Mientras prostitucion ilegal ta sigui crece sin control: SANI-BAR ta sigui ‘status quo’

SANI-BAR ta e asociacion legalmente institui cu ta representa e doñonan di bar estableci na San Nicolas. Nan ta 33 bar cu na luna di maart lo cumpli un aña cu nan ta cera debi na e pandemia di Covid-19.

Mientras cu ainda nan no por cuminsa traha bek, prostitucion ilegal a aumenta sin control rond di Aruba. Te hasta ‘prosti-barber shop’ a keda descubri recientemente na Ponton, asina un miembro di e directiva di SANI-BAR a declara na e matutino aki.

E negoshi di prostitucion ilegal tin nan modus operandi ofreciendo ya sea e servicio di ‘hende muhe pre-pago’ y tambe esun cubri bao e capa di ‘escorts’ ofreci via internet. Pero pio ainda e prostitucion cayehero cu ta wordo mira te hasta den areanan di hotel grandi na Palm Beach, pero tambe na Noord y den pleno centro di ciudad.

Nan a bira berdaderamente un menasa pa salud publico. No solamente pa e peliger di malesanan transmiti sexualmente, sino pa e problema actual di Covid-19. Ya cu dificilmente DVG lo por bay controla esunnan cu ta trahando den prostitucion ilegal. Mientras cu den e barnan legal na San Nicolas si nan por bay controla, manera nan a yega di haci pa añanan.

Despues cu SANI-BAR a insisti pa un reunion mas pronto posibel, te hasta carta a wordo manda pa Minister President na luna december ultimo, finalmente nan a haya un carta pa un reunion ‘urgente’ for di DIMAS. E reunion aki cu a lanta hopi speransa cerca SANI-BAR su miembronan tabata programa pa dos siman despues, pues e no tabata urgente.

Dia 20 di januari ultimo finalmente e fecha di e reunion a yega, caminda directiva di SANI-BAR a wordo convoca pa scucha for di DIMAS cu e situacion di nan ta sigui ‘status quo.’ Kiermen cu te ainda nan no por haya permiso pa trece di afo nan trahadonan sexual pa cuminsa opera y ofrece nan servicio den nan bar, manera ta wordo haci pa decadanan.

Nan a sali desapunta y sorprendi di e reunion aki cu a wordo convoca cu caracter di urgencia pa scucha gewoon for di DIMAS cu nan situacion ta sigui mescos manera 10 luna pasa. P’esey SANI-BAR via nan abogado a pidi un reunion cu Crisis-Team pa asina expone nan situacion debidamente.

Nan ta haya lamentabel y cuestionabel cu mientras cu hende muhe ta sigui drenta como turista pa ofrece nan servicio sexual di un forma ilegal den sitionan strategico y bao cierto fachada. Te hasta cerca di nanishi di polis, caminda cierto bar ta sigui opera y ofrece cierto ‘snack.’ Mientras cu e ‘plato fuerte’ ta otro cos, asina un miembro di SANI-BAR a declara. El a conclui cu prostitucion ilegal a bira un sorto di competencia inhusto pa nan.

Nan ta desaproba e trato no husto cu nan ta bin hayando, ya cu mientras cu tur miembro di SANI-BAR ta traha legalmente cumpliendo cu tur rekisito y exigencia legal, te hasta di salubridad publico y pagando nan impuesto pa gobierno, si nan ta wordo castiga severamente.

Nan ta mira cu cierto sector a cuminsa traha, y gobierno a bin cu cierto flexibilidad pa nan, pero e sector di e barnan na San Nicolas te ainda no a wordo atendi debidamente.