Parlamentario Endy Croes (MEP): Recorda pueblo di medidanan den aña di bonansa; Mike Eman y AVP a tuma hopi medida den nan 8 aña di gobernacion

Parlamentario Endy Croes ta splica cu enberdad gobernacion ta un continuacion y ora un gobierno haci malo ta toca e gobierno di turno pa “ruim op de boel” y corigi e desaster y mehora esaki pa henter nos pueblo por disfruta di un miho calidad di bida. Lamentablemente Mike Eman y AVP a haya un pais sano y solido na 2009 cu un debe nacional na 43% despues di 23 aña di Status Aparte. Pa IMF debe nacional mester ta bou 55% y den 23 aña di Status Aparte Aruba ta cumpliendo den tur sentido. Mike Eman y AVP a opta pa endueda e pais aki prestando 2200 miyon florin pa cubri deficit mientras adicional a compromete e pais cu 1600 miyon na proyectonan incluyendo esunnan di PPP y asina a percura pa redobla e debe. Mike a baha na november 2017 lagando e debe nacional na 93%, interes riba placanan presta na 232 miyon pa aña, un BBO na 3.5% (cual el a bisa cu e lo ELIMINA), pues un Aruba den un abismo na rand di bancarota.

Algun medidanan di Mike y AVP den añanan di bonansa:

Prohibi pa lubida algun medida cu Mike Eman y AVP a tuma den añanan di bonansa. Mike Eman y AVP a aumenta prima di AZV cu 2% na 2011. Mike Eman y AVP a aumenta prima di AOV desde 1 di Januari 2011. Mike Eman y AVP a aumenta prima di pensioen cu 1% pa trahado y pa doño di trabou desde 1 di Januari 2012. Mike Eman y AVP a aumenta Roomtax di 6 pa 9% y un aumento pa “all inclusive” y time share. Mike Eman y AVP a aumenta vlieg tax cu 10 us dollar pa AAA NV. Mike Eman y AVP a aumenta suma pa staatsexamen. Mike Eman y AVP a aumenta tarifa di inkomstenbelasting y loonbelasting. Mike Eman y AVP a aumenta prijs di coriente cu 35.7% desde 2009 pa 2017. (Lesa contesta di WEB 18 di september 2018 cual tur Parlamentario tin pues esunnan di AVP tambe), Mike Eman y AVP a aumenta tarifa di awa cu 15.5%. Mike Eman y AVP a aumenta edad di pension di 60 pa 65 aña. Mike Eman y AVP a corta te den ader riba derecho di pensioen di empleadonan publico introduciendo NPR na 2015. Dia empleadonan aki baha pensioen nan lo realisa den carni propio kico nan sindicatonan a negosha cu Mike Eman pa nan. Asina ta bon pa recorda pueblo parti di e maneho di Mike Eman y AVP kende a plunder e pida baranca aki alaves asota pueblo cu medidanan fini cu Bo no ta sinti mesora pero cu ta catastrofico pa Bo calidad di bida na final di dia. Tur esaki pa e por a gosa y fiesta cu placa di pueblo. Pensa dos biaha si Mike Eman y AVP merece Bo voto un biaha mas!