Dia 3 di december proximo, Colombianonan por bishita Aruba sin visa

Sra. Miriam Dabian, directora di Turismo pa Aruba na Latino America, a anuncia ayera cu e eliminacion di visa pa Colombianonan cu kier bishita Aruba entrante 3 di december proximo lo ta un echo.

Cu e medida aki, Aruba lo ricibi aproximadamente 20 mil bishita di turistanan di nacionalidad Colombiano pa fin di aña aki y 32 mil turistanan pa 2016, asina directora Dabian a anuncia na medionan di comunicacion na Colombia. “Aruba no solamente ta un destino turistico pero tambe un destino deportivo, cultural y cu un bon oferta gastronomico”  Sra. Dabian a enfatisa.

E anuncio aki ta confirma a declaracion cu Maria Victoria Galan, directora di oficina di Turismo di Aruba na Colombia, a haci afirmando cu Aruba no lo exigi visa pa Colombianonan ora e visa Schengen  wordo elimina. Un par di luna pasa,  Galan a splica den un entrevista cu Reportur.co cu na e momento cu e visa wordo elimina seguramente e turismo pa Aruba lo aumenta teniendo na cuenta e bon oferta di cuponan aereo y disponibilidad di hotel. “Pa 2017, Aruba lo tin un hotel yama “Bahia Principe”  y varios hotel manera Divi ta construyendo mas cambernan.

Ademas e reconoci linea hotelero Hilton a cumpra Radisson, y Barcelo a cumpra Occidental, generando mas oportunidad di crecemento turistico. E mercado Colombiano ta representa  3 porciento di turismo na Aruba. Merca, Brasil, Venezuela y Canada ta e cuater mercado mas grandi na e isla .  Nos ta un mercado chikito pero hopi importante. Na Latino America nos ta e di tres mercado”, asina Galan a enfatisa
Tocante e control di benta, Galan a splica cu nan ta traha hunto cu tres aerolinea reconoci esta Avianca, LAN y Insel Air pa evalua e trabou di e diferente agencianan turistico na Aruba. Di e forma ey, e oficina di Turismo di Aruba na Colombia por recomenda e agencianan na diferente hotelnan na Aruba.  

Riba e pregunta si Aruba lo ofrece un turismo mas grandi manera otro destino, Galan a splica cu e isla ta buscando un mercado turistico di bon profiel y e oferta hotelero no ta asina grandi manera otro destino. Esaki  pa motibo cu Aruba tin 8 mil cambernan di Hotel compara cu otro destino cu ta ofrece mas cu esey. Galan a señala cu Aruba su ocupacion hotelero ta mantene riba di 75 porciento y den temporada halto hasta un 100 porciento. Di otro banda, e oferta hotelero y e cupo no ta duna un margen di prijs hopi grandi pa haci uzo di e ofertanan pa stimula e compra di paketenan turistico pa Aruba.

Relaciona cu e impacto den e benta di pasashi pa Aruba teniendo na cuenta e aumento di e prijs di e dollar, Galan a bisa cu aunke e situacion ey a trece un impacto hopi fuerte riba casi tur mercado  internacional , e consumidornan ta cuminsa custumbra cu e cambio pa motibo cu un par di aña pasa, e dollar tambe tabata na tres mil pesos (moneda Colombiano) y awo Colombia ta den un miho situacion economico cu antes.