Lider di fraccion di AVP Marlon Sneek, durante conferencia di prensa a mustra cu ta inaceptabel cu gabinete Wever Croes kier usa WEB Aruba NV, como cabay di campaña, dunando riba dje mal informacion na comunidad riba un supuesto acuerdo firma entre e compania estatal y Eagle LNG siman pasa.
Segun sr Sneek tur hende por a mira un show mediactico caminda e compania Eagle LNG firmando contractnan y tambe por a mira articulo di gobierno den corant, bisando cu ta bisa: ‘Gas pa WEB; determinante pa WEB y economia di Aruba.’
“Aki tin cu mustra cu e receiptnan cu tin na WEB Aruba NV, ta inversion y visionnan cu a cuminsa bou di gabinete Mike Eman, caminda a cumpra receiptnan cu ta usa e ‘heavy fuel’ cu nos tin aworaki, como fuel pa produci awa y coriente y cu na mes momento por wordo cambia pa wordo usa cu gas.
Mester corda cu esaki tabata un proyecto cu a cuminsa hunto cu Gas Unie di Hulanda y caminda ora e gobierno aki a sinta, cu Prome Minister Eelyn Wever Croes den dos bishita na Hulanda, Gas Unie a buscas forma pa reuni cu su persona, el a manda bisa e compania Hulandes cu su agenda ta mucho yen.
Prome Minister a invita representantenan di e compania pa bin Aruba pa aki e sinta cu nan pero ora cu nan tabata na Aruba, Evelyn a bisa nan mesun cos, cu su agenda ta yen y cu e no por sinta cu nan.
Gabinete Wever Croes a boycotea e proyecto aki e tempo ey ora cu kier a cuminsa c’un proyecto hunto cu Gas Unie pa tin algo di entendimento entre Reino, gobierno aki a kibra e proyecto, mesun cos cu nan a haci cu CITGO caminda a laga e compania aki bay cu 350 miyon florin, simplemente pa motibo cu ta proyectonan di gobierno di AVP.
A haci esaki pa simplemente hunga politica barata pa bisa cu AVP a haci mal trabou pero kico por mira awe, e Director di WEB Aruba NV mes ta Sali bin dilanti y aclaria loke tanto gobierno y Eagle LNG a insinua, bisando cu “no tin ningun acuerdo entre WEB y Eagle LNG,’ su supuestamente gobierno y Parlamento, a alaba asina hopi.
Por a mira tambe Parlamentarionan di MEP sinta na grandi na mes cu e grupo aki, haciendo entrevista, elogiando e compania aki pa loke a wordo firma y cu e tremendo proyecto aki, y ta bin resulta cu ta otro mentira di e gobierno aki.
Pa e motibo aki tambe fraccion di AVP a dirigi un carta na gobierno, mustrando e Prome Minister bon cla, cu 30 di November 2020 ora cu el a anuncia publicamente cu campaña a cuminsa, esey ta nifica cu ta ‘afscheidbeleid’ loke ta nifica cu cualkier acuerdo cu gobierno yega na dje y cu ta perhudicial pa nos compania estatal, esaki lo wordo kibra.
Ta imposibel cu abo ta sinta haci grandi, hunga show, haci campaña politico pa crea e impresion cu por fin bo a logra un proyecto pa e pais, anto e compania estatal cu ta esun responsabel cu mañan ta financieramente responsabel tambe, ya cu ta nan tin cu bay paga pa e fuel si nan cumpre, nan mes no ta na altura di e acuerdo cu gobierno ta showcase.
WEB mes no a firma nada cu Eagle LNG anto gabinete Wever Croes si ta bisa cu tur cos ta firma cu tur cos ta cla, pues e shownan mediatico aki, usamento di companianan estatal como cabay di campaña, mester caba.
Pa tal motibo nos a presenta un carta na Presidente di Parlamento den cual nos ta pone Prome Minister na altura cu AVP lo pone su personalmente tambe responsabel pa cualkier daño financiero cu e contract aki lo por tin pa pais Aruba of pa e compania estatal WEB Aruba NV.
No ta aceptabel den 2021 cu e tipo di wega politico aki ta wordo hunga, simplemente pa crea e impresion cu nan ta haciendo algo, simplemente pa bende pueblo cu pronto ta bay tin mas trabou, cu pronto lo bay tin awa y coriente mas barata, simplemente pa gaña pueblo, mescos cu nan a bisa cu nan lo baha edad di pensioen, mescos cu a bisa cu no ta bay paga placa di scol mas, cu lo busca fuel for di otro pais pa prijs di awa y coriente lo bira mas barata, awe pueblo por mira cu ta mentira tras di mentira.
E anuncio di acuerdo entre Eagle LNG cu WEB ta otro mentira mas fabrica pa purba crea un impresion positivo ya cu e gabinete Wever Croes no tin nada positivo.
Unico cos concreto cu e gobierno aki por bisa pueblo ta cu “no por” y nunca kico “si por,” anto por mira cu ta haci uso di un compania estatal pa purba di crea e impresion cu nan ta bezig cu algo pa crea cupo di trabou.
Mesun tactica cu gobierno usa un compania cu awor sigur lo bay habri e refineria y cu nan tin biyones pa inverti pero ta bin resulta cu awor e compania aki ta bay busca un operado pa e refineria y te dia di awe nada a tuma luga y solamente otro mentira ta keda pa pueblo,” lider di fraccion Marlon Sneek a declara.
