Google ta bisa cu ta haciendo progreso riba plannan pa cambia e tecnologia di Chrome pa track usuarionan cu meta di mehora privacidad, hasta na momento cu ta enfrenta retonan di regulador- y oficialnan.
E compania a duna un actualisacion dialuna riba su trabao pa elimina for di su browser Chrome e asina-yama ‘cookies terceros’, cual ta ser usa pa esnan cu ta pone aviso riba un website of nan partner pa track habitonan di un usuario riba internet.
Cookies terceros pa largo ta un fuente di preocupacion pa privacidad y Google a bisa un aña atras cu lo elimina nan, den un anuncio cu a sacudi industria di aviso online.
E cambionan lo afecta Chrome, e web browser dominante di mundo, como tambe otro brosernan basa riba tecnologia Chromium di Google, manera Edge di Microsoft. Browsernan rival Safari y Mozilla Firefox ya a elimina cookies terceros pa default, pero Google ta tumando un maneho mas gradual.
Den un blog post, manager di producto pa confiansa di usuario y privacidad di Google, Chetna Bindra, a busca pa alivia miedo tocante e proyecto, bisando cu e propuestanan lo ‘yuda publicista y esnan cu ta pone aviso ta exitoso, mientras tambe ta protege privacidad di hende’.
Google a bisa cu tabata lansando data nobo riba un tecnologia proponi, cu ta elimina ‘identificadornan individual’ y na luga di esey ta agrupa usuarionan segun demografico.
E tecnica ta sconde usuarionan individual den e multitud online y ta tene e historia di un persona priva riba e browser di un aparato. Resultadonan di test a mustra cu e por ta un reemplaso efectivo pa cookies terceros, y cu esnan cu ta pone aviso por spera di mira ‘sikiera 95% di e conversionnan per dollar gasta compara cu aviso basa riba cookie’, Bindra a bisa.
Conversion ta accionnan cu usuarionan ta tuma ora nan mira un aviso, manera click pa cumpra of mira un video. Esnan cu ta pone aviso por test out e sistema nan mes den proximo lunanan.
Marketers for an Open Web, un grupo di industria Britanico, a bisa cu e anuncia di Google no a haci nada pa alivia preocupacion expresa pa industria di aviso y reguladonan y a cuestiona si e data di e compania a mustra loke nan ta bisa.
E plan di Google a genera scrutinio for di vigilante di competencia Britanico, cual e luna aki a habri un investigacion riba si esaki por socava competencia pa aviso online y reforsa e posicion dominante di Google den industria di aviso online.
Oficialnan Mericano tambe ta retando comportamento di Google. Un grupo di estadonan a entrega un demanda contra e compania luna pasa, acusando e di ‘conducta anti-competitivo’ den industria di aviso online.
