E lider sindicalista Colombiano, Julio Roberto Gomez Esguerra, kende e siman aki a fayece victima di Covid-19, no tabata un persona desconoci na Aruba. El a yega di bishita nos isla den varios ocasion pa participa den diferente congreso organisa pa FTA, unda el a haya hopi aprecio y tambe el a crea hopi laso di amistad.
Ex sindicalista y ex presidente di FTA, Anselmo Pontilius a expresa cu no solamente Colombia, pero henter mundo sindical ta di luto cu e fayecimento di Gomez Esguerra kende tabata presidente di Confederacion General di Trahadonan (CGT) na Colombia. Pontilius a bisa cu e sindicalista aki mescos cu otro dirigentenan a wordo afecta pa e Covid y e no a sobrevivi.
Na 1976, Julio Roberto a bay Universidad de los Trabajadores de America Latina (UTAL), e mesun instituto unda Pontilius a wordo forma sindicalmente. E tabata un persona masha carismatico cu tabatin un trayectorio largo den sindicalismo.
El a bisa cu Julio Roberto no solamente tabata un compañero tempo cu el a forma parti di sindicalismo den FTA. Sino cu e tabata un amigo hopi cera di dje, pero tambe di dirigentenan FTA. El afirma cu e sindicalista fayecido a yega di bin Aruba hopi biaha pa sostene FTA su congresonan.
E tabata un dirigente no solamente di Colombia, pero di un central general hopi importante. Gomez Esguerra tabata secretario general adhunto di e Central Latino America di Trahadonan (CLAT). “E tabata un dirigente na tur nivel,” el a bisa. Den su perfil riba e lider sindicalista, Pontilius a menciona cu e personahe aki a yega di participa na nivel di organismo internacional manera Organisacion Internacional di Trabao (OIT).
Tambe el a recorda tempo masha turbulento na Colombia, caminda Julio Roberto manera otro dirigentenan a pasa den momento sumamente dificil. Mas tanto den e decadanan di añanan 70 y 80 bin ariba, caminda nan a confronta algun situacion serio di menasa y asesinato di lidernan social y sindical na Colombia.
Na final, Pontilius a expresa su palabra di condolencia na Gomez Esguerra su famia y amigonan den henter Latino America.
