Cu pandemia Covid-19, hopi sector a wordo afecta specialmente sector laboral y personanan cu nacionalidad stranhero, cu mester di un permiso pa traha na e isla, ta hayando un sla grandi for di departamentonan concerni.
Bon Dia Aruba a tuma contacto cu e hurista y consulting den area aki, Carl Giel, ken a splica cu na e momentonan aki loke tin di haci cu e parti di permiso ta hayando hopi problema.
Pa motibo di pandemia, algun departamento, manera por ehemplo DPL y DIMAS, a cuminsa traha di manera virtual. Aki Giel a expresa cu tin informacion cu no ta bay corectamente y pa e motibo ey, ta nenga e permisonan. Te ainda tin personanan cu a aplica pa permisonan y e departamento DIMAS no ta coregi esaki.
“E relacion a bira impersonal. Antes e personanan tabata bay na balie pa puntra riba nan caso y awor mester manda un e-mail. Hende no ta hayando contesta”, el a expresa.
E trabao pa e departamentonan aki a bira mas y mas y ta causando problemanan den e procesonan di admision, pa un persona por traha mester haci un proceso na DPL y di eynan ta pasa via DIMAS.
Di esaki, Giel a menciona cu for di cuminsamento di aña aki tur compania mester entrega na DPL – prome cu cuminsa cu e proceso di permiso – e documento di registracion di mercado laboral, cu ta trata informacion di e compania, ki funcionnan tin y kico ta status legal di e trahadonan di e compania, salarionan cu nan ta gana, cu ken nan tin contract, etc.
Giel a trece dilanti cu e ta haya esaki como informacion delicado di e compania, cu por wordo considera como confidencial, cu DPL ta pidiendo. Y no ta tur compania kier comparti e informacion ey. E mes a sigura cu el a haya sa for di dos compania cu nan no kier comparti cu DPL e informacion cu nan ta pidi.
Den caso cu compania no ta presenta e informacion manera solicita, nan no por presenta nan permisonan via DPL. Y si no haci e proceso ey, no ta permiti pa e persona por traha cu un permiso di DIMAS.
Ademas, algun dia atras a bira conoci den comunidad un caso di un persona cu tin mas di cuatro aña casa cu un persona di nacionalidad Hulandes, y cu cada biaha cu e mester renoba su permiso ta haya varios incidente. Pa cu esaki Giel a expresa cu for di 2019 gobierno a cambia e maneho pa locual ta trata e tipo di permiso aki. Actualmente si un persona ta casa, mester cana cu e procedura nobo, cu mester haci un afspraak cu DPL via e-mail, e cual ta algo cu ta tuma su tempo, ademas di e procedura di DIMAS.
Den caso aki, for di april di aña pasa e proceso di permiso a wordo tranca masha hopi mes, “pasobra bo no por pidi un afspraak na DIMAS si bo no a cuminsa cu e proceso na DPL ainda, pasobra no sa cuanto e ta bay dura”, Giel a conta.
Pa e proceso di DPL, el a splica cu si un persona tin un compania cu ta buscando permiso pa su trahadonan, e tin cu entrega e documento di registracion di mercado laboral, mester traha afspraak, manda documentonan via e-mail y e proceso aki por tarda aproximadamente tres siman. Mester habri e vacatura, manda e peticion pa por haya e conseho di DPL, den tur e periodo aki e persona no por traha un afspraak cu DIMAS ainda.
“Mas o menos e proceso aki ta tarda casi 7 luna y e ta hopi largo”, Giel a sigura.
Esaki ta causando cu companianan ta kedando sin trahadonan, pa motibo cu nan ta kedando sin permiso. Y varios compania, door di ceramento di oficina di DPL aña pasa, nan trahadonan a keda sin permiso, y pa e motibo aki, algun di nan a wordo deteni pa Guarda Nos Costa y deporta.
Giel a trece dilanti cu den un caso cu e mes a atende, hues a bisa cu si e persona tin por ehemplo, e papel di DPL so, “esey no ta suficiente pa bisa cu nan ta bay haya un permiso. Cu e papel positivo ainda e hues por manda cera e persona”, el a declara.
“E parti na unda e proceso a bira electronico a crea un barera hopi grandi entre publico y e departamento, e mayoria di biaha e e-mail no ta wordo contesta” Giel a manifesta.
Ademas, Giel a declara cu gobierno mester trece un solucion pa e problema aki pa motibo cu nan tin e helpdesk riba e website di DIMAS pero e personanan no ta haya contesta, el a recomenda pa crea algun balienan cu e proteccion debido pa salud di hende vooral den epoca di pandemia pero caminda cu e hende ta bay puntra personalmente pa e status di nan peticion y di e manera ey lo ta miho.
“Mester wak e parti humano y evalua e situacion di con e persona no tin e papelnan completamente na ordo y cu no ta su culpa” Giel a finalisa.
