Parlamento Australiano lo debati propuesta pa pone Google y Facebook paga pa noticia, despues cu un comite di Senado ayera a recomenda pa no haci cambio na e propuesta di e prome legislacion di su tipo na mundo.
E Comite di Legislacion Economico di Senado ta evaluando e propuesta desde cu a introduci esaki den parlamento na december.
E senadornan a rechasa e argumentonan di Facbeook y Google, cu no por a traha cu e e asina-yama ‘media bargaining code’, cu lo forsa e gigantenan digital negocia pago pa medionan di noticia Australiano pa e contenido noticioso cu e plataformanan ta link.
Pero e comite tambe a reconoce cu e legislacion tabatin riesgo y mester wordo revisa despues di un aña.
“E comite ta acepta cu ta keda e posibilidad cu no tur riesgo a ser tuma na cuenta, y cu mas refinamento por ta necesario pa e mecanismo di arbitrahe y otro partinan di e codigo pa asina nan traha den un manera optimo”, e reporte ta bisa.
Tesorero Josh Frydenberg a bisa cu su departamento lo revisa e ley un aña despues cu esaki a drenta na vigor ‘pa sigura cu ta dunando resultadonan cu ta consistente cu e intencion di politica di gobierno’.
“Gobierno ta spera tur partido continua traha constructivamente den direccion di yega na acuerdonan comercial den espiritu di colaboracion y bon boluntad curasha pa e codigo”, el a agrega.
Parlamento ta programa pa considera e legislacion diamars proximo, y gobierno conservador ta spera cu lo aproba esaki durante e proximo sesion di dos siman.
Aprobacion di e ley ta garantisa den Camara di Representante, unda gobierno tin mayoria di asiento, a diferencia di Senado.
Google ta mantene speransa cu lo bin amienda. “Nos ta anticipando pa intercambia cu legisladornan a traves di e proceso parlamentario pa adresa nos preocupacion y logra un codigo cu ta traha pa tur hende – editornan, plataformanan digital, y negoshi- y usuarionan Australiano”, director di Google, Lucinda Longcroft a bisa.
Google a reforsa su campaña contra e legislacion proponi, bisando e comite luna pasa cu e plataforma probablemente lo pone su servicio di buskeda no disponibel na Australia si introduci e codigo.
Google no a responde na un peticion di AP pa un splicacion riba con lo haci pa exclui Australia di su funcion di buskeda.
Facebook a menasa di preveni su usarionan di comparti noticia Australiano.
Facebook a bisa ayera cu tabata spera cu Australia lo legisla un ‘solucion cu berdaderamente ta refleha sostenibilidad a largo plaso den industria di noticia’.
Administracion di ex-presidente Donald Trump tambe a opone e modelo y a solicita pa Australia suspende cualkier plan pa finalisa e ley. “Gobierno Mericano ta preocupa cu cualkier intento, mediante legislacion, pa regula e posicionnan competitivo di hungadonan specifico den un mercado digital evolucionando rapidamente, na e detrimento claro di dos compania Mericano, por tin resultadonan dañino”, representantenan assistent di Comercio Mericano, Daniel Bahar y Karl Ehlers a skirbi na e comite cu fecha 15 di januari, riba papel cu e letterhead ‘Executive Office of the President’.
Pero rival di Google, Microsoft, ta sostene e ley. Presidente di Microsoft, Brad Smith, diabierna a pidi pa Merca considera adopta leynan similar.
Google a acusa Microsoft, cu su motor di buskeda Bing ta e segundo mas popular na Australia, di duna declaracion falso. “Microsoft su opinion riba e ley proponi na Australia no ta sorpresa – claro nan lo ta ansioso pa impone un obstaculo cu cual no por traha riba un rival, y aumenta nan share di mercado”, senior vice-presidente di Google, Kent Walker a bisa.
E codigo proponi pa Australia tin como meta pone Google y Facebook paga companianan di medionan Australiano hustamente pa usa contenido noticioso cu e gigantenan tecnologico ta busca di sitionan noticiero.
No tin plan pa haci motornan di buskeda mas chikito, manera Bing, paga pa link usuarionan na noticianan Australiano, pero gobierno no a descarta e opcion aki.
Google a enfrenta presion di autoridadnan na otro paisnan pa paga pa noticia. Luna pasa a firma un acuerdo cu un grupo di editornan Frances, habriendo caminda pa e compania haci pagonan di derecho di autor digital. Bao di e acuerdo, Google lo negocia acuerdonan di licencia individual cu corantnan, cu pagonan basa riba factornan manera e cantidad di noticia publica diariamente y trafico di internet mensual.
Pero Google ta resistiendo e plan Australiano pasobra lo tin menos control riba con hopi lo mester paga. Bao sistema Australiano, si un plataforma online y un negoshi di noticia no por bay di acuerdo riba un prijs pa noticia, un panel lo tuma un decision obligatorio riba e pago.
Google a anuncia siman pasa cu a cuminsa paga shete website di noticia Australiano bao su propio modelo, Google News Showcase. Google ta pagando editornan participante pa provee contenido tras di un ‘paywall’ na usuarionan di News Showcase mediante e modelo cu a lansa na october.
Google a yega na acuerdo di pago cu mas di 450 publicacion globalmente mediante News Showcase.
