E parti Caribense di Reino ta cla prepara pa – manera plania- inicia cu vacuna contra COVID-19 aproximadamente 15 di februari 2021. RIVM ta prepara pa manda e prome lote di e vacuna. Pa Saba y Sint Eustatius ta trata di un prome entrega di e vacuna Moderna. Pa Boneiro y e paisnan Corsou, Aruba y Sint Maarten ta trata di e vacuna di BioNTech y Pfizer den e prome fase aki.
Tur a traha duro
Durante di e consulta di 4 Pais (Vierlandenoverleg), Minister Zita Jesus-Leito (Corsou), Minister Danguillaume Oduber (Aruba), Minister Richard Panneflek (Sint-Maarten) y Secretario di Estado Paul Blokhuis (Hulanda) a confirma cu nan ta bay ofrece tur adulto den e parti Caribense di Reino e oportunidad pa wordo vacuna contra di COVID-19. E mandatarionan hunto cu e experto di vacunacion Marc Sprenger a confirma cu hopi persona riba tur e islanan ta trahando duro pa ta cla na tempo pa implementacion di e programa di vacunacion y cu ta duna speransa cu e prome lote di vacuna lo por wordo entrega aproximadamente 15 di februari. Cu esaki ta reina e perspectiva cu lo tin un fin na e crisis di corona pa e parti Caribense di Reino tambe. Ta e intencion cu e campaña di vacunacion riba tur isla y paisnan den e parti Caribense di Reino ta cla prome cu temporada di horcan cuminsa.
Experto special di vacuna
Bou di encargo di Secretario di Estado Paul Blokhuis (VWS), experto special dr. Marc Sprenger (anterior DG RIVM) ta asisti e islanan y paisnan den e parti Caribense di Reino pa cuminsa na tempo cu vacunacion. E experto special di vacunacion hunto cu RIVM a bishita tur e islanan pa delibera tocante e progreso cu tur esunnan concerni riba e islanan. E aparatonan necesario ta entrega y e personal necesario ta di train den “cold chain” y maneho di vacuna. E experto di vacuna y RIVM a stipula algun punto di accion pa cada isla. Si tene cuenta cu esakinan, e programa di vacuna por cuminsa.
Moderna y BioNTech/Pfizer
Na Boneiro, Corsou, Aruba y Sint Maarten ta ofrese e vacuna BioNTech/Pfizer na personal den cuido y personanan riba 60 aña den e prome fase di vacunacion.
Pa traha di forma eficiente y pa evita desperdicio di vacuna te na un minimo, lo ofrece riba e islanan mas chiki Saba y Sint Eustatius e Moderna vacuna den 1 biaha na tur adulto. E vacuna den e prome fase lo wordo entrega den diferente secuencia y distribucion.
