Un di e palabracionnan den cuadro di ayudo financiero (Landspakket) entre Aruba y Hulanda ta pa haci un doorlichting di nos sistema di enseñansa. Ministerio di Educacion, Ciencia y Desaroyo Sostenibel a bay di acuerdo cu e palabracion aki y tambe ta dunando full cooperacion pa logra un resultado cu lo tin beneficio pa sigui desaroya, fortifica y mas cu claro tambe innova e sistema di educacion di Aruba, segun e siguiente comunicado di gobierno.
Motibo pa inclui un palabracion encuanto Enseñansa den landspakket
E importancia di educacion na un nivel adecua ta un meta comun di Aruba y Hulanda. Den e Landspakket ta indica cu tin indicacion cu tin varios faceta di enseñansa na Aruba cu no ta cana bon. Ta wordo menciona entre otro: nivel di maneho di scolnan cu no ta consistente, un falta di conexion entre sector laboral y enseñansa, falta di metodonan di educacion moderno y tiki espacio den e presupuesto pa haci reformanan y/of innovacion posibel.
Metanan a largo plaso di e doorlichting:
1. pa realisa un nivel adecua (basiskwaliteit)di educacion na Aruba;
2. pa realisa un conexion solido entre e sector priva/laboral y e sistema di educacion;
3. pa percura cu lo por sigui enseñansa avansa den diferente sistema di educacion (entre otro na Hulanda)
Instrumento
E instrumento cu lo wordo usa pa e doorlichting ta un investigacion riba nivel macro di nos sistema di enseñansa. A wordo palabra cu e investigacion lo concentra riba e sistema di maneho den enseñansa ‘governance’ y tambe riba calidad di e sistema. E investigacion lo mester start na maart 2021.
Cua instancianan ta wordo investiga?
Como cu ta un investigacion riba nivel macro e ta inclui tur stakeholders cu ta parti di e sistema di enseñansa. Den e prome fase di investigacion lo concentra primeramente riba investigacionnan existente y di cua e resultadonan a wordo valida pa expertonan na Aruba. Aki ta referi na investigacionnan di entre otro, e temanan manera proceso di subsidio, contenido di maneho, control y supervision, idioma den enseñansa, resultado di studiantenan na Aruba y den exterior, y tambe calidad di enseñansa en general.
Ken ta haci e investigacion?
E team cu lo ta encarga cu investigacion lo ta, segun palabracionnan, un team cu tin persona di Aruba y otro paisnan den Reino como miembro.
Kico ta spera di e resultadonan?
E resultadonan mester duna bista riba e direccion cu nos enseñansa mester bay den e proximo decadanan teniendo cuenta cu loke ta sostenibel y financiabel door di Pais Aruba. E impacto di e sistema di Enseñansa riba nos sociedad no por wordo mira di biaha, p’esey ta papia di inversion den enseñansa. Pa e motibo aki mes no por prepara hobennan pa loke nos conoce awor como sociedad pero pa loke e sociedad lo bira den futuro.
