Fayo den sistema pa proteccion di mucha

Den dianan aki un biaha mas Aruba ta conoce dos caso di abuso di mucha. Cada un di nan a causa un conmocion den comunidad pa e motibo con a trece esakinan dilanti, aunke e espantoso fenomeno aki ta sigui tuma luga.

Bon Dia Aruba a tuma contacto cu Grislynn Hernandez, ken ta e mama di un mucha muhe cu recientemente su caso a bin dilanti na Corte di Husticia.

Diamars ultimo, Bond Dia Aruba y varios medio di comunicacion local a publica e noticia cu un pastoor a wordo condena pa Corte Comun di e islanan Aruba, Corsou, Sint Maarten y islanan BES, na unda nan a duna e veredicto den un caso di apelacion di Ministerio Publico.

Esaki ta contra e pastoor J.I.S, cu na juni di aña 2016, segun e denuncia cu a wordo haci e tempo ey, a comete acto inmoral di indole sexual cu un menor di edad.

Hernandez a expresa cu ora e incidente cu su yiu e tuma luga, e prome paso cu el a tuma ta pa bay warda di Polis y pone e denuncia. El a menciona cu door cu su caso no tabata trata di un abuso sexual cu penetracion, polis segun Hernandez a menciona cu nan no a wak e necesidad di yama e persona encarga cu abuso di mucha.

For di e momento e investigacion a cuminsa y e no tabata mag di comenta nada di e caso, pa motibo cu e investigacion tabata habri te ora polis detene e persona cu a comete e acto ilegal aki, den caso cu mester deten’e.

“M’a warda dos siman largo sin bisa nada, pensando cu e investigacion tabata andando. Y nunca nan a investiga nada, p’esey m’a keda keto,” Hernandez a sigura.

Di mesun manera, el a splica cu autoridadnan no a presenta na e luga na unda e persona ta traha. Tampoco nan a puntra otro mayornan si nan a mira algo straño den comportamento di nan yiu, entre otro factornan cu mester a comproba den e investigacion.

Dianan a pasa y Hernandez a haya un yamada den cual a inform’e cu nan lo a detene e persona. Pero esey no a tuma luga. Autoridadnan a interoga e persona pa un ora, pero “esey no tabata un detencion, nan a djis yam’e pa interog’e, pero e no a bay cera ni nada” segun Hernandez a declara.

Dos aña a pasa y segun loke Hernandez a conta, e no a tende nada di e caso. A haci yamada na Ministerio Publico pa asina haya informacion di con a para cu e caso, pero door cu no tabatin prueba suficiente, e persona acusa tabata liber.

Un par di luna pasa, Hernandez a wordo informa mediante un carta cu a yega na su cas cu su persona tabatin un afspraak na Ministerio Publico, pa motibo cu fiscal a considera cu nan tin suficiente motibo pa habri e caso back pa apela. E mester a duna su consentimento di e caso y ademas si e tabata di acuerdo pa su yiu por presenta den Corte, algo cu e no a permiti, pa motibo cu “mi yiu te ainda tin consecuencia di loke a pasa, e tin ansiedad y hopi depresion”.

Ademas, el a comenta cu e tabata sa desde e prome dia cu e persona aki no lo bay cera. Loke si e tabata kier ta pa comunidad henter wak cu su yiu no tabata gaña. “Tur mucha tin derecho, y cu e homber aki ta un pedofiel, mi kier pa hende sa esey”, Hernandez a afirma.

Tres hues di Corsou a bin Aruba pa e caso di apelacion, segun el a bisa. Ademas el a conta cu e persona aki tabatin hopi contradiccion di loke el a declara e prome biaha. “Nos a cana nos caminda manera mester ta y e hues a bisa cu esaki ta un hecho penal y cu e no sa dicon na cuminsamento e no a wordo haya culpabel.”

Hernandez a sigura cu hues tambe a bisa cu e mester a bay cera y cu mester a cumpli un condena. Pero aworaki e caso a prescribi di tanto aña cu e caso no a bin dilanti y e sentencia cu el a haya ta 80 ora di trabao comunitario of 40 dia cera si e no cumpli cu esey.

“Esaki ta un fayo di e sistema, manera e hues a bisa, pasobra for di cuminsamento e caso a bin hopi laat den corte. Dos aña a pasa y despues nan a considera cu tampoco mester sentenci’e pasobra tabatin falta di prueba”, el a expresa.

Na e momentonan aki, Hernandez a conta cu e tin sentimentonan mixto. El a haya un alivio ora el a scucha e sentencia, y cu su yiu awor mester ta un tiki mas trankil, aunke e trauma no ta bay kita.

Ademas di Hernandez, diamars ultimo tambe Aruba a conoce un otro mama, cu den su desesperacion a convoca medionan di comunicacion local pa trece dilanti su preocupacion y angustia. El a denuncia cu su yiu di tres aña a wordo abusa sexualmente na un crèche den area di Playa.

Ta importante pa trece dilanti cu mester enfoca primeramente riba e parti di prevencion. Alerta e muchanan desde un edad trempan kico un persona mag di haci y kico no. Mayoria, pero no tur, caso di abuso ta bin di algun di miembro di famia. Ta p’esey cu mayornan mester papia cu nan yiu, informa nan y educa nan, siña e pasonan di kico nan tin cu haci ora nan ta wordo enfrenta cu un situacion di e sorto aki.

Mientras mas chikito e muchanan ta, mas vulnerabel nan ta. Fundacion Respeta mi den un articulo publica pa Bon Dia Aruba di fecha 25 di februari di 2020, ta bisa segun estadistica global di Unicef na 2016 mucha bao di 20 aña di edad, 150 miyon di mucha muhe ta wordo abusa sexualmente; esaki ta 1 di cada 10 mucha muhe. Den e caso di mucha homber bao di 18 aña ta un 73 miyon, cu ta 1 den 6 mucha homber ta wordo abusa sexualmente.

Di mesun manera mester keda informa riba pasonan cu mayornan mester tuma ora un situacion di e manera aki ta tuma luga, tin numbernan di telefon na unda e mayor por tuma contacto na 588.1010 di Bureau Sostene mi y haci denuncia na departamento di Polis.