Autoridad di proteccion di data di Italia a bisa ayera cu a impone un blokeo inmediato riba acceso di TikTok na data di cualkier usuario cu su edad no ta verifica.
E autoridad a bisa cu tabata actuando cu ‘urgencia’ despues di morto di un mucha muhe di 10 aña di edad na Sicilia, ken a fayece mientras tabata participa den e asina-yama reto ‘blackout’ mientras tabata usa e red social propiedad Chines pa comparti video.
Fiscal na Sicilia ta investigando e caso.
E autoridad di proteccion di data a nota cu a conseha TikTok na december tocante un serie di violacion, incluyendo tiki atencion pa proteccion di menornan di edad, e facilidad cu cual usuarionan bao edad di 13 aña por registra pa e plataforma – contra su propio reglanan – e falta di transparencia den informacion duna na su usuarionan y e uso di settings automatico cu no ta respeta privacidad.
“Mientras tabata spera pa ricibi un respuesta, e autoridad a dicidi di tuma accion pa sigura e proteccion inmediato di menornan di edad na Italia registra riba e red”, e autoridad a bisa den un declaracion.
E blokeo ta keda na vigor te al menos dia 15 di februari, momento cu lo haci mas evaluacion.
