E cantidad total di aresto durante e disturbionan diadomingo na varios ciudad y pueblo na Hulanda a keda revisa na entre 250 y 300, segun polis a bisa ayera tardi.
Mayoria di e arestonan a tuma luga na Amsterdam y Eindhoven, unda un cantidad di hende ainda ta permanece den custodia. Mientras un cantidad di multitud tabata inclui hende cu tabata kier manifesta pacificamente, tambe tabatin gruponan cu ‘tabata purbando di crea disturbio y deliberadamente a busca confrontacion’, e vocero a bisa.
Prome minister Mark Rutte a describi e violencia cu a compaña e protestanan anti-lockdown na algun ciudad Hulandes como ‘inaceptabel’.
Polis tambe a otorga 5,675 multa na hende cu a viola toque de queda desde diasabra, na momento cu e ora limite di 9pm pa yega cas a keda introduci.
Den total, siman pasa 7,045 persona a ricibi un multa pa no cumpli cu reglanan di coronavirus, incluyendo distancia social, bisti tapaboca y bende alcohol, polis a bisa.
Mientras tanto, den pueblo Venlo na Limburg, alcalde Antoin Scholten a declara un estado di emergencia te dia 9 di februari, e fecha cu e toque de queda ta caduca. “Keda cas. Hacie pa bo mes y pa nos tur”, e alcalde a suplica riba un video.
