Sindicalista Eric Henriquez contra huurmento di edificio: SIWA no ta dispuesto pa hala aden su caso di diahuebs awor

Mañan corte lo atende e caso cu sindicato SIWA a entabla contra gerencia di WEB N.V. riba cortamento di salario. Minister Presidente a considera e caso aki como uno crucial cu lo crea un precedente, ya cu lo pone den peliger e fondo di solidaridad y tambe existencia di FASE, hunto cune.

Tanto asina cu si e veredicto lo resulta uno no faborabel pa gerencia di WEB N.V. gobierno no tin otro alternativa cu forsa nan legalmente. Esaki den caso cu empleadonan di WEB no lo sigui entrega boluntariamente. E cortamento aki –segun minister president – ta parti di entrega di salario, como un di e condicionnan cu Hulanda a bin cune den e landspakket.

Caso

Te ayera mainta, sindicato SIWA ainda tabata dicidido pa bay den corte pa bringa su caso contra e gerencia di e compania estatal WEB N.V.

Presidente di SIWA, Eric Henriquez a declara na Bon Dia Aruba cu mañan pa 8or di mainta e caso lo wordo trata den corte. SIWA no ta dispuesto pa hala aden e caso aki bao niun circunstancia. “Manera e ta aworaki, e ta bay sigui diahuebs awor,” el a sigura na e matutino aki. Pero si el a laga sa cu nunca bo sa kico por cambia na caminda. Tabatin acercamento pa busca cierto alternativanan, prome cu e caso aki ta wordo trata den corte.

Igualmente el laga sa cu e parti di FASE no tin nada di haci cu e caso aki, mas bien el a bira un cortina di huma. El a laga sa cu nan no tin problema pa ta solidario, ya cu esey no ta e discusion. Si SIWA gana e caso di mañan, e mes como sindicalista y trahado di WEB ta keda solidario. El a aclaria cu e ta solidario pero na su condicion, y no manera a wordo implementa.

E discusion cu nan tin ta e manera cu e cortamento aki a wordo benta riba e trahadonan di e compania di utilidad aki. “Esey ta haci e cos dificil. Bo ta tum’e of nada. E no ta bay asina!,” segun Henriquez.

E ta haya cu si di banda di WEB, gobierno ta gana e caso aki, nos pais ta bay den un sorto di dictadura, caminda gobierno por haci kico nan kier cu tur otro compania. “Si nos ta acepta esey, lubida!,” el a bisa.

Presidente di SIWA a laga sa cu gobierno tin e instrumentonan huridico pa pone den un landsverordening, ya cu e instrumentonan legal no ta bisa pa sindicato haci’e. Si gobierno lo kier forsa nan legalmente pa sigui entrega di e manera cu nan kier, e sindicalista a declara cu e ta “welcome.” Pero si mester implementa e ley manera cu e ta pa evita problema of discusion.

Eric Henriquez a bisa cu den nos ordenansa huridico ta para con pa anda den situacion asina. Ya cu tin facetanan den ley cu ta splica con gobierno mester a actua. Sinembargo SIWA ta haya cu gobierno no a procede debidamente conforme nos ley. Sino cu nan a procede di corta riba nan salario riba e sistema di dictadura. Y esey SIWA den nomber di e trahadonan no ta acepta. “Nan mester haci’e den ley, manera ley ta bisa y e problema caba. Pero mester tin curashi si…,” segun presidente di SIWA.

Recientemente otro caso crucial cu e compania Romar Trading a entabla contra gobierno – y cu nan a gana – a determina pa cuminsa acepta e peticion pa retira trahadonan di e sector priva. Sindicalista Henriquez di SIWA a laga sa cu dificilmente nos por compara un caso cu otro su impacto den nos comunidad. Ya cu Romar a argumenta problema financiero, pero WEB N.V. no tin niun problema financiero. Te hasta e compania estatal aki a duna gobierno dividendo.

Huurmento y baha gasto

Presidente di SIWA ta di acuerdo cu gobierno caminda nan a pidi gerencia di WEB pa duna cuenta di huurmento di edificio luhoso na beach front y bastante leu di WEB mes. Mientras cu tin otro edificio bashi di Utilities Aruba, cu ta e compania madre di WEB, y cu no lo costa WEB nada.

Mientras cu gobierno ta spera cu su compania estatal por baha gasto mas tanto cu ta posibel. Esaki ta conta pa gastonan di salario di WEB y gasto operacional, manera huur di edificio y leasemento di auto.

Sindicalista Eric Henriquez ta comparti e pensamento aki di Prome Minister ya cu como hefe di gobierno, e tin su derecho pa puntra director di e compania estatal WEB, dicon a yega na e decision di huur e edificio specifico ey.

“E ora e mester por contesta. E ta simpel y e ta berdad. Mi ta di acuerdo cu Prome Minister,” el a bisa. Segun presidente di SIWA no semper e ta den desacuerdo cu Prome Minister. Ya cu tin ora cu e mandatario ta bisa algo manera e huurmento di edificio ey, y e ta haya cu e mandatario tin rason. “No ta cuestion cu tur cos mi ta pleita cune,” el a laga sa.

Pero si presidente di SIWA ya haya un berguensa cu tin edificio di gobierno bashi cu nan a gasta asina hopi placa pa traha nan, y no tin hende pa hinca den nan. E ta haya cu nan ta trece algo asina, nan mester paga tino kico nan ta papia. E no ta splica su mes pakico nan a manda traha e edificionan aki ya cu nan a nifica gastamento di placa so.