Pakico ni gobierno… Ni oposicon ta papia cla…

Definitivamente tin diferencia entre Aruba y nos isla ruman Corsou, riba diferente tereno. Entre otro tambe den cultura politico, unda e debate ta tuma lugar un poco mas transparente cerca nan, mientras aki pa motibo desconoci ni gobierno ni oposicion ta atende e asuntonan candente cu e transparencia necesario. Como ehemplo nos por duna un tipo di mensahe digital politico critico cu a aparece aya, den cual ta bisa cu “Hulanda ta bay corta 20% den aparato publico.” Tambe cu “Sea ta baha gasto o cranchi di cen ta cera”. Ademas cu “lo mishi cu duurtetoeslag”, y cu “lo midi prestacion di ambtenaarnan y salario colectivo di ambtenaar ta bao di lupa”.

Parti di loke ta bisa aki ta conoci cerca nos tambe, pero aki ni gobierno, ni oposicion ta papiando di e medidanan cu ta biniendo den nos direccion. Na Corsou ta papiando abiertamente di un reduccion di 20% di salario, mientras cu dificultad aki na Aruba ta tribi bisa e sindicatonan cu ta representa ambtenaar cu e 12,5% di aña pasa ta keda mescos, nada di entrega back. Pero un mucha cu mester bay educacion secundario ainda por conta cu gobierno no ta gana guera cu esey. Si na Corsou, unda tin menos ambtenaar cu na Aruba, mientras nan tin un poblacion mas grandi, ta papia di corta mas ainda den salario, pakico aki tur cos ta keto? Logico cu como respuesta partidario ta bisa nos cu “eseynan ta rumor solamente”. Esey por ta e caso, pero e ta un rumor cu ta completamente creible si nos ta mira e diferencia abismal entre entrada y gasto pa 2021 di gobierno, unda ademas tin e advertencia di Hulanda cu no ta bay duna e mesun apoyo manera na 2020. Cu otro palabra: bay wak kico boso mes ta bay haci pa e aña aki… Y kico ta sucede? Nada, nos por sinta warda te fin di februari pa haya presupuesto, pa nos mes sinta coba wak unda e medidanan ta scondi. Y esey si acaso e presupuesto keda cla pa bay parlamento na fin di e luna aki, sino maart ta habri nos sin cu nos sa ki rumbo e pais aki ta tuma.

Cu gobierno ta defende su interes, bon comprendi, di keda keto tocante e detayenan, nos por comprende aunke nos no ta di acuerdo cu esey ta e manera di actua, ademas di cada tanto tempo gaba tambe tocante ‘transparencia’ den gobernacion; pero cu oposicion tampoco ta pone presion pa gobierno duna claridad unda nos ta bay, esey si nos no ta comprende. A menos cu… nan tampoco tin gana di toca e temanan aki, pasobra nan ta considera cu nan no tin nada di gana cu esey. Esey nos por comprende, y pakico? Pasobra ta un hala di asunto ta bin halto ora cuminza contempla kico por haci cu e gastonan di gobierno, sigur y primeramente esunnan di personal, pa cual nan tambe ta carga responsabilidad pa e hecho cu awe nos ta hinca cu e problemanan ey. Problema di e multiple privilegionan cu e empleado publico ta goza, cu ta contribui no solamente na mas gasto pero cu no ta yuda productividad tampoco. Bon ehemplo di esaki ta e famoso ‘ATV-dagen’. Tempo cu gobierno, di otro color, no tabata desea ni tabata por a honra exigencia di aumento di salario di empleado publico na placa, a inventa dia di vacacion extra pa empleado publico. Esaki tabatin como consecuencia cu mas di dos siman di trabao a simplemente desaparece. Cada empleado publico, ademas di condicion di vacacion bastante mihor cu sector priva caba, ta ausente un extra dos siman por lo menos. Y kico tabata e efecto di tur esaki? Cu trabao ta keda benta, pasobra no tin suficiente trahador presente, a menos cu reorganisa y mehora procesonan di trabao, loke semper ta topa cu un resistencia fuerte di sindicato y parti di e empleadonan. Consecuencia? Un oportunidad unico pa aumenta personal, loke a duna e mandatario di momento mas oportunidad pa pone su hendenan den puesto lucrativo den gobernacion. Y niun hende por critica, pasobra supuestamente ‘e ta diligente, e ta atendiendo e problema di escasez di trahador’ hopi bon… Unico problema ta cu aña pasa tur esaki, henter e structura insostenible aki, a bin abao di un solo tiro pa via di Covid-19. Loke ni critica, ni sano huicio por a logra, a ser logra pa e pandemia… ‘No hay mal que por bien no venga’… Awor si ta mas cu cla cu tin hopi cos cu mester cambia. Y, anto, kico asina ta e asuntonan cu por bay cambia? Elimina e ATV-dagen, kita e famoso articulo 25 di LMA, cu ta duna posibilidad pa duna hende privilegia cerca di e ministronan pa haya un extra 25% riba nan salario, entre otro. Ainda tur esey no ta trece suficiente alivio financiero, y lo mester contempla baha salario mas ainda. Nos no ta bisa cu e tabay ta e 20% di cual ta papia na Corsou, pero ta un hecho cu gobierno di Aruba tin problema mas serio cu Corsou, pasobra mayoria di e mas di 8.000 salarionan cu mester paga tur luna, t’ey ainda. Y esaki ta fruto di mal gobernacion di tur gobierno. Ta p’esey ningun no kier papia.