Artista popular Arubano, Jeon a lansa su videoclip nobo, conhuntamente cu talentonan nobo manera Heidi Hansen y Rashid Wanga. Despues di traha riba e melodia di “No ta bale la pena” na maart 2020 Jeon a wordo inspira pa duna e oportunidad na dos talento pa canta hunto cune riba su cancion “Bale la pena”.
E la comparti den su rednan social pa participa, talentonan lo mester publica un video di nan mes cantando riba su melodia cu nan propio letra traha riba dje. Jeon a keda sorprendi di mira e reaccion di tanto talento di nos islanan Aruba, Boneiro y Corsou cu ainda no ta reconoci riba nos industria musical.
“Tabata hopi dificil pa scoge mirando tanto talento cu tin”Jeon a expresa.
Despues cu Jeon a anuncia cu e ganadornan final, cu por cierto e la priminti cu lo bay riba su Album “Biggy Boy Forever” – un capitulo nobo a cuminsa pa ambos talento, Heidi y Rashid, despues di finalisa nan grabacion den studio. Nan a graba nan parti di videoclip pa cual esaki tambe tabata un experiencia unico pa nan. Esaki simplemente ta e comienso pa nan y ambos a expresa den na rednan social con agradecido nan ta pa por tin e oportunidad aki cua a yuda nan expande nan mes pa sigui crece.
“Awe mi por ta orguyoso dimi mes i sumamente agradecido na e experencia paso mi a crece como persona tambe”, Heidi a comenta, mientras cu Rashid a agrega: “Pues kico por stroba bo di ta e miho version di bo mes? Secondenan ta cana… believe in yourself!”
E produccion aki di “Bale la pena” a wordo realisa na Patio 15 (Aruba) por medio di Reclight Production y na Corsou por medio di Ryan QD Navarro Bv. Jeon a expresa den su rednan social cu su gratitud na tur talento cu a participa pa comparti nan letra y talento. Na Heidi y Rashid, na henter e team cu a realisa e videoclip. Violinista Angela Flores, Patio 15 pa e bunita espacio. Tur su fanaticonan y tur esnan cu ta kere den dje y su proyectonan.
