Segun presidente di SADA, Edward Maduro: “Solidarismo no mester bin di un banda so”

Unabes cu aña 2021 a habri trahadonan di empresa estatal a cuminsa manifesta cu nan no ta dispuesto di sigui entrega pa e fondo di solidaridad, manera nan a yega di haci aña pasa. Te hasta nan a yega di menasa di bay den accion pa medio di nan sindicatonan.

Di su banda presidente di Sindicato Aduanero di Aruba (SADA), Edward Maduro a bisa na e matutino aki cu for di aña pasa y specificamente SADA, nan a mustra di ta solidario. Pero nan ta haya como sindicato cu e ‘solidarismo no mester bin di un banda so.”

SADA ta lamenta cu esun prome yama pa duna e ehempel berdadero di ta solidario cu Aruba su pueblo , mester ta gobierno y e gobernantenan. Pero nan ta mira cu esey no ta bin sosode. Ya cu ainda nan tin hendenan cu ta wordo tuma, y contractnan innecesario di e coordinadornan ta wordo renoba.

“Bo wak un Cocolishi carga di hende,” el a bisa. Mientras e mandatario ta haci apelacion pa empleadonan publico entrega tur nan beneficionan secundario pa loke ta trata e toelagenan. Den e caso aki gobierno no ta serio ora cu nan ta pidi pa e hendenan ta solidario, segun presidente di SADA.

Maduro ta haya cu esaki ta refleha cu sigur trahadonan publico y esunnan di empresa estatal no ta aprecia e manera cu gobierno ta atende cu e trahadonan chikito. Mientras cu gobierno ta bisa cu mester ta solidario, y si bo ta solidario di berdad, bo no mester puntra. Pero e ta considera cu esaki no ta berdad, ya cu e ta un situacion di inhusticia y discriminacion pa e trahado cu si tin cu cumpli cu su trabao di 8 ora y ta wordo corta formalmente for di nan salario y beneficio.

Segun Maduro locual gobierno mes a entrega ta den desbalansa cu e trahadonan chikito cu si a entrega parti di nan salario y beneficionan cu tin na dje. E ta mira cu e trahadonan ta cobrando 12.6% menos, pero alomenos mester reduci e oranan di trabao. Of bin cu otro tipo di compensacion cu no mester ta placa, ya cu e situacion financiero ta dificil.

E ta haya cu e punto central cu ta haci cu e otro sindicatonan tambe a yega di expresa nan desaprobacion pa loke ta trata un 12.6% di entrega di salario pa e fondo di solidaridad, ta pasobra nan ta wak cu e gobernantenan no ta dunando di nan parti.

Tampoco nan no a mustra nan solidaridad den un forma mas den balans. Ya cu nan ta wak cu gobierno ta purba di hunga cu sentimento di pueblo, bisando cu e trahadonan publico y esunnan di empresa estatal y tambe di fundacion mester ta mas solidario. “Pero boso mes no ta solidario cu nan!,” el a declara.

Como sindicato SADA ta lamenta cu e gobernantenan si ta keda cobra tur nan toelagenan, y tambe mantene nan coordinadornan cerca nan, locual ta pone cu e trahadonan ta desaproba esaki y expresa nan disgusto tambe.