Mester aumenta eficiencia di sector publico door di reduci e totalidad di salario publico den liña cu e promedio Caribense di 10 porciento di e Producto Bruto Nacional, ademas di reduci e gastonan di sector publico en general.

Segun calculacionnan pre-Covid, e gasto publico total riba e Producto Bruto Nacional di Aruba, ta 12 porciento. A baha 12.5 porciento di e salario y beneficio di trahadonan publico caba, pero e Producto Bruto Nacional tambe a cay drasticamente, te na 3992 miyon post-Covid.

Alabes mester aumenta calidad y efectividad, incluso poder di implementacion di e sector publico. Aruba lo mester percura pa continuidad di procesonan vital, entre otro, electricidad, provision di combustibel, internet y servicio di data, produccion di awa, maneho di aviacion, actividad maritimo, trafico di pago, servicionan di asistencia y comunicacion entre nan y instancianan medico. E trayecto aki ta continuo.

Revision

Lo tin un revision integral di tur compania publico y semipublico y entidadnan di Gobierno pa determina legitimidad di e hecho cu tur accion ta den man publico. E pregunta mester ta si e companianan aki ta sirbi interes publico. Ademas lo midi nan efectividad, pues si nan ta logra nan meta. Lo desaroya proposicion y implementa paso pa percura cu nan ta logra nan efectividad. Hulanda y Aruba lo haci esaki pa dia 15 di april. Lo pone prioridad cua compania publico y/of entidad lo ta e prome pa pasa den e revision.

Aviacion

Lo traha na fortificacion di e sistema di aviacion den contexto di Reino, basa riba investigacion existente y of adicional. Aki ta papia di entre otro un cooperacion mas intenso entre e entidadnan y e organisacion di procesonan di trabao uniforme, segun exigencianan di siguridad internacional, defini pa e organisacion mundial di aviacion civil ICAO unda ta enfoca riba eficiencia y reduccion di gasto. E analisis di cooperacion pa duna oportunidad mester ta cla pa dia 1 di juli 2021. E cooperacion ta existi caba, pa medio di protocolnan di cooperacion. Segun e Minister encarga, Chris Romero durante reunion di Parlamento ayera, locual ta bay sucede ta cu un ta bay complementa e otro. Y Aruba cu tin un aeropuerto di categoria 1 lo tin hopi experticio y di comparti.

Aparato publico

Mescos cu ta e caso cu entidadnan publico y companianan di gobierno, lo bin un revision integral den e sector publico, esta e organisacion Gubernamental. A base di e analisis aki lo bin desaroyo di proposicion y plan di implementacion pa mehora calidad, eficiencia y efectividad di e aparato publico, bao cua tambe ta cay e eficacia di e personal cu ta cay directamente bao di Ministernan. E revision lo no sucede den e periodo aki, sino a keda movi pa e siguiente agenda di ehecucion.

Exploracion di posibilidad di un pool di legislacion pa e fortificacion temporal di e funcion legislativo di Aruba. E plan ta pa esaki ta na su luga pa dia 15 di maart. E pasonan cu mester sigui lo keda formula den e plan di accion.

Investigacion comparativo condicionnan di trabao

Tambe lo propone y implementa procesonan pa spaar riba e condicionnan di trabao primario, secundario y tercero, manera overtime, areglo di dia liber, bonus, compensacion, biahamento y compensacion pa biahe. E cambionan lo ta basa riba investigacion. Ya caba tin un destaho cla pa haci e trabao. E pasonan cu ta sigui ta depende di e resultado di investigacion, cu mester ta cla pa 30 di Juni. Hulanda ta encarga cu presenta e reportahe pa 1 di juli, 2021.

Den cuadro di un esfuerso personal optimal, lo investiga e formacion, ocupacion y presencia real ademas di e funcionamento di trahadonan publico y di organisacionnan publico. Si acaso e trahadonan ta ricibi salario inhustamente, dependiendo e situacion, lo tuma pasonan, manera paro di salario y institucion di un trayecto di retiro. Den otro palabra, si trahadonan ta ricibi un salario cu no ta cuadra cu locual nan merece, dependiendo di e situacion, lo tuma medida, pues sea ta para e salario of hasta ta cuminsa e procedura di retiro. Tambe lo desaroya un maneho dirigi na baha y maneha gastonan di trahadonan temporal. Pa loke ta experticio, ya caba a pone un limite di 130 porciento di e salario pa ora di Prome Minister.

E prome analisis riba ocupacion actual ta pa mei 1 y ta determina e siguiente pasonan.

Pero tambe mester investiga e cuadro huridico, particularmente e posibilidadnan pa elimina persona, basa riba e Landsveroderning Materieel Ambtenarenrecht, LMA. Esaki tambe mester ta cla pa Mei 1.

Januari 1, 2022

DRH, esta Direccion di Recurso Humano, lo pasa den un revision pa mehoracion. E funcion di un Recurso Humano adecuado y bon ekipa ta un di e rekisitonan pa ehecucion di e condicionnan. E investigacion riba funcion di DRH lo ta dirigi pa determina e meta y ‘scope’ di e departamento. E obhetivo ta cu ta bin un maneho strategico di personal, cu ta inclui planificacion, evaluacion di produccion, introduccion di un maneho di prestacion (gratificacion segun merito) den e aparato publico, limitacion di politica den asuntonan di personal. E nivel di analisis mester keda determina e siman aki y e investigacion mes lo haya su forma dia 15 di maart. E proceso di pago segun merito mester ta cla pa keda implementa pa 1 di januari, 2022.

Digitalisacion

Y pa mehora e calidad y eficiencia di servicio publico, e proceso di digitalisacion unda cu por lo mester keda implementa. Dia 15 di mei mester tin un bista di e adaptacionnan posibel y ta tarea di Aruba. Pa 1 di juli mester tin un lista di tur e departamento y servicionan cu ta mara na e sistema digitalisa, incluso pa e procesonan di permiso.

Pa loke ta huurmento di edificio, tambe lo tin investigacion pa e necesidad y costo, y con ta bay baha esakinan. Anteriormente, Hulanda y Aruba a acorda riba e obhetivo pa yega na un reduccion di 20 porciento den 5 aña. Analisis di e aspecto aki lo bin den e siguiente agenda di ehecucion.