Ayera mainta tempran e chauffeurnan di Arubus a bay den accion pa dos ora y pone nan trabao abao.

Nan a dicidi di no sali pa realisa nan rutanan regular den un ora crucial di ayera mainta, unda mas cliente di e compania di transporte estatal aki ta haci uzo di nan servicio, ya sea pa bay trabao of muchanan cu ta bay scol.

E situacion di entregamento di salario di 12.6% ta causa hopi dolor cerca e trahadonan cu actualmente sindicato SEPPA ta atende cu nan, aunke ainda un referendum no a tuma luga. Nan ta negosha e forma con nan lo bay corta e porcentahe aki. Ya cu e forma cu e trahadonan kier entrega nan ta negoshando via SEPPA na mesa.

E sindicalista di SEPPA, Edmundo Marlin a yega di vocifera den media cu niun momento e trahadonan a nenga di entrega, pero nan ta contra e forma cu gerencia kier practicamente impone unilateralmente riba e trahadonan.

Cortamento di salario

Nan a menasa di sigui cu nan accion si no lo bin cu un pronto solucion riba cortamento di nan salario. A pesar cu ambos partido ta sinta na mesa pa busca un solucion y evita cu mas accion lo bin na caminda, nan a pidi intermediacion di Mediador di Gobierno, Anselmo Pontilius.

Ayera tardi nan tabatin programa pa bay mesa cu e partidonan envolvi pa mira si nan por haya un salida. Prome cu e reunion por a tuma luga, Mediador di Gobierno a declara na e matutino aki cu ya caba for di un siman y mey atras, nan tabata den e mesa di negociacion cu gerencia di Arubus y SEPPA pa atende cu dos punto.

Di un banda e trahadonan ta na altura cu gerencia ta determina pa continua di reduci nan condicion di trabao y salario basa riba instruccion di gobierno. Loke e trahadonan a haci na 2020, pero e aña aki, si nan no ta mucho di acuerdo. E biaha aki nan no ta di acuerdo entre otro debi cu tin un protocol firma na 2019 den cual tin cierto puntonan cu mester wordo efectua na 2021.

E trahadonan di Arubus a compronde na december 2020 cu gerencia di e compania estatal aki no lo por cumpli entre otro cu e parti di restructuracion di salario pa efecto di e pandemia y tambe menos entrada, entre otro argumentonan.

Di otro banda mayoria di e trahadonan a scoge pa bandona STA y bay sindicato SEPPA, y pidi un referendum cu actualmente ta den proceso pa tuma luga otro siman. Sinembargo nan a logra convence gerencia di Arubus pa sinta cu SEPPA pa asina negosha e preocupacion di nan trahadonan.

Ta asina cu na luna di december ultimo alrededor di 100 trahado na servicio di Arubus, SEPPA a mustra cu nan tin un 65 trahadonan cu a bira miembro di nan sindicato di e trahadonan cu a retira for di sindicato STA. Aparentemente e sindicato aki a splica e trahadonan riba e realidad di e compania estatal aki, y e trahadonan a dicidi di scoge pa bay busca otro sindicato.

Gerencia di Arubus ta na haltura di e situacion aki, pero Mediador a laga sa cu aworaki nan no lo concentra tanto riba e referendum, sino pa determina kico e trahadonan ta dispuesto pa entrega durante 2021. E punto central ta e importancia di por yega un solucion y kita e conflicto for di mesa.

Ya caba tres reunion a wordo celebra pa negosha, sin cu no por haya un acuerdo total, riba loke e trahadonan ta dispuesto pa coopera of entrega. Sinembargo diabierna ultimo gerencia di Arubus a dicidi di toch corta den salario di e trahadonan. Esaki ta un di e motibo di e protestanan di siman pasa y ayera mainta tempran. E intencion ta cu e partinan envolvi por yega na otro dor di un documento cu nan mester firma pa e proximo 11 luna cu ta keda di 2021.