CAft: Revoca reduccion di loonbelasting di 2%, O busca compensacion den otro impuesto…

E organo di supervision financiero College Aruba financieel toezicht (CAft), den su conseho pa presupuesto di gobierno di Aruba pa 2021, entre otro ta mustra riba e hecho cu e reduccion di loonbelasting desde 1 di januari 2021 no ta cuadra cu e maneho general, conseha tambe pa IMF, di move di impuesto directo pa impuesto indirecto. Por lo tanto ta conseha pa kita e medida o busca compensacion den aumento di un impuesto indirecto. Tambe mester considera un ‘eigen bijdrage’ pa AZV.

A base di e presupuesto e deficit financiero di Pais Aruba ta yega na Afl. 988 myon, 23% di GDP, esaki a base di GDP pa 2020 calcula pa Departamento di Asunto Economico na Afl. 4.277 miyon. E deficit pa henter e sector colectivo (Pais Aruba plus otro entidadnan) lo yega na Afl. 1.008 miyon, 23,6% di GDP nominal.

Pa 2021 gobierno di Aruba ta tuma como punto di salida un crecemento economico di 5,6% di GDP nominal. Segun CAft esaki ta un pronostico realistico, aunke e ta keda rondona pa incertidumbre. (Esaki lo pone GDP pa fin di 2021 na Afl. 4516 miyon, bastante aleha ainda di GDP di 2019, cu tabata Afl. 5.791 miyon; red.)

Pais Aruba ta tuma como punto di salida un reduccion di su entrada pa 2021 compara cu e presupuesto aproba di 2020, cu ta bay di Afl. 1.016 miyon pa Afl. 976 miyon. Parti di e reduccion ta a causa di e reduccion di tarifa di loonbelasting y e anticipacion di mas desempleado na 2021, cu resultado menos loonbelasting cu lo drenta caha di gobierno, hunto Afl. 29 miyon menos. Tambe lo tin un reduccion den entrada cu no ta impuesto di Afl. 42 miyon, pa motibo di ahustacion den normanan di erfpacht y menos entrada di dividendo,ocasiona pa e resultadonan negativo na 2020 di e empresa y entidadnan estatal cu ta pasa dividendo anualmente pa gobierno. Di otro banda ta mira un aumento di entrada di grondbelasting (Afl. 9 miyon), winstbelasting (Afl. 10 miyon), accijnzen (Afl. 23 miyon) y invoerrechten (Afl. 8 miyon).

Gasto AZV y SVb

Presupuesto 2021 ta carga cu e pagonan pa compensa deficit di AZV y SVb, ademas di e asistencia brinda den forma di FASE, subsidio di salario y subsidio na empresa mediano y chikito; esaki lo yega na Afl 536 miyon, cu ta Afl. 78 miyon mas cu e realisacion anticipa pa 2020. CAft ta menciona tambe un ‘werkloosheidsuitkering’ cu lo mester bin na vigor e aña aki, sin duna mas detaye. CAft ta haya cu e ilustracion di e cifranan aki no ta suficiente ainda y ta opina cu a base di e cifranan real di 2020 y e pronostico di crecemento economico, por baha e cifra aki. CAft ta haya cu e presuncionnan di SVb ta sali di un scenario mas conservador cu esun maneha pa Pais Aruba y cu ademas por compensa e deficit na SVb parcialmente cu nan propio reservanan, limitando e defict di Afl. 89 miyon te Afl. 28 miyon.

Den e gastonan di AZV lo mester bin un ahustacion di e austerisacion, poni na Afl. 58 miyon, te na Afl. 60 miyon, den conformidad cu e decision di Conseho di Ministro di Reino. Ademas CAft lo desea di mira un splicacion di e suma aki, manera a entrega na 2020, den consulta cu AZV. Tambe CAft ta mustra cu, den cuadro di sostenibilidad di finanzas publico, ta necesario pa realisa un austerisacion asina pa varios aña. CAft ta conseha pa considera aplica un ‘eigen bijdrage’ pa por yega na e Afl. 60 miyon di austerisacion ey.

Goederen & Diensten: baha gastonan pa 2021, tumando como referencia e realisacion anticipa di e categoria aki pa 2020.

Gasto di personal

Aruba ta cumpliendo cu e norma pa gasto di personal di e protocol di november 2018 cu ta determina cu e gastonan di personal mester baha nominalmente cada aña. Compara cu presupuesto 2020 e gastonan aki a baha cu Afl. 11 miyon. E reduccion di gasto aki ta debi na continuacion di e reduccion di salario di empleado publico y politico y un reduccion di gasto di overtime, y por lo tanto no solamente a base di e medidanan tuma den cuadro di e ‘Beleidsplan Verlaging Personeelskosten’ (BVP), e organo ta remarca.

Ademas CAft tin critica riba e hecho cu gobierno ta reserva Afl. 8 miyon extra como espacio extra pa vacatura, loke pa CAft ta contradictorio compara cu e intencionnan expresa den e BVP. CAft ta haya cu ta duna insuficiente ehecucion na e BVP, cu ta carece di direccion di ehecucion di e BVP y ta pidi gobierno pa tuma rienda den e asunto y no presupuesta extra espacio pa esaki den e presupuesto.

CAft ta opina cu den ehecucion di e BVP e medidanan no a conduci na economisacion concreto y ta consta cu e coordinacion entre departamentonan di Recurso Humano y di Finanzas no ta funciona y ehecucion ta stagna. CAft ta conseha pa pone e direccion pa cu ehecucion na Finanzas y pone e austerisacion programa den e presupuesto.

Inversion

Pais Aruba tin den su presupuesto pa 2021 un suma di Afl. 20 miyon pa inversion. CAft ta haya cu solamente por pone inversion di reemplazo necesario den e categoria aki, cu ta acopla na e ‘Landspakket’ acorda cu Hulanda. Tin inversion cu ta cumpli cu e criterio aki pero otronan cu ta gastonan regular, pa cual CAft ta conseha pa baha e suma cu a dedica na esaki den e presupuesto. Tambe ta observa cu den e presupuesto no tin inversion inclui cu ta den cuadro di e Landspakket y cu no tin compromiso nobo haci den cuadro di proyecto ‘PPP”, loke ta conforme e protocol di 2018.

E Landspakket pa Aruba ta den e presupuesto na diferente lugar, CAft ta bisa. Sin embargo, ta constata cu no ta cla di cual actividad ta trata concretamente y cual presupuesto ta destina na ehecucion di esakinan. Un ehemplo di esey ta e mehoracion di e maneho financiero pa cual CAft a pdi atencion na varios ocasion den pasado. CAft ta pidi pa concretisa e plannan di e Landspakket den presupuesto y duna e relacion cu e gasto y inversionnan presupuesta. Tambe CAft ta constata cu structuracion y facilidad pa lesa e presupuesto a mehora compara cu anterior versionnan y ta haci recomendacion pa amplia su valor informativo dunando splicacion di tur e categorianan y no solamente esunnan cu tin cambio.

Gasto

Gastonan general pa 2021 ta baha cu Afl. 63 miyon compara cu presupuesto aproba 2020, y ta bay di Afl. 2.016 miyon na Afl. 1.953 miyon. E gastonan mas abao ta debi na menos gasto di e areglo pa subsidio riba salario pa sector priva – Afl. 44 miyon. Tambe gasto mas abao pa Bienes & Servicio, di Afl. 11 miyon pa menos costo di transaccion bancario. E gastonan aki na 2020 tabata relaciona cu e financiamento externo di e deficit di recursonan liquido. Como consecuencia di e austerisacion di 12,6% riba salario di empleado publico y politico lo gasta Afl. 11 miyon menos, mientras cu na subsidio di salario ta spaar Afl. 13 miyon. Tambe tabatin na 2020 un aportacion unico na Serlimar di Afl. 7 miyon, cu pa presupuesto 2021 no ta aparece mas. CAft no ta detaya con Serlimar lo logra no haci un apelacion riba gobierno na 2021.

Gasto di interes lo subi na 2021 cu Afl. 27 miyon, como consecuencia di financiamento di e deficit y e gastonan di interes cu na 2020 a financia externamente.

Financiamento di deficit y debe

E total di e necesidad pa financiamento ta Afl. 1.249 miyon, cu pa Afl. 261 miyon ta pa refinancia debenan cu ta madura. E resto, Afl. 988 miyon, ta e deficit presupuestario. Refinanciamento di prestamo local lo ser haci localmente tambe; ta trata di Afl. 96 miyon. A palabra cu Hulanda cu na 2021 y 2022 por refinancia e debenan internacional cu ta madura via Hulanda. Pa 2021 esaki ta Afl. 165 miyon. CAft ta bisa cu e deficit financiero calcula mester ser mira como un maximo y cu mester percura pa e austerisacionnan programa tuma lugar, ya cu Aruba su debe relaciona na GDP ta haltisimo caba.

Finalmente CAft ta constata cu ta resulta di e raportahe 3-2020 di gobierno, cu solamente seis entidad estatal parcialmente a cumpli cu e austerisacion cu a aplica riba e empleado publico. Gobierno a indica cu a usa e suma aki pa cubri gasto di FASE. CAft ta constata cu den e presupuesto 2021 no a tene cuenta cu e beneficio aki, di austerisacion den e entidadnan estatal. Ta recomenda pa hinca e condicion aki, cu tin base den decision di Conseho di Ministro di Reino, ainda den presupuesto.