E bay bin di opinionnan entre sindicato di maestronan SIMAR y minister di Enseñansa ora ta trata di Colegio San Nicolas ta laga un buraco grandi den e storia di Colegio San Nicolas (CSN) su desaroyo e ultimo añanan: Con e institutonan di enseñansa a faya y con studiantenan mes ta experiencia esaki.

Minister a admiti cu Inspectie y Directie Onderwijs no a haci nan trabou

Durante conferencia di prensa di 11 di januari di gobierno di Aruba, minister di Enseñansa Rudy Lampe (RED) a bin cu un cantidad grandi di revelacionnan di su banda den e storia tragico di Colegio San Nicolas e ultimo añanan. Entre e revelacionnan aki tin un par cu no a haya mucho atencion, esta cu minister Rudy Lampe a admiti cu tanto Inspectie Onderwijs como Directie Onderwijs no a haci nan trabou debidamente.

Ora ta trata di Inspectie, esaki tin di ber cu e echo cu ta apenas den november 2020 a haci un analisis y inspeccion di e situacion na Colegio San Nicolas, maske tabata conoci cu e scol mester atencion ya pa un tempo caba. E minister a admiti cu e ultimo añanan tabatin falta di rapport riba e situacion na Colegio San Nicolas, mirando cu Inspectie mester eherce control riba e sector di enseñansa y traha rapportnan basa riba esaki. Niun di e dos tareanan aki a wordo haci pa Inspectie e ultimo añanan na CSN, asina e minister a bisa durante e conferencia. Na mes momento e minister a constata tambe cu Directie Onderwijs a faya, pasobra ta Directie Onderwijs mester a tin control riba e cantidad di ora pa les (lessentabel) y tambe e cantidad di alumno den klas y cantidad di klas estableci den e Landsbesluit dagscholen v.w.o., h.a.v.o., m.a.v.o.

Un punto interesante cu ta wordo lubida den e bay bin entre docentenan y minister, ta cu Inspectie su rapport ta analisa e yenamento y formacion di klasnan y clusternan, mientras cu esaki tabata parti di e tareanan cu e management team a haya na momento cu a traspasa maneho diario di ex rector Hubert Goedgedrag pa e management team actual.

E meta di tur e tareanan aki lo mester ta pa percura pa calidad di enseñansa mas halto, pero den mesun rosea no ta puntra e studiantenan mes con miho por yuda nan pa nan estudio cana bon. Esaki ta un di e recomendacionnan cu Inspectie ta duna tambe, esta establece kico e necesidadnan estudiantil di e poblacion di studiantenan ta y dirigi e proceso di siñamento riba esaki. E evaluacion aki lo mester tuma luga 1 biaha pa trimester, segun Inspectie.

Studiante: ‘Perdida di animo di docentenan ta haci cu nos mester carga consecuencia’

Mirando esaki, Bon Dia a tuma contacto cu un studiante cu a prefera di permanece anonimo. E studiante a detaya con den varios di e situacionnan cu ta presenta na Colegio San Nicolas, ta e alumnonan ta haya sa te na ultimo, pero cu hopi biaha e mesun docentenan tampoco no ta na altura di kico ta pasando, puntando den direccion di mal comunicacion.

E studiante por ehempel ta referi na e situacion cu studiante di Natuurkunde y falta di lesnan di Natuurkunde, cual minister durante e conferencia a declara cu a purba yega na e studiantenan via un manera di studia online. E studiantenan a cuestiona e management team “pasobra e docentenan tin cu laga sa 3 luna prome cu nan kita cu nan ta bay kita. E docente a kita fin di oktober, dus di juli/cuminsamento di augustus el a laga sa cu e ta bay kita. Awe, 6 luna despues ainda niun docente nobo. E mesun docente ey ta bin scol den su oranan liber pa duna les na algun klas.”

Regardando e descrepancia entre kico e Landsbesluit dagscholen ta bisa mester ta e oranan di les pa cada vak y e falta/exceso di ora den practica na momento cu Inspectie a haci su rapport e studiante a bisa: “E ta natural cu nos ta haya mas les di algun vak cu otro, E materianan Nederlands, Engels y Wiskunde (kernvakken) ta vakken cu sowieso mester haya mas hopi biaha. Pero cu tin docentenan mes ta cambia e cantidad di lesnan cu nan ta suppose di duna, esey si no ta berdad. Esey no ta afecta nos siñamento. Loke si ta afecta nos siñamento ta cu e docentenan a perde smaak di duna les of ta hopi biaha absente. [Riba] e parti cu nan ta absente of no mino por bisa nada paso ami no sa e estado di nan salud, pero e perdida di animo di e docentenan si ta afecta nos directamente y mi no ta compronde pakico nos tin cu carga e consecuencianan.”

Mas aleu e studiante anonimo a splica cu tin cierto maneho cu a wordo crea cu te ainda no a wordo implementa, te cu e y su coleganan por a mira. “Supuestamente esunan cu a bay over sin cu nan tabata suppose di bay over (door di e regla di Minister di Enseñansa) mester a bay over cu remediering, dus haya extra les. Te dia di awe niun di mi amigonan cu a bay over sin cu nan tabata suppose di bay over a haya e extra lesnan aki.”

‘Mi ta kere casi niun alumno ta sinti nan mes mentalmente cla pa eindexamen’

E studiante ta refleha riba su mesun trayecto, mirando cu tin un cantidad di circunstancia cu e ta haya no ta e fout di e studiantenan, pero si ta yega na consecuencianan pa nan. “Si mi mester druip pa via di e situacion y no pa via di mi mesun culpa, mi lo bay un MBO na Hulanda, pasobra ya mi tin un diploma di MAVO. Mi ta kere casi niun alumno ta sinti nan mes mentalmente cla pa e eindexamen.”

E studiante a subraya cu nan ta haya sa masha poco di e situacion di kico berdaderamente ta pasando na nan scol. “Ni e docentenan, ni e alumnonan no sa tur detayenan di e situacion na nos scol, nan no ta conta nos kico ta pasando.”