Conseho Consultivo (Raad van Advies; RvA) di Aruba den su reciente conseho riba e cambionan den leynan pa mehora regla encuanto combatimento di labamento di placa y financiamento di terorismo, ta contempla varios deficiencia den esaki y ta mustra tambe riba e gastonan administrativo extra cu e tareanan aumenta di supervision lo tin pa Banco Central y pa e entidadnan supervisa.
Parlamento di Aruba a haya e propuesta di ley cu ta contempla cambio den e ordenanza nacional (ley) encuanto labamento di placa y financiamento di terorismo (Landsverordening Voorkoming en Bestrijding Witwassen en Terrorismebestrijding; AB 2011 no. 28), hunto cu e cambionan corespondiente den otro leynan cu mester haya cambio pa motibo di e cambio den e ley principal. Esaki ta encera cambio den, entre otro, Codigo Penal, ley di Free Zone, ley encuanto obligacion di notifica di entrada di pais cu placa cash, etc. E mehoracionnan ta pa trece e actual ley mas den linea cu e normanan existente cu e entidad supervisor internacional FATF (Financial Action Task Force) ta maneha y ta requeri cumplimento. Hunto cu esaki anto a haya e conseho di RvA pa e cambio di ley aki, duna na juni 2020.
Mirando e consecuencianan grandi cu implementacion di e cambionan ta implica, RVA ta conseha pa elabora mas riba esaki pa loke ta e consecuencianan financiero tur esaki ta bay tin pa Pais Aruba. Tambe pa elabora mas tocante con ta bay haya vista riba e costonan aki y ki consecuencia esaki tin pa esnan cu ta cay bao di e supervision, o ta ehecuta e supervision mes.
Tambe e Conseho Consultivo ta haya falta di un resumen di con e actual supervision ta funciona. Ta sugeri por ehemplo duna un resumen di e cantidad di caso cu MOT (Meldpunt Ongebruikelijke Transacties) a entrega na Ministerio Publico, e casonan cu a conduci na persecucion penal y na condena den e casonan. Tambe un categorisacion di e tipo y tamaño di empresa envolvi den e actonan, pa por haya un vista real cuanto caso y ki tipo di caso di labamento di placa tin, pa por conclui con frecuente e problema di labamento ta sucede y con ta combati esaki, y con e adaptacion y mehoracion proponi lo bay mehora e supervision di e tereno aki, mira for di un punto di vista practico.
Tambe e Conseho ta constata cu no ta mustra claramente kico ta e recomendacionnan haci pa FATF na 2012, cu awor lo bay haya cumplimento a traves di e cambionan actual. Tampoco kico ta e obstaculonan cu ta topa den practica y cu via e cambionan aki lo keda atendi. Ta recomenda pa atende e puntonan pa cual ta considera cambio a base di e stipulacionanan di FATF mas den detaye y indica di ki manera e stipulacionnan nobo lo bay percura pa por maneha esaki mihor. Tambe pa haci un distincion entre cambionan cu ta pa cumpli cu stipulacionnan di FATF y cualnan ta adaptacion pa por atende e situacion local di mihor manera, es decir cu ta escogencia di maneho propio.
Di e splicacion RvA ademas no por deduci si tabatin consulta cu e interesadonan riba tereno local, manera esnan cu ta cay bao di e supervision, cu ta entidadnan financiero y otro, ademas di Banco Central di Aruba mes. RvA ta considera esaki di importancia, pa por haya un vista di e eventual problema y obstaculonan cu por topa den implementacion di e reglanan nobo. Esaki tambe pasobra RvA ta constata cu na varios momento a scoge pa un terminologia ‘habri’ manera den e caso di “redelijke maaatregelen” y “onverwijld” (‘medida razonable’y ‘sin vacilacion’). Esaki segun RvA den practica ta bay duna problema pasobra esun cu ta haci e supervision lo mester bay duna interpretacion na e normanan general aki, pa por determina cual di e cantidad di sancion di cual ta dispone lo mester aplica, manera e sancion di ‘last onder dwangsom’ (orden pa no comete un cierto violacion mas, bao aplicacion di un multa cu ta cobra si esaki sucede toch) y ‘bestuurlijke beoete’ (multa duna pa autoridad gubernamental sin intervencion di Ministerio Publico o Corte).
Tambe RvA ta expresa su obhecion pa e hecho cu ta maneha delegacion di cierto autoridad a traves di un areglo ministerial, loke no ta haya splicacion y ademas ta parce RvA un nivel di delegacion no apto pa e caracter di e ley aki. Ta sugeri pa cambia esaki pa e nivel di un ‘Landsbesluit Houdende Algemene Maatregelen’ (Decreto Nacional di Medida General). Esaki segun RvA pasobra un ‘LBHAM’ tin un trayecto mas cuidadoso di preparacion loke ta un mihor garantia cu un areglo ministerial cu no tin e trayecto di consulta aki. Si toch ta opta pa e areglo ministerial, ta desea di parti di RvA anto un splicaccion mas extenso pakico ta opta pa esaki.
Nota di redaccion: Un ‘LBHAM’ cu ta duna reglanan general a base di un stipulacion den un ley, ta suheto na conseho di RvA y ta bay tambe Parlamento, unda e miembronan por manda comentario y/o obhecion, o peticion pa reconsidera pa e ministro(nan) concerni. Un decreto o areglo ministerial no tin e ‘checks and balances’ aki.
Den nos proximo edicionnan mas tocante e proyecto di ley aki.
