Tesla a inverti alrededor di $1.5 biyon den Bitcoin y ta bisa cu tin plan pa cuminsa acepta e criptomoneda como pago pa su vehiculonan luhoso pronto. E prijs di Bitcoin a aumenta 15% na mas di $43mil dialuna.
E fabricante di auto electrico basa na California encabesa pa Elon Musk a revela e strategia nobo den un documento cu e US Securities and Exchange Commission, bisando cu su inversion den moneda digital y otro ‘bienes di reserva alternativo’ por crece.
Bitcoin a aumenta na $43,863 y brevemente tabata lo mas halto den su historia. Accion di Tesla tambe a move bay ariba.
Den su reporte di ganashi di di cuater kwartaal luna pasa, Tesla a bisa cu tabatin cash y ekivalente di cash na balor di $19.4 biyon.
Dan Ives di Wedbush Securities a bisa cu e movida ta duna Tesla ‘mas flexibilidad pa sigui diversifica y maximisa retorno riba su placa’.
Similar na Tesla, MicroStrategy Inc., basa na Virginia, a anuncia na augustus cu lo usa algo di e exceso di cash riba su cuenta pa inverti den bienes alternativo manera bitcoin. E movida a resulta te awo. Te cu dia 2 di februari, e compania di analitica a bisa cu tabatin 71,079 bitcoin cu a cumpra pa un prijs agrega di $1.15 biyon desde ultimo berano. Usando e balor actual di $43mil, e bitcoin ey tin balor di $3.06 biyon.
Accion di MicroStrategy a aumenta 660% desde e anuncio na augustus, pero e accionnan ta suceptibel na cambionan den e prijs di bitcoin. Nan tabatin un aumento di 15% den intercambio merdia ayera despues di e anuncio di Tesla.
Tesla, basa na Palo Alto, a reporta su prome net profit anual na 2020, y su stock a eleva pa hacie e fabricante di auto mas valioso di mundo. Tesla a join e S&P 500 na fin di aña pasa y actualmente ta balora na mas di $820 biyon.
Mientras den ultimo dos aña companianan a adopta e tecnologia cu ta sostene monedanan digital manera Bitcoin, un concepto conoci como e blockchain, e usonan actual di Bitcoin no a cambia hopi desde su rally tres aña atras. Ainda principalmente ta ser usa pa esnan cu no ta confia sistema bancario, criminalnan buscando pa laba placa, y den su mayoria, pa warda balor.
Pero e domino por cay si companianan mayor sigui liderazgo di Tesla y cuminsa acepta e moneda digital como pago.
Ives a bisa cu ‘e movida aki por pone mas momentum riba accionnan di Tesla mientras mas inversionista ta cuminsa balora e exposicion di e compania na bitcoin/crypto como parti di e valuacion general.
Accion di Tesla a aumenta casi 2% na $867.87 den intercambio merdia.
Criticonan ta bisa cu benta y ganashi di Tesla ta minusculo compara cu fabricantenan di auto estableci, manera Toyota y General Motors, y su valuacion enorme no ta hustifica pa fundamentalnan financiero.
