Durante e conferencia di prensa di Gobierno di Aruba dialuna mainta, Prome Minister Evelyn Wever-Croes a elabora riba e situacion actual pa cu Covid-19. Comienso di aña tabata uno hopi preocupante mirando cu Aruba a drenta e di 3 ola pa cu e pandemia aki. Januari a habri cu 280 caso activo y a subi te na 624 pa mita di luna, pero afortunadamente a logra controla esaki y bahe na 342 caso activo pa final di luna. Otro caso cu a causa hopi panico den comunidad ta na momento cu dia 25 di Januari Aruba a constata e variante Ingles.

E dos indicadornan mas importante pa cu e maneho di e virus aki ta e cantidad di casonan pa dia cu awe ta na un averahe di 35. Pesar cu e ta menos cu den transcurso di Januari e ta keda preocupante. E di dos indicador ta e ocupacion den hospital cu a cuminsa na Januari cu 7 persona y a subi te na 34. Un cantidad cu Aruba no a mira desde september 2020. Afortunadamente e cantidad aki a baha y awe tin 18 persona interna den hospital. E situacion pa cu cuido intensivo tambe tabata preocupante mirando cu comienso di luna a habri cu 2 persona den ICU y a subi den transcurso di luna te na 12 cu ta un total halto pa un isla chikito manera Aruba. Actualmente tin 10 persona den ICU.

Na luna di januari, 20 mil test a ser ehecuta di cual a resulta den un total di 1500 caso positivo pa cu Covid-19. E mesun luna aki a constata tambe un total di 10 morto pa motibo di Covid-19, cu tambe ta un cantidad halto pa Aruba. Den nomber di Gobierno di Aruba,Prome Minister ta manda condolencia na famianan di e fayecidonan.

Mirando cu Aruba tabata drentando den e di 3 ola pa cu e pandemia aki, Gobierno mester a aplica reglanan di orden publico mas estricto, cu na principio lo mester a keda na vigor te cu 31 di Januari. Mirando e situacion ya pa por tin un miho bista specialmente cu e entrada di e variante Ingles, Gobierno a tuma e decision pa prolonga e medidanan aki cu un siman mas.

 

Januari a trece hopi reto y preocupacion pa Aruba na unda mester a prepara pa un di 3 ola. Mester a pone personal disponibel, prepara material, pone cuido na HOH riba alerta, y a cera un di dos piso pa Covid. Un danki na tur e profesionalnan cu a sa di atende exitosamente cu e ola aki y danki na e gran mayoria di comunidad di Aruba cu a sa di a tene na e regla y protocolnan cu awe nos ta dominando e plamamento di e virus atrobe.

 

E realidad ta cu e virus t’ey ainda y esey ta pone cu tur hende mester ta cauteloso y sigui cuida te ora e vacuna yega Aruba. E vacuna no ta obligatorio pero si consehabel pa esunnan mas vulnerabel cu ta nos grandi nan y esunnan mas delicado di salud pa nan por ta protegi en caso tal nan haya e virus nan no hay’e fuerte na unda mester wordo interna den hospital y/of poni na aparato di oxigeno.

Prome Minister di Aruba Evelyn Wever-Croes a duna di conoce cu e tambe lo tuma e vacuna aki siguiendo conseho tambe di su dokter di cas.

“Gobierno ta monitorea e situacion aki cada dia y lo informa comunidad en caso mester cambia e medidanan di orden publico, si mester flexibilisa of si mester impone medidanan mas estricto. Te ainda esaki no ta e caso pero lo tene comunidad informa”, Prome Minister a termina bisando.