Durante e splicacion extenso cu gabinete a duna ayera tardi logicamente a bin hopi punto dilanti, cu ta indica cu awor si e asunto ta bay pa serio y e ambiente en general tabata refleha esaki tambe, sin e usual bochincha. Aunke den e promer fase mayoria di e accionnan ta orienta riba evaluacion y analisis, despues di cual lo bin e propuestanan concreto, cu mester ta carga pa gobierno di Hulanda y Aruba. Finalmente, tur cos cu ta requeri ley nobo o cambio di ley lo mester pasa den e proceso di aprobacion parlamentario, aunke e posibilidadnan pa desvia di e propuestanan di ley ta limita,y e consecuencianan lo ta grave.

E tramitenan legal lo tuma tempo, hasta si logra haci e procesonan aki mas diligente. Y tin varios cambio di ley cu lo mester tuma lugar a corto plazo caba. Ehemplo di esaki ta e cambionan cu awor si ta bay tuma lugar riba tereno laboral. Scuchando e mandatario encarga cu e cartera aki, por a deduci cu flexibilisacion di ley di retiro lo ta un di e asuntonan pa atende. Aunke cu den e palabranan di e ministro nos por a scucha cu te na e crisis di Covid-19 su maneho firme tabata pa no permiti ningun flexibilisacion, awor si den e cuadro di e acuerdo aki e flexibilisacion ey ta bay bira realidad. Esey lo no ta na agrado di e sindicatonan di sector priva, pero no ta parce nos un asunto evitable, y cu tin su bandanan menos grave. Den e Uitvoeringsagenda ta menciona explicitamente e aspecto di contrato di corto duracion. Esaki lo encera probable abolicion di e prohibicion di contrato di corto duracion, mientras tambe lo ta pensando den agilisacion di e ley di retiro mes. Pa loke ta e promer, nos no ta considera esaki como un perdida asina grandi, pasobra desde su institucion na 1992 e no a resulta den un proteccion pa e trahador local. E excepcionnan den e prohibicion, mas e falta di supervision adecua di autoridadnan laboral, ta haci cu e articulo aki den nos Codigo Civil no a resulta den tanto proteccion. Ademas, e otro islanan no conoce e articulo aki y nunca a bira un issue pa trahador y nan representantenan sindical den ultimo casi 30 aña. Di otro banda, nos no mester lubida cu e otro instrumentonan di flexibilisacion tipicamente Hulandes, manera uitzendbureau y ‘nulurencontract’ ya ta parti di nos realidad caba y tin amplio uso den nos economia.

Otro asunto lo ta e agilisacion di e proceso di retiro segun e ley di retiro. Aki lo mester cuminza cu kita e prohibicion ilegitimo di no tramita e peticionnan. Tambe mester ta posible pa haci e proceso mas cortico, ya cu na e momento aki e proceso via director di Labor, cu dos ronda di consulta di empleado y dunador di trabao cerca e comision cu ta trata e peticionnan, ta resulta hopi biaha un ruta bastante largo. Aki talvez tin posibilidad pa no tanto flexibilisa, sino agilisa e proceso. Nos no ta kere cu nos ta bay haya situacion manera ta existi na Merca, unda retiro ta hopi mas facil, pasobra di tur manera nos legislacion laboral, y leynan en general, no por ta asina diferente di loke ta legislacion den e otro partinan di Reino.

Un di e temanan cu practicamente tur orador den e reunion ayera a toca tabata e asunto di e 5 miyon florin pa luna cu mester austerisa den presupuesto di AZV. Nos ta laga e discusion un banda ta con a yega na e propuesta aki, y ta enfoca mas riba e hecho cu, si no tabata na su lugar pa corta tanto den AZV, anto tabata na gobierno pa argumenta esey. Hecho ta cu a bay di acuerdo y no a propone un alternativa, pasobra lo por a corta otro caminda, tanto dentro di sector di salud como den otro gasto di gobierno di Aruba. Envez di tur e lamentonan cu nos ta haya tende awor, lo ta bon si e consulta cu e partinan interesa di e sector tuma lugar pronto y cu por yega na proposicion sensato. Un cos si, no ta scapa di cierto austerisacion, cu consecuencia pa salud en general.

Tabata remarcable e tono modera di oposicion durante e reunion, cu ta duna e impresion cu nan tambe ta consciente cu, si ta nan tabata den e posicion di gobierno, lo tin aki aya cos cu nan por a haci diferente. Sin embargo, e realidad di e crisis economico profundo, mas e imposibilidad pa bati na otro porta pa ayudo, ta haci cu no tin otro caminda di cana cu esun aki. Loke si tambe ta un realidad ta cu finalmente e partnernan, gobierno di Aruba y Hulanda, a cuminza comprende otro y ta parce posible pa tin un base di colaboracion, cu e bien comun di Aruba na promer lugar. Un aspecto refrescante di e reunion ayera tabata e tono modera cu tur hende tabata aplica, completamente diferente di e voznan guerrero cu nos tabata scucha algun tempo pasa ainda, acusando Hulanda di tur tipo di maldad. Ta di spera cu di ambos banda di sala lo no tin oido tampoco pa e gritonan di guera cu por scucha den e dianan aki den medionan social.