Prome minister Australiano a bisa cu el a tene un reunion ‘constructivo’ ayera cu e cabesante di Google despues cu e gigante di tecnologia a menasa cu retira su motor di buskeda for di Australia pa motibo di plan pa pone plataformanan digital paga pa noticia.
Prome minister Scott Morrison tambe a elogia e sosten di rival di Google, Microsoft, cual a elogia e leynan proponi na Australia cu lo pone Google y Facebook paga como un ehemplo pa resto di mundo.
Sundar Pichai, hefe ehecutivo (CEO) di Alphabet Inc. y su subsidiario Google, a inicia e reunion online cu Morrison pa discuti e propuestanan di ley cu a keda introduci den parlamento na december.
“Mi ta kere e tabata un reunion constructivo”, Morrison a bisa. “Mi ta kere mi a logra duna nan e miho señalnan cu lo mester curasha nan pa participa den e proceso.”
Director regional di Google, Mel Silva a bisa un audiencia di Senado luna pasa cu e compania probablemente lo haci su motor di buskeda no disponibel na Australia si e asina-yama News Media Barganaining Code forsa Google y Facebook pa paga pa noticianan Australiano.
Google no a splica con lo exclui Australianonan ni for di ki servicionan.
Un comite di Senado lo reporta na gobierno riba su revision di e propuesta di legislacion dia 12 di februari proximo.
Morrison a bisa cu e tabata cla cu Pichai cu ‘Australia ta pone e reglanan pa con e cosnan aki ta opera’.
“Nos a discuti algun detaye specifico di elementonan di e codigo y a discuti e asuntonan aki, mi ta kere, hopi respetuosamente”, Morrison a bisa. “Pero mi ta kere cu nos a logra bay den un espacio hopi mas positivo tocante e habilidad di continua proveyendo servicionan aki na Australia.”
Google a nenga di duna comentario riba e reunion.
Mientras Google y Facebook a condena e legislacion como algo cu nan no por traha cune, presidente di Microsoft, Brad Smith a bisa cu su empresa lo ta dispuesto pa paga pa noticia si su motor di buskeda aumenta su share den e mercado.
E ley inicialmente lo aplica solamente na Google y Facebook, pero gobierno den futuro por añadi otro plataformanan si Google bandona Australia.
Maske Bing ta e segundo motor di buskeda mas popular na Australia, e tin apenas un 3.6 share den e mercado. Google ta bisa cu e tin 95%.
Smith a bisa cu Microsoft lo inverti den Bing na Australia pa mehora su calidad pa asina e ta igual na Google manera e tabata na Nort America y Reino Uni.
“Esaki ta un oportunidad, si hende usa Bing of no, pa pone un reclamo riba e tereno pa duna sosten na e importancia di noticia y editornan, y rectifica loke ta un berdadero imbalans, ban bisa, entre buskeda y tecnologia y noticianan tradicional”, Smith a bisa ABC. “Nos ta aplaudi gobierno pa tuma e sorto di stap aki. Mi ta kere e ta necesario, no solamente na Australia pero na otro luganan tambe”, el a agrega.
Tecnologia tabatin dos ‘efecto adverso riba e salud di democracia’ – esta transmision di desinformacion y socava e fundacion economico di medionan noticiero, el a bisa.
