Den un post largo riba rednan social, Justin Timberlake ta bisa cu e kier pidi disculpa na Britney Spears y Janet Jackson, ‘pasobra mi ta stima y respeta e muhenan aki y mi sa cu mi a faya’.
“Mi a mira e mensahe-, tag-, comentario-, y preocupacionnan y mi kier responde. Mi ta profundamente sorry pa e momentonan den mi bida unda mi accionnan a contribui na e problema, unda mi a papia ora no tabata mi turno, of mi no a defende loke ta corecto. Mi ta compronde cu mi a faya den e momentonan aki y den hopi otro y a beneficia di un sistema cu ta acepta misoginia y racismo”, el a skirbi ayera.
Post di Timberlake riba rednan social ta bin un siman despues di e lansamento di ‘The New York Times Presents: Framing Britney’, e documental di FX y Hulu cu ta tuma un bista historico na e circunstancianan cu a conduci na e conservatorship di Britney na 2008 y ta resalta e movemento di fanatico #FreeBritney cu kier mir’e libera di esaki y duna control di su bida. E documental a conta cu un entrevista bieu, unda Timberlake a papia di tin relacion sexual cu su ex-pareha y a indica cu el a hacie ridiculo door di contrata un persona parecido pa su video ‘Cry Me a River’.
Fanaticonan a critica Timberlake pa contribui na e breakdown hopi publico di Spears y controla e narativa tocante e fin di nan relacion.
Mas critica a yega cerca Timberlake mientras rednan social a cuminsa recorda e ‘wardrobe malfunction’ (problema cu paña) cu a causa un controversia nacional na e Super Bowl 2004. Algun a argumenta cu Jackson, como un muhe color scur, a bira victima di standardnan dobel racista y sexista, y a ricibi un tratamento mas pisa cu Timberlake, un homber blanco, y cu el a beneficia di ‘privilegio blanco masculino’.
Y e decision di NFL di invita Timberlake pa duna un presentacion den show di medio tempo tres aña atras a genera critica di hendenan muhe, minorianan y otronan cu a sinti cu Jackson a ser forsa inhustamente pa paga un prijs mas halto cu Timberlake.
“Mi tambe ta sinti obliga pa responde, en parti, pasobra tur esnan involucra merece miho y mas importante, pasobra esaki ta un combersacion mas grandi di cual ami cu henter mi curason kier ta parti y crece”, el a skirbi. “E industria ta defectuoso. E ta set up homber, specialmente homber blanco, pa exito. E ta diseña asina. Como un homber den un posicion privilegia mi mester ta vocal riba esaki. Pa motibo di mi ignorancia, mi no a reconoce esaki pa loke e tabata mientras e tabata sucediendo den mi propio bida, pero mi no kier nunca mas pa beneficia di otronan siendo pusha abao.”
E hashtag #FreeBritney a bira un tendencia pisa den ultimo siman, cu celebridadnan dunando Spears sosten, incluyendo Paris Hilton, Miley Cirus, Bette Midler y mas.
Jackson tabata un topico di tendencia rond di e Super Bowl 2018 y despues, cu e hashtag #JusticeforJanet y #JanetJacksonAppreciationDay bayendo fuerte riba rednan social prome cu e Timberlake a tuma su record di tres presentacion riba escenario na Super Bowl.
“Mi no tabata perfecto nabegando tur esaki den mi carera. Mi sa cu e disculpa aki ta e prome stap y no ta absolve e pasado. Mi kier tuma responsabilidad pa mi propio erornan den tur esaki como tambe ta parti di un mundo cu ta eleva y sostene”, Timberlake a skirbi. “Mi ta preocupa profundamente pa e bienestar di esnan cu mi tabata y ta stima. Mi por haci miho y mi ta bay haci miho.”
