E cantidad di asiento aereo for di Merca pa prome kwartaal di 2021 ta mustra un caida di 14 porciento compara cu 2020 y ta proyecta cu januari a cera cu un total di 31 mil bishitante, cu ta menos cu locual a proyecta.

Esakinan ta apenas algun di e datonan cu Aruba Tourism Authority, ATA, a presenta na Bon Dia Aruba. Esaki particularmente a raiz di e medida nobo di Gobierno Mericano pa rekeri cu tur biahero cu ta drenta Merca mester tin un resultado negativo pa COVID-19. E expectativa tabata cu e decision lo tin impacto riba turismo di Aruba. Pero banda decision di Gobierno Mericano, tambe tabatin desaroyo den e pandemia mes, unda e variante di Reino Uni, di e SARS-COVID-2, esta e coronavirus cu ta causa COVID-19, a bira mas prevalente na Norte America y hasta a keda descubri na Aruba. Air Canada por ehempel a dicidi pa para su vuelonan pa Aruba por lo pronto.

ATA a sigui e desaroyo aki hopi di cerca y den un declaracion a bia cu ta anticipa cu Januari lo cerca cu un total di 31 mil bishitante, cu ta 14 mil menos, compara cu e scenario ‘conservativo’ cu a keda stipula pa e luna. E proyeccion aki a dal den retonan adicional, Director di ATA Ronella Tjin Asjoe Croes a bisa Bon Dia Aruba. “Un di nan ta entre otro e anuncio di e medida di testing a pone cu hopi bishitante di Merca a bolbe prome cu e medida drenta na vigor, esta 26 di januari 2021.”

Consecuentemente, e anuncio tabatin su impacto. AHATA a ahusta su proyeccion pa e grado di ocupacion pa e prome kwartaal di 33 porciento pa 27 porciento, un reduccion di 6 porciento.

Tin 35 mil asiento aereo menos for di Merca pa e prome kwartaal compara cu 2020. E grado di ocupacion riba e vuelonan lo por ta entre 35 a 40 porciento. ATA como tal a revisa e cifranan y tendencianan, no solamente pa e prome kwartaal di 2021, pero pa restante di aña tambe. Na e momento aki ta tuma un scenario hopi conservativo pa 2021. “Esaki ta ekivalente na un recuperacion di 45 porciento di e cantidad di bishitante cu a ricibi na 2019. E ta representa un total di 515.190 bishitante pa 2021,” Director di ATA a bisa Bon Dia Aruba.

E cifra proyecta total ta refleha e ahustacion cu a haci pa lunanan di Februari y Maart. Pa Februari ta spera un total di 31.492 turista y pa Maart ta spera riba un total di 38.214 turista. E proyeccion revisa pa Februari y Maart ta bou di e scenario conservativo, pero tambe basa riba e proyeccion cu ATA a cataloga como ‘Cautiously Optimistic,’ ( cautelosamente optimista).

Pues a ripara e impacto riba reservacionnan. ATA a nota un adelanto pa e di dos kwartaal, pero tur cos ta mustra cu ta entrante mediante di aña, esta di tres kwartaal cu berdad lo mira e recuperacion. Locual e ehecutivo di e industria turistico di Aruba a bisa ta cu “ta bisto cu tin caba tin hopi interes pa biaha pa Aruba den e ultimo kwartaal di 2021. Pa loke ta demanda y reservacion, Aruba ta keda den e top 3 of 4 di destinacionnan den Caribe cu ta mas popular.”

Ocupacion abao

Manera a mustra, AHATA a baha su proyeccion di ocupacion pa e prome kwartaal. Bon Dia Aruba a compronde cu tabatin momento cu algun hotel tabatin apenas 8 porciento di ocupacion. E pregunta ta e ora si e ta viabel pa un hotel sigui opera. Segun ATA, tin algun momento cu tin hotel cu tin gradonan di ocupacion mas abao. E cifra ta varia, ademas ta varia di hotel pa hotel y ta depende na ki momento ta haci e analisis. “Obviamente ta purba pa pusha e recuperacion mas cu por, pero tin hopi factor externo, cu ta for di nos control y cu ta representa bareranan pa biaha. Esaki no solamente ta conta pa Aruba, pero pa henter mundo.” Aki mester menciona cu e situacion ta uno cu ta keda cambia, pues e implementacionnan por keda adapta di un momento pa otro, cu ta diferente pa cada pais. “AHATA, hunto cu Camara di Comercio a manda un carta recientemente cu diferente punto, cu ta clave pa e sector hotelero,” Ronella Tjin Asjoe Croes a sigui bisa. “Di nos banda ta traha di cerca cu AHATA, pero tambe ATSA pa asina ahusta y/of adapta strategia di comunicacion internacional. Pa asina entre otro, mantene e sector bon informa y bon ekipa cu informacion pa brinda huespednan, e futuro huespednan, pero cu ta datonan cu ta necesario pa nan mesun planificacion y strategia.”

Mester bisa cu e oferta di Airbnb na Aruba ta amplio tambe, y segun ATA, e estadianan tabata reparti entre e hotelnan highrise y lowrise, pero tambe Airbnb. Meste tene cuenta cu hasta unidadnan di timeshare ta ofrece riba Airbnb. Como tal, ta importante pa stimula pa compronde kico ta un ‘Airbnb’ y e diferencia cu otro acomodacion. “Por ehempel, kico ta e diferencia entre Airbnb y Expedia,” ta locual e Director di ATA a splica. Ambos ta forma pa reserva acomodacion.

Workation

Na September 2020, Aruba, cu sosten di ATA a lansa e programa pa promove Aruba como un destinacion for di unda por traha, haciendo uzo di e infrastructura digital. E cantidad di persona cu a haci uzo di e facilidad aki tabata 3 porciento di e totalidad di bishitante, esta 3161. Iniciativanan actual pa e programa aki ta pa amplia e posibilidadnan pa otro mercado, manera Europeo y Canada. “Tambe ta traha, banda di esaki, pa amplia e gamma di oferta pa asina crea iniciativanan pa famianan bin Aruba.” Segun Tjin Asjoe Croes pa logra esaki mester tin e facilidadnan educativo y recreativo pa e muchanan tambe, cu den un caso asina lo mester studia for di Aruba.

Banda di e programa aki, ATA, hunto cu un comision mas amplio ta traha riba un trayecto cu ta carga e nomber di ‘Digital Nomads,’ cu e meta pa introduci estadia mas largo ainda pa esnan cu kier traha for di Aruba, entre otro.

Radisson Blu

E pregunta keda si con hotelnan cu ta habri awor ta impacta e grado di ocupacion total na Aruba y nan influencia riba e industria local, mirando e caida den cantidad di turismo debi na COVID-19. Segun ATA, tur hotel ta competi na tur momento. “Pero, locual semper a sobresali di Aruba ta cu tur a traha semper pa pone e destinacion na prome luga. Pues, e colaboracion cu ATA ta hopi estrecho. Semper ta sali afo, na nivel internacional, como un. Mas hende por atrae pa Aruba, mas demanda tin pa hotelnan cu ta competi e ora riba nan nivel,” Director di ATA a bisa. “E propiedad nobo, esta Radisson Blu ta uno di luho y di bon gusto. Sigur e ta complementa e gamma di producto cu Aruba kier ofrece perfectamente.”

Y Tjin Asjoe Croes ta convenci cu e perspectivanan den futuro ta bon, pasobra “e mundo di turismo y biahe lo bolbe back!”