Awe pa 8’or di mainta ta tuma luga e caso cu sindicato SIWA a entabla contra WEB N.V.

Ayera mainta directiva di SIWA a haya luz bende di parti di nan miembronan pa sigui cu e caso aki como un forma di malcontento contra e manera cu WEB N.V, sin consulta cu nan, a dicidi di corta unilateralmente for di nan condicion laboral un 12.6% pa e fondo di solidaridad (FASE).

Informacion cu a drenta cerca nos ta indica cu sindicato ALFAST cu ta representa e staf di Elmar N.V. a dicidi di bay den e mesun direccion di SIWA, y ayera nan a entabla un caso cu e mesun meta contra gerencia di Elmar N.V.

E companianan di utilidad aki ta cay bou e mesun paraplu di supervision di e hunta directivo di Utilities N.V. cu nan principal accionista ta gobierno. Tin indicacion cu e decision di ALFAST a crea un discrepancia cu sindicato STA cu ta representa e mayoria di trahadonan di Elmar. Prome cu ALFAST bin cu un caso, STA tabata prefera pa warda e sentencia di awe entre SIWA y WEB.

Carta

Ya casi na bispo di e caso crucial di awe, e trahadonan di ambos compania di utilidad a ricibi un carta for di nan gerencia. E cartanan aki tabata uno mas tanto pa concilia y ambos carta tabatin practicamente e mesun contenido y mensahe pa e trahadonan di WEB y Elmar.

Den e carta aki nan respectivo directiva di e compania ta informa e trahadonan cu nan lo suspende temporalmente e medida di solidaridad (inhoudinge) di 12.6%.

E intencion di e directiva di ambos compania estatal (WEB y Elmar) riba e decision aki ta pa cuminsa un proceso di reunion y negociacion cu nan sindicatonan y trahadonan di e companianan di utilidad menciona. Den ambos carta ta wordo bisa cu nan kier crea espacio pa por negosha scenarionan pa yega na un protocol of acuerdo.

Ainda no ta wordo premira con e carta aki lo por tin su influencia den e caso di SIWA cu ta wordo trata awe mainta. Esta si hues lo dicidi pa ambos partido sinta na mesa prome cu e ta bin cu un sentencia. Of eventualmente hues lo por trece su posicion huridico riba e impasse aki entre e trahadonan di WEB y nan doño di trabao pa medio di un veredicto.

Tambe sindicato lo por pidi hues su posicion legal of sentencia riba locual a tuma luga na luna di januari ultimo prome cu nan lo sinta negosha. Despues di e reunion di ayera mainta entre directiva di SIWA y su miembronan, tur cos ta mustra cu e trahadonan pa medio di nan sindicato ta hopi dicidido pa scucha for di hues, si e compania por a corta for di nan salario sin cu nan a bay di acuerdo cune.

Malcontento

Presidente di SIWA, Eric Henriquez a yega di expresa na Bon Dia Aruba cu solidarismo no ta e problema, pero nan condicionnan. No manera a wordo impone como un dictadura. Tabatin un diferencia riba con e cortamento a bay aña pasa y con a sosode na inicio di 2021. Aña pasa tambe tabatin un carta di gobierno pa tur trahado publico, semi publico, compania estatal, fundacion y institucion, pa nan entrega.

E entrega aki a bay a base di un acuerdo mutuo, mayoria di nan firma un protocol. Esaki tabata e caso di SIWA cu a firma un protocol cu directiva di WEB N.V. caminda nan a stipula cu e ta vigente te final di december 2020. Unabes cu luna di december a yega, gobierno a bolbe manda un carta pa e trahadonan aki sigui mustra nan solidarismo. E cortamento aki –segun minister president- ta parti di entrega di salario, como un di e condicionnan cu Hulanda a bin cune den e landspakket.

Apesar cu gobierno a firma un acuerdo cu Hulanda, e pregunta cu ta surgi ta: Si gobierno por impone e condicion aki? Mirando cu e trahadonan na servicio di e companianan estatal tin contracto colectivo (CAO). Of tambe esunnan cu tin contract individual manera e ingenieronan. Legalmente ta dificil pa cambia acuerdo di trabao unilateralmente, vooral den compania manera WEB cu financieramente ta bon para. Te hasta nan a entrega dividendo pa gobierno aña pasa.

Si e veredicto lo resulta uno no faborabel pa gerencia di WEB N.V. gobierno a yega di expresa cu no tin otro alternativa cu forsa nan legalmente. E pregunta ta cu si gobierno lo por impone legalmente pa empleadonan di WEB of di otro compania estatal manera Elmar lo sigui entrega bao argumento cu ta parti di e acuerdo firma cu Hulanda.

Mientras otro sindicatonan por ehempel esunnan di Setar y Triple A (Aeropuerto) si a firma un acuerdo nobo pa 2021. SIWA a yega di manda un carta bisa e compania cu nan no ta dispuesto di entrega. Pues no tabatin negociacion prome cu WEB a dicidi di corta 12.6% riba condicion laboral di nan trahadonan na luna di januari ultimo. Mientras cu opinion publico a yega di expresa den social media nan desacuerdo cu e sindicatonan nan posicion, mirando e situacion cu nos pais ta pasando aden.

Impuesto di solidaridad

Presidente di SIWA a laga sa cu gobierno tin e instrumentonan huridico pa pone den un landsverordening. Si gobierno lo kier forsa nan legalmente pa sigui entrega di e manera cu nan kier, e sindicalista a declara cu e ta “welcome.” Pero si mester implementa e ley, manera cu e ta pa evita problema of discusion.

E postura aki por wordo interpreta cu tur hende mester ta ariba cama of tur hende mester drumi riba vloer. Kiermen tur sector y/of gremio mester ta solidario. Recientemente minister presidente, Evelyn Wever-Croes a bisa cu aworaki un solidariteitsheffing no ta un opcion.

El a expresa cu un impuesto di solidaridad ta un tipo di impuesto cu gobierno tin cu bin cune den un cierto momento. E ta haya cu esaki no ta e momento ideal pa bin cune. E ta haya cu un impuesto di solidaridad bo ta bin cune, ora cu realmente bo tin un base amplio cu por contribui na un aporte di solidaridad. Y esey tabata e caso na ’85 y no na 2020, segun e prome mandatario

Na aña 1985 a bin cu e impuesto di solidaridad, tempo cu LAGO a bay, caminda mester busca entrada hopi lihe pa gobierno. Pero e ta haya cu e golpi cu ceramento di LAGO a produci, no ta nada compara cu esun cu nos ta bibando cu e crisis di Covid. Ya cu e pandemia a ocasiona, y ta sigui ocasiona, un golpi mas grandi pa nos pais.

Consecuentemente -e mandatario a splica- cu mas hende cu a perde nan entrada lo cay bao di e categoria cu lo paga solidariteitsheffing. E ta haya cu un solidariteitsheffing lo afecta solamente e mesun grupo di persona aki. Segun e prome mandatario, un solidariteitsheffing lo tabata funesto pa nos pais.

Igualmente el a trece dilanti cu e cortamento di salario di 12.6%, ta un condicion cu Hulanda a pone pa nos por haya financiamento. Mientras un impuesto di solidaridad no kiermen rebaho di gasto di salario. No ta cuestion di entrada, sino loke Hulanda kier ta pa gobierno di Aruba baha specificamente riba nan gasto di personal.

Otro punto cu e mandatario a trece dilanti ta cu e entrada cu un impuesto di solidaridad mester produci pa cubri e deficit di 2020, e mester ta un porcentahe extremadamente halto. E ta haya cu 12.6% no ta yega. Mientras cu na aña ’85 e impuesto di solidaridad di 8.2% a yega pa cera e deficit. Pero e ta calcula cu e biaha aki cu e crisis di Covid a dal nos pais, nos ta papiando di cinco pa seis biaha 8.2%, y esey niun hende por paga.

Segun prome minister, nan a yega di trece riba mesa di negociacion pa enbes di baha gasto di personal bin cu un impuesto di solidaridad. Sinembargo premier Wever-Croes a bisa cu Hulanda su condicion ta baha gasto di personal. Igualmente el a bisa cu na januari ultimo, Secretario di Estado Raymond Knops a bin cu su opinion na Aruba cu cualkier instituto cu ta eherce un funcion publico, mester mustra solidarismo y entrega parti di su entrada. E ta kere cu esey ta e contesta exacto pa kico un solidariteitsheffing no por bin.