Despues di gana referendum ayera: FTA kier negocia lihe CAO nobo cu gerencia di ANSA

Ayera tardi durante un referendum celebra na oficina di Mediador di Gobierno cu no a conta cu presencia di representante di Air Navigation Services Aruba (ANSA), sindicato FTA a logra e mayoria di voto pa representa e trahadonan di e compania estatal aki.

Na final, Mediador di Gobierno, Anselmo Pontilius a informa cu di un total di 35 trahado di ANSA cu derecho di voto, 26 di nan a participa den e referendum. 25 trahado a voto na fabor di FTA y un a vota pa niun sindicato. E resultado aki a mustra cu sindicato FTA a haya e mayoria di voto pa representa e trahadonan di e toren di control aereo. Sindicato STA cu tabata representa e trahadonan di ANSA a abstene di participa den e referendum aki.

Encuanto e abstencion di representante di gerencia di ANSA durante e referendum aki, Mediador di Gobierno a splica cu e ley di referendum no ta exigi e presencia di e partidonan envolvi ya sea dunado di trabao y/of sindicato.

E ley di referendum cu ta uno hopi anticua ta existi simplemente e presencia di e Mediador di Gobierno y su secretaria pa celebra un referendum. Sinembargo den practica y durante añanan nan a permiti e presencia di ambos partido como observador pa trece mas transparencia den e proceso aki.

Igualmente el a laga sa cu awe tardi tin otro referendum pidi pa FTA pa representa e trahadonan di Fundacion Facilidad Deportivo (FFD).

FTA y resultado

Dirigente sindical di FTA, Tyrone Bremo kende si tabata presente durante e referendum aki a laga sa na Bon Dia Aruba cu awor cu nan ta representa e trahadonan di e compania estatal ANSA, nan ta hopi satisfecho cu e resultado. Ya caba FTA ta den e proceso di traha un proposicion di un contracto colectivo nobo (CAO) pa manda na gerencia di ANSA pa cuminsa di biaha cu e proceso di negociacion.

El a bisa cu e hecho cu e trahadonan a dicidi di busca otro sindicato ta debi cu nan kier representacion sindical, “Nan kier sinti nan mes cu nan ta wordo defendi na momentonan cu nan tin mester, y sigur den e tempo di incertidumbre aki,” el a declara.

ANSA ta trata di un compania cu tin condicionnan bon di trabao y cu e trahadonan kier pa e condicionnan aki tambe keda asina. E hecho cu tin cortamento di cierto beneficio cerca e trahadonan na servicio di e compania estatal ta un preocupacion cu ta biba cerca nan tambe.

E sindicalista a laga sa cu esaki ta un preocupacion den tur caminda. “Pasobra si e no ta algo cu ta pasando, e ta algo cu bo pensa cu lo ta biniendo,” el a bisa.

Den e caso aki e ta mira cu hopi companianan ta buscando e representacion sindical pa protege loke tin, y tambe den futuro por tin continuidad pa atende cu cualkier abuso.