Na momento cu generalnan di ehercito na Myanmar a ehecuta un golpi di estado siman pasa, brevemente nan a corta acceso na internet di un intento aparente di suprimi protesta. Na Uganda, residentenan no por a usa Facebook, Twitter ni otro rednan social pa varios siman despues di un eleccion recien. Y den region nort di Etiopia, Tigray, internet ta corta pa varios luna memey di un conflicto mas amplio.
Rond mundo, cortamento di internet a converti den un tactica cada bes mas popular di regimennan represivo y autoritario y algun democracianan no liberal. Gruponan di derechonan digital ta bisa cu gobiernonan ta usa esaki pa combati disidencia, silencia oposicion, of tapa abuso di derechonan humano, generando preocupacion tocante restriccion di libertad di expresion.
Regimennan hopi biaha ta corta acceso online como respuesta na protesta y disturbionan civil, particularmente rond di eleccion, mientras nan ta purba di mantene nan control di poder door di restringi e fluho di informacion, investigadonan a bisa. Esaki ta e ekivalente digital di tuma over control di e stacionnan di radio y television local cu tabata parti di e playbook pre-internet di despotanan.
“Cortamento di internet no ta reporta of ta mal reporta masivamente durante añanan”, segun Alp Toker, fundador di organisacion di monitoreo di internet. Netblocks. Mundo a ‘cuminsa realisa kico ta pasando’ mientras esfuersonan pa documentacion, manera esun di dje, ta expande, el a bisa.
Aña pasa tabatin 93 shutdown mayor di internet na 21 pais, segun un reporte di Top10VPN, un grupo di investigacion di privacidad y seguridad digital basa na Reino Uni. E lista no ta inclui paisnan manera China y Nort Korea, unda gobierno estrictamente ta controla of restringi internet. Cortamente por varia, desde e blackout completo di internet, na blokea plataformanan di rednan social, te na severamente reduci velocidad di internet, segun e reporte.
Cortamento di internet tin costo politico, economico y humanitario, expertonan ta adverti. E efectonan ta exacerba pa lockdown di Covid-19 y ta forsando actividadnan manera les di scol bay online.
E cortamento tin un rol den un bataya mas grandi riba control di internet. Den occidente, esfuersonan pa controla plataformanan di rednan social a duna espacio na preocupacionnan competiendo, tocante restriccion di libertad di expresion y limitacion di informacion dañino, cu e ultimo hopi biaha siendo usa pa regimennan autoritario pa hustifica accion.
Na Myanmar, acceso na internet a keda interumpi pa alrededor di 24 ora weekend ultimo, den un intento aparente pa stop e protestanan contra e toma di poder di ehercito y e detencion di lider Aung San Suu Kyi y su aliadonan. Pa diadomingo atardi, usuarionan di internet a reporta acceso na data riba celular a keda restaura diripiente.
Telenor ASA di Noruega, cu ta maneha un di e companianan wireless principal di Myanmar, a bisa cu ministerio di Comunicacion a cita ‘circulacion di fake news, stabilidad di e nacion y interes di publico’ pa duna orden pa operadornan temporalmente shutdown rednan di internet.
Telenor a bisa cu a cumpli cu leynan local. “Nos ta lamenta profundamente e impacto cu e shutdown tabatin riba pueblo di Myanmar”, a bisa.
Ta un movida familiar di gobierno di Myanmar, cu a ehecuta un di e shutdown di internet mas grandi di mundo na estadonan Rakhine y Chin, cu meta pa interumpi operacionnan di un grupo etnico arma. E cortamento a cuminsa na juni 2019 y a keda elimina apenas dia 3 di februari ultimo.
Otro shutdown largo di internet ta den region Tigray di Etiopia, cu ta corta desde cu e lucha a cuminsa na inicio di november – esun mas recien den un serie di cortamento sin ningun señal cu servicio lo keda restaura por lo pronto. Esey a hacie dificil pa sa cuanto civil a perde nan bida, na ki grado e lucha ta continua, of si hende a cuminsa muri di hamber, manera algun a adverti.
Na Uganda, restriccionnan riba website di rednan social incluyendo Twitter, Facebook y YouTube a drenta na vigor prome cu eleccion presidencial dia 14 di januari, hunto cu un blackout completo di internet na bispo di e votacion. Autoridadnan a bisa cu esaki tabata pa preveni sostenedonan di oposicion organisa protestanan potencialmente peligroso riba caya.
E prohibicion di rednan social a keda elimina diaranson, excepto pa Facebook. Lider pa hopi tempo, Yoweri Museveni, kende tabata enfrentando e reto mas grandi na su poder te awo, di cantante-converti-den-legislado Bobi Wine, tabata rabia cu eliminacion for di e red social prome cu e voto di loke a bisa tabata cuentanan falso vincula na su partido.
Na Belarus, internet a cay pa 61 ora despues di eleccion presidencial dia 9 di augustus, haciendo esaki e prome blackout di internet na Europa. Servicio a keda interumpi despues cu resultadonan a duna victoria na presidente Alexander Lukashenko, pero e voto a ser mira ampliamente como fraudulento y a genera protestanan enorme. Acceso a keda instabiel pa varios luna, particularmente rond di protestanan durante weekend, tempo cu servicio di internet a cay varios biaha.
E riesgo ta cu cortamento regular a bira normalisa, Toker a bisa. “Bo ta haya un sorto di respuesta Pavloviano unda tanto e publico na e pais y comunidad internacional lo bira desensibilisa na e cortamento aki”, el a bisa, yamando esaki ‘e riesgo di mas grandi na nos libertad den era digital’.
Cortamento di internet tambe ta comun na India democratico, unda prome minister Narendra Modi su gobierno a usa nan cada bes mas pa ataca su oposicion politico. Su gobierno nacionalista Hindu a ordena varios shutdown regional, segun un website di tracking. Mayoria tabata na Kashmir, cu a sufri un blokeo di 18 luna di servicio mobil di velocidad halto, cu a termina siman pasa. Pero tambe a usa nan na otro luganan pa demostracionnan anti-gobierno, incluyendo un protesta enorme di agricultornan cu a spanta administracion di Modi.
“Antes tabata gobiernonan autoritario cu tabata haci esaki, pero nos ta mirando e practica ta bira mas comun den democracianan manera India”, segun Darrell West, vicepresidente di estudio di gobierno na e Brookings Institution cu a studia shutdown di internet. “E riesgo ta cu unabes un democracia hacie, otronan lo tin tentacion pa haci mescos. Por cuminsa na nivel local pa maneha disturbio, pero despues plama mas ampliamente.”
