Crisis Team y Gobierno di Aruba, den nan ultimo analisis di e testnan cu a ser manda Hulanda pa test riba e variantenan nobo, ta confirma cu a detecta 5 caso mas di e variante identifica pa prome biaha na Reino Uni.
E total di casonan awor identifica na Aruba di e variante di Reino Uni di Covid-19 a bira 10 y tambe a detecta 3 caso di e variante di California West Coast.
Tur 13 caso ta fuera di isolacion, pues ningun ta activo mas. Sinembargo nan ta pidi pa un y tur den comunidad pa sigui aplica e reglanan ya conoci manera distanciamento social, uso di tapaboca, y laba man frecuentemente.
Asina mes, na trabao mester mantene distancia adecuado di 1.5 meter di otro na tur momento y haci uso di tapaboca. Ora un persona ta haci su diligencianan, mester ta hopi prudente cu kico e ta mishi, ora cu ta bay sali di cualkier establecimento; laba man cu hand santizer prome cu subi auto. Si e persona tin sintoma, no bay traha, yama dokter di cas pa haci test.
Ta solamente cu solidaridad y disciplina pa cumpli cu e regla y medidanan lo vence e pandemia.
