Gobierno su maneho pa reactiva nos economia ta resulta contradictorio pa loke ta trata mehora e ‘clima di inversion.’ Ministerio di Economia a bin cu henter un plan di incentivo fiscal cu ta resulta atractivo pa cualkier inversionista local, muy specialmente inversionistanan stranhero. Pero maneho di DIMAS ta daña tur cos.

A pesar di e crisis cu nos pais y henter mundo ta pasando aden debi na e pandemia tin interes y confiansa pa inverti den nos economia keto bay. Pero mientras di un banda gobierno ta purba di reactiva nos economia pa medio di stimula inversion. Di otro banda, e tardansa y dolor di cabes cu e inversionistanan di afo ta pasando aden pa diligencia legalmente nan permiso di estadia na DIMAS, ta demotiva nan. Te hasta nan a cuminsa bira e pio referencia pa mas inversionista interesa por bin Aruba cu nan capital pa inverti den nos economia.

Na luna di december ultimo, DIMAS a anuncia un cambio den nan maneho di admision relaciona cu efectonan di e crisis di Covid-19. Pero si nan a tene consideracion cu e inversionistanan riba nan maneho pa nan sigui inverti mas den nos economia, e realidad ta mustra otro cos.

Den e maneho nobo a wordo hisa e norma di inversion pa obtene un permiso como accionista y/of inversionista. Un cambio den e normativa tin di haci cu e capital di un inversionista a bira 250 mil florin den cuadro di e maneho nobo di gobierno pa nan. A pesar di e incertidumbre actual tin inversionistanan cu ta dispuesto pa hinca mas capital limpi y hustifica den e diferente sector cu gobierno a defini pa diversifica nos economia.

Mientras cu tin otro nan cu a yega di inverti caba. Pero aworaki nan ta dispuesto di bende nan inversion, debi na e caminda di cruz cu nan mester pasa cada bes cu nan ta solicita of renoba nan permiso como accionista/inversionista.

Nan mal experiencia ta haci cu nan no ta recomenda pa bin inverti na Aruba. Nos isla ta resulta interesante y atractivo pa nan haci inversion grandi. Pero e problema ta sinta cu e tardansa di nan permiso cu a bira uno cronico na DIMAS.

Inversionista

Bon Dia Aruba a papia cu un di nan kende a prefera di keda anonimo, pero su ehempel ta conta pa e cantidad di inversionista cu ta den e mesun situacion cune.

Pa añanan e tabata bishita Aruba como turista te hasta tres biaha den un aña hunto cu su famia. Te hasta 12 aña pasa nan a dicidi di cumpra un cas pasobra pa nan e “trankilidad y siguridad di Aruba no tin prijs.”

P’esey tres aña pasa e persona aki a dicidi cu enbes di haci su inversion na Merca, unda gran parti di su famia ta biba, el a busca un socio local pa hinca su inversion ariba Aruba. Nan a lanta un negoshi cumpliendo cu tur nos ley y exigencianan di Camara di Comercio.

Tur cos a bay bon, te ora cu e mester cuminsa procesa cu ayudo di nan abogado su prome permiso p’e, y tambe pa e inversionista su señora na DIMAS. “Ta logico cu si mi ta inverti na Aruba, mi mester supervisa y controla mi inversion,” el a declara. Ora cu el a haya su prome permiso, el a sali cu cuater luna venci. E di dos permiso a sali cu dos siman venci. Mientras cu ainda e ta wardando riba e di tres permiso.

El a bisa cu na cuminsamento e negoshi tabatin su reto cune. Pero despues el a cuminsa draai miho. Tanto asina cu nan tabatin 8 trahado na nan servicio. Awor cu e crisis di Covid a dal nos, tur cos a cambia y benta a cay, y nan mester a reduci nan personal. Sinembargo el a argumenta cu semper e kier ta legal. E tin bon cla cu pa e por ta legal, e tin cu cumpli legalmente cu tur obligacion di su negoshi. P’esey e inversionista aki ta kere cu e ta e prome cliente di DIMP cu ta cumpli semper cu su obligacion di belasting.

Aunke e panorama no ta uno prometedor ni local tampoco internacional, pero e ta convenci cu e situacion lo normalisa bek. Pero e situacion na DIMAS, te ainda e no ta wak un solucion pe. Mientras cu e no por biaha niun caminda debi cu semper cu e ta haya su permiso, e ta venci. E tin miedo cu ora e ta sali lo confronta problema pa drenta Aruba bek. “Mi tin miedo, pasobra mi no sa si mi ta legal of no,” el a laga sa.

Incertidumbre

Mientras cu e caso di e inversionista aki su casa ta ainda mas complica. E señora su permiso a wordo diligencia debidamente y DIMAS a neng’e. Nan a bay corte bao argumento di unificacion familiar. Corte a duna DIMAS 15 dia pa entrega e señora su permiso, y ya caba a transcuri un aña y mey y ainda e permiso no a wordo entrega. Dos biaha Corte a faya na nan fabor, pero te ainda e permiso no a wordo entrega. “Ni decision di corte nan no a respeta!,” el a bisa masha indigna.

Te hasta nan a dicidi bay LAR. Pero ainda nan ta wardando riba LAR su fayo. Un dia e inversionista su señora a bay compañe un rato den nan negoshi y Guarda Nos Costa a presenta pa haci control y a bay cune. “Dicon nan mester maltrata e hende asina. Como inversionista mi ta sinti malo. E cos aki ta frustra hende,” el a bisa.

E ta sinti cu nan bida como inversionista a bira den un incertidumbre constante na Aruba. E miedo y incertidumbre aki tin su man mara pa sigui inverti. Te hasta e tin pensa di bende su negoshi y inverti na otro sitio.

E ta kere cu Aruba no solamente ta un isla bunita y trankil, sino cu e ta un isla cu hopi oportunidad di inversion. “Ami e isla ta gusta mi,” asina el a bisa. Pero a base di nan experiencia cu DIMAS, e no ta recomenda niun di nan amigonan pa bin inverti na Aruba. “Mi no ta confortabel cu e situacion aki,” el a expresa categoricamente.