1 di februari deadline pa paga impuesto di vehiculo di motor: Boet automatisa di 50% riba debe di cliente cu no ta paga na tempo

Dia 1 di februari tur doño di vehiculo di motor mester a paga por lo menos mita di aña di e belasting aki.

Si nan no hacie, nan lo haya automaticamente un boet. Pero tambe nan ta core e riesgo di haya un boet si acaso polis ta para nan riba caya.

Boet

Vocero di departamento di Impuesto (DIMP), Meverly Romano a expresa na Bon Dia Aruba cu cada dia cu e fecha di 1 di februari ta mas cerca, mas hende ta cumpliendo cu e obligacion aki. P’esey nan a dicidi di amplia nan servicio mita dia tanto diasabra ultimo como diasabra proximo.

Tur e facilidad aki ta yuda pa evita un boet pa falta di cumplimento. Ya cu e sistema automatisa di DIMP ta registra un boet na nomber di e contribuyente cu no a cumpli dia 1 di februari. Kiermen dia 1 di februari anochi, ora nan sistema ta procesa tur e pagonan cu a wordo haci, e ta wak ken si y ken no a cumpli for di tur e nombernan cu nan tin registra.

Automaticamente DIMP su sistema ta pone boet di 50% di e suma cu ta habri. Romano a splica cu si acaso e suma di belasting ta 300 florin pa aña, e boet ta bira 50% di 150 florin cu ta bira 75 florin. Ya cu e sistema ta coy e prome mita di aña cu ta caduca 1 di februari. “Pa dia 2 di februari si e cliente bin paga cerca nos e cahero ta bay bis’e cu su saldo ta 150 florin plus 75 florin di boet cu ta bira total 225 florin,” el a bisa.

Romano ta kere cu e boet aki no ta necesario mirando tur e facilidad cu a wordo crea pa paga na tempo. “Simplemente e ta debi na e incumplimento,” el a declara na Bon Dia Aruba. DIMP ta compronde e argumento di e contribuyente cu kisas nan no tin trabao y nan ta pasando den duro. Of nan ta cobrando un salario hopi menos y tin hende cu ta hayando ayudo di gobierno pa cubri cu nan necesidad.

Vocero di DIMP a laga sa cu e departamento aki ta compronde tur esey. Pero di otro banda nan tin un tarea hopi pisa, ya cu nan ta e departamento encarga pa cumpli cu e leynan di belasting. E departamento aki tin cu percura pa cumpli cu e presupuesto di pais Aruba pa asina gobierno por cumpli cu nan compromisonan y obligacionnan cu henter comunidad.

“E no ta un tarea facil pasobra cumpli cu leynan di belasting ta encera tambe cu practicamente bo ta mishi cu e cartera di e contribuyente,” segun Romano.

Cerca nan ta drenta cierto keho cu e boet ta halto, mirando entre otro cu nos ta den pandemia y tin hende cu no tin entrada. Pero e ta haya cu esaki ta un compromiso fiscal caminda cu pandemia of sin pandemia, semper nos mester cumpli cune.

E clientenan mester ta mas consciente di nan impuesto di vehiculo di motor. Ya cu ora bo tin un vehiculo y bo ta haci uzo di caretera publico cune, e ciudadano tin e obligacion aki.

Pagamento

E cantidad di auto cu nan tin registra ta yegando 90 mil, y ta resulta imposibel pa nan por atende e cantidad di clientenan grandi na DIMP Camacuri mes. Nan ta cumpliendo strictamente cu e reglanan di DVG caminda nan ta permitiendo solamente 22 persona compara cu otro añanan cu nan tabatin mas cu shen persona den sala.

Romano ta spera cu nan clientenan por haci uzo di tur e facilidad cu nan ta brindando, ya sea via online banking, pero tambe na e diferente MFA y tambe na nan sede principal pa paga nan impuesto di vehiculo di motor, prome cu e deadline ta vence dia 1 di februari awor.

E no tabatin un cifra exacto cuanto hende a haci uzo di e facilidad pa paga e belasting aki. Pero si el a sigura cu e ta bayendo bon. “E proceso di pago ta canando manera tur aña. E ta bayendo hopi bon,” el a laga sa. Tambe nan ta ripara cu hopi cliente ta pagando e impuesto aki via online cu ta un sistema cu nan reenforsa pa motibo di e pandemia y siguridad.

E dianan aki ta uno hopi druk y DIMP ta sigui recomenda pa haci pago di impuesto via e sistema di cualkier banco. Tanten e cliente ta haci su peticion via DIMP su website pa ricibi su recibo. Despues nan ta ricibi nan recibo via e-mail denter di algun dianan.

Plachi di auto

E biaha aki no ta wordo papia literalmente di plachi di number di auto. Pasobra e aña aki lo wordo uza e mesun plachi di aña pasa. Tampoco nan no a bin cu e sistema di sticker, manera DIMP a yega di informa na luna di november ultimo. Romano ta considera importante pa trece cierto aclaracion. Nan ta ripara den social media cu e cliente ta kere cu nan ta pagando pa e plachi di number, y esey no ta corecto.

“E plachi di number ta un comprobante di e registro di e auto,” el a bisa. E plachi por duna un indicacion cu e belasting ta paga. Pero e ta haya cu esey no ta e parti mas importante ora u nan cliente ta cumpli cu e tipo di impuesto aki. Romano a splica cu impuesto ta algo completamente separa.

Sinembargo tin clientenan cu ta bisa cu nan no ta bay paga pasobra nan no ta haya nan plachi. E no ta nenga cu berdad na Aruba semper tabatin e custumber di otorga un plachi di nobo cada aña, pero no semper e mester ta asina. Pero nos por mira cu den paisnan grandi cu nan ta introduci un plachi, esey ta keda riba e auto pa varios aña. E ta kere cu pa Aruba nos mester bay den e direccion aki. Logicamente e auto mester tin un number di plachi pa core cune.

Locual DIMP ta considera importante ta cu unabes e contribuyente tin un auto registra nan tin e deber tambe di paga e impuesto aki tur aña. E ta algo cu no ta desconoci pasobra tur persona sa cu ora aña habri e prome deadline cu nan ta haya ta esun di e impuesto di vehiculo di motor. Den e ley ta prescribi cu e deadline ta 31 di januari.

Pero mirando cu e fecha aki ta cay ariba diadomingo, p’esey e fecha a bira dia 1 di februari. Romano a recorda tur contribuyente di e impuesto aki cu e fecha final ta dialuna proximo pa haci e pago di por lo menos e prome mita di aña. E cliente por scoge tambe pa paga full aña di un solo biaha.

Igualmente na final di november aña pasa pa prome biaha DIMP a bin cu un sistema di pago parcial. E ta consisti cu e cliente por haci e pago di e impuesto aki den pida pida di minimo 50 florin tur fin di luna. Di e forma aki ora e fecha final yega, nan por a caba di paga mita aña cu ta 150 florin pa vehiculo priva (A) pa e no cay financieramente dificil. Esaki ta depende di e tipo di plachi cu e cliente tin di su auto.

Nan ta bay sigui cu e sistema di pago parcial aki pa e di dos periodo of di dos mita di aña, cuminsando fin di februari awor. Romano a aclara tambe cu e pago parcial no ta un areglo di pago. E ta un sistema di pago delanta prome cu e fecha final yega.