. Cu otro palabra, gasto di gobierno a baha un tiki, esey ta berdad, pero e diferencia abismal entre entrada y gasto a keda na nivel di un biyon (mil miyon) florin; nos entrada ta mas o menos mitar di loke ta gasta (2021: entrada Afl. 976 miyon; gasto Afl. 1.953 miyon).

No ta tuma un genio financiero pa deduci cu e pregunta cardinal ta: y cuanto tempo nos tin pensa di mantene e situacion aki? Con nos ta keda financia semehante diferencia, aumentando nos debe, cu tabata coriendo na fin di 2020 caba den teritorio di peligro, cual tabata Afl. 4.979 miyon, y 116% di GDP? Y ademas, kico ta e perspectivanan real pa mehoracion di economia den e proximo añanan? Di e cifranan conoci por bisa cu na fin di 2020 tin proyecta pa a fia durante e aña como Afl. 660 miyon, compara cu e debe total na fin di 2019. Es decir, no a financia full e deficit cu tabatin riba papel. Cuanto finalmente a fia no ta conoci ainda, esey nos lo haya sa despues. Pero, tumando como punto di salida cu na 2021 ta fia mas o menos mes hopi, esey ta pone nos na mas Afl. 5.600 miyon di debe, cu, calcula na e GDP anticipa di Afl. 4516 miyon lo duna un porcentahe di debe di 124% di GDP. Dramatico? Ban tuma esey cu calma, pero cu realismo tambe.

Si despues di 2021, pa cual aña gobierno ta proyectando caba un crecemento nominal di 5,6%, nos haya aña tras aña un crecemento di 5% di GDP, anto por yega na e nivel di GDP di 2019 na aña 2026…Si nos tuma como presuposicion cu nos tin desde 2022 un crecemento di 10% anual ‘back to back’, anto nos ta yega na e nivel menciona di 2019 na 2023. Un porcentahe realistico ta indica nos cu nos ta na e nivel ‘pre-Covid’ pa mas tempran na 2024 of 2025. Y kico ta e punto cu nos kier trece dilanti aki? Cu si nos no ta baha gasto gubernamental drasticamente, nos ta bay topa cu e limite di loke nos por fia y nos lo mester adapta di tur manera. Y esaki no ta e noticia dificil di guli pa e actual gabinete so, e ta conta pa oposicion tambe, cu lo no tin solucion di mil maraviya manera den pasado, cu no a resulta tampoco den solucion, mas bien a pone nos den e abismo promer cu Covid-19 a haci su entrada caba. Pero, igualmente e mensahe ta conta pa tur ciudadano, cu tambe mester por comprende ta con dificil e situacion ta. Nos sa cu di banda di gobierno na algun oportunidad a declara cu e situacion ta dificil, pero si seguidamente no ta pone tur cifra riba mesa, anto ainda e gravedad di e caso no ta cuminza penetra den consenshi di hende. Y esey ta netamente loke nos mester awor.

Nos mester di esey awor pa e sindicatonan, principalmente esunnan cu ta representa empleado publico y esnan di sector subsidia, tambe di sector semi-gubernamental, cu no ta cuestion cu gobierno ta di mala voluntad, pero simplemente ni garnachi tin riba mesa, mucho menos abao na suelo. Pero, mester bisa si cu di e banda ey gobierno mes ta stroba su mes, anunciando cos cu ta mero propaganda. Con bo ta bay anuncia na comienzo di aña cu e bashipremie ta ser paga 100%, como si fuera un logro, mientras cu nos ta confrontando otro aña mas di mil miyon di deficit… Pakico baha loonbelasting, perdiendo un 15 miyon florin, si bo ta contemplando e mesun abismo ey bo dilanti di mil miyon florin…? Pa nos tur comprende bon: e buraco di mil miyon ey no ta di e ministro so, ta nos tur tin parti aden. Y ora, dia nos yega na fin di e posibilidadnan di fia placa, inclusive Hulanda cu no ta bay permiti algun biyon florin extra riba e casi 5.000 miyon fia caba, esun cu ta sinta como gobierno na e momento ey, lo mester asumi responsabilidad pa reduccion drastico di gasto di aparato publico, y no cu e medidanan di ‘manicure’, di ‘caricia suave’ pa ningun hende rabia, cu ta tumando aparentemente e aña aki. Economisa 11 miyon florin so riba un presupuesto di casi 700 miyon pa gasto di personal, esey practicamente ta bisa nos cu gobierno mes mester un ‘wake-up call’. E pregunta ta di unda, pasobra oposicion ta ‘muisstil’ riba e asunto aki.