Den e landspakket cu pais Aruba a firma cu Hulanda na luna di november ultimo, lo bin reforma cu e entidad di reforma COHO lo bin cune, entre otro riba tereno di husticia cu Stichting Reclassering no ta descarta cu lo tin di haci cu e tarea cu nan ta desplega den nos comunidad.
Pa directora di e fundacion aki, Seraida Pemberton, e tipo di reforma aki ta bay reenforsa e parti di husticia cu mester tin su debido atencion. Entre nan e material necesario cu tin mester, pero tambe e capacidad y conocemento riba area di husticia mester wordo amplia y pone miho atencion na dje, segun Pemberton.
E ta kere cu na momento cu esey ta wordo ehecuta criminalidad lo por baha. “Esey lo por refleha riba e area di reclassering tambe,” el a expresa.
Locual si directora di Stichting Reclassering lo desea na momento cu lo cuminsa traha riba e reforma pa nan tene cuenta cu e parti di resocialisacion tambe. Ya cu e ta un area basta importante y alabes menos balora den e cadena di husticia.
Preveni criminalidad
Otro aspecto tin di haci riba e parti di preveni criminalidad. Pa asina evita tambe cu na momento cu criminalidad sosode e problema ta wordo atendi, pero esaki despues cu e persona a wordo sentencia.
Igualmente despues cu e persona ta haya su castigo, e mester di e parti di resocialisa cu directora di Stichting Reclassering ta haya un parti cardinal den e proceso di husticia. Esaki pa motibo -segun Pemberton- cu bo tin cu resocialisa e persona pa e no bolbe cay cera.
“Pa e motibo ey, esey a pasa. Un castigo di prizon no ta cambia locual a sosode den cuminsamento,” el a bisa. E ta kere cu mester dresa e parti ey. P’esey e ta haya cu den cuadro di e acuerdo y tur e reforma cu lo bini, mester pone atencion na e parti di resocialisacion tambe.
E aña aki reclassering ta cumpli 60 aña di existencia y den cuadro di e aniversario aki, nan kier traha diferente proyecto pa asina e fundacion aki por bin mas dilanti den nos comunidad. Un proyecto cu nan ta bin trahado riba dje y cu pronto lo bin cla tin di haci cu e cas como alternativa pa nos hobennan. En bes cu nan bay KIA, e hobennan cu a haya problema cu husticia por bay e cas pa reclassering por resocialisa e hobennan aki mas miho cu den un prizon.
Tambe reclassering kier bay mas preventivo y nan kier bin cu un proyecto pa atende cu e hobennan cu a haya nan mes den problema cu polis pa delitonan leve cu ta wordo manda cas bek, sin cu nan ta haya nan debido atencion.
Reclassering kier bay atende debidamente cu e hobennan aki, pasobra nan ta ripara cu hopi biaha e hobennan aki ta bin bek den criminalidad cometiendo delitonan mas pisa. P’esey Stichting Reclassering kier bay mas preventivo pa purba di deal cu e hobennan aki prome cu nan ta bay den delitonan mas pisa. Tambe hunto cu Polis di Bario e fundacion aki kier bay mas den bario pa purba di haci mas pa nos hobennan den area preventivo.
