Venezuela tin pa haya entre 1,4 y 2,4 miyon vacuna di AstraZeneca contra Covid-19 por medio di e sistema Covax, cu lo yega na februari, asina e mision di WHO na e pais a informa ayera.
“Venezuela tin acceso na vacuna den e mecanismo Covax. A reserva entre 1.425.000 y 2.409.600 dosis di vacuna AstraZeneca (…),” segun Paolo Balladelli, hefe di mision di WHO y PAHO na Venezuela.
E mecanismo Covax a ser crea pa garantiza distribucion di vacuna na e paisnan mas desfaboreci, y ta dirigi pa WHO, Alianza pa Vacuna Gavi y e Coalicion pa Promocion di Innovacion pro Preparacion pa Epidemia (Cepi), pa suministra vacuna pa por lo menos 20% di e poblacion di cada pais participante.
Venezuela ta figura entre e 37 paisnan di Latinoamerica y Caribe cu lo ricibi vacuna a traves di Covax. “Ta imprescindible conta cu e apoyo di tur forza y procede cu e pago pa 9 di feruari,” Balladelli a detaya.
No ta cla ainda di unda e fondonan lo sali pa paga e vacunanan. Regimen di Nicolas Maduro, den e actual crisis economico mas grandi di su historia reciente, no tin acceso na e reservanan di e pais den exterior. Asamblea Nacional, esun ilegitimo di Nicolas Maduro, a pidi na januari pa libera e fondonan bloquea pa por cumpra vacuna.
Maduro ya a acorda cu Rusia e adquisicion di 10 miyon vacuna Sputnik V y a bisa cu ta spera cu e vacunacion masivo na Venezuela por inicia na april, siendo “optimista”.
Miguel Pizarro, Comisionado pa Nacionnan Uni, a expresa su apoyo pa Venezuela drenta e sistema Covax, cu e condicion cu ta crea “un programa di vacunacion crea pa sociedadnan medico” y “un acuerdo cu ta permiti UNICEF y PAHO ehecuta e programa”.
