Virus di Covid na Aruba no ta menos agresivo: Estudio di Sero Prevalencia lo determina maneho di vacuna

Epidemiologo Garreth Tromp a declara na Bon Dia Aruba cu alrededor di un grupo di 1.700 persona (adres) a wordo invita pa participa, durante e estudio di Sero Prevalencia of estudio di anticurpa cu DVG ta bay realisa contra SARS-Cov-2 (Covid-19).

E meta ta di inclui minimo 1000 persona den e estudio aki. Si den caso cu nan no ta logra e cantidad di persona aki, nan lo bini cu e di dos rond di invitacion pa diferente persona di nos comunidad. Epidemiologo Tromp a laga sa cu ta importante cu e personanan aki tin anticurpa den nan sanger cu por indica cu nan ta immuun na e virus caba.

Encuanto si e resultado di e estudio aki lo determina e cantidad di hende cu lo wordo vacuna. Kiermen si den caso cu ta wordo determina cu e hendenan aki ta immuun na e virus, no necesariamente nan mester haya e vacuna contra Covid cu pronto lo ta na Aruba. Segun epidemilogo e estudio aki por hunga un rol unabes cu ta wordo determina con e nivel inmunidad a wordo plama den nos comunidad, esaki por yuda den e maneho di e vacuna den futuro. Es decir cuanto hende berdaderamente mester wordo vacuna contra e virus di Covid-19.

Di otro banda, si e tipo di gen di e virus di Covid cu a wordo identifica na Aruba ta menos agresivo cu otronan rond mundo, Epidemiologo Tromp a bisa cu mundialmente nos por mira cu mita di e casonan -y te hasta posiblemente mas cu mita- nan ta completamente asintomatico.

“Esaki ta loke nos ta wak akinan na Aruba,” el a bisa. Specialmente ora cu nan ta haci screening na aeropuerto, hopi persona ta sali positivo, y despues nan ta mustra cu no tin niun di e sintomanan di e malesa aki.

Pero no mester lubida cu no tur hende ta pasa den e mesun situacion cu otro cu a resulta contagia. No ta cuestion cu e virus ta menos agresivo na Aruba. Ya cu si bo ta haya Covid na Aruba, tambe bo tin e chens di bira hopi malo y te hasta bo por para den hospital.

Esaki ta e mesun situacion cu nos por wak den cualkier otro parti di mundo tambe, el a bisa. Pues ta dificil pa conclui -segun Epidemiologo Tromp- cu nos ta haye menos grave na Aruba cu otro paisnan na mundo, ya cu e ta grave tambe riba nos isla.

Igualmente a keda confirma di parti di Prome Minister, Evelyn Wever-Croes kende ta lidera e Crisis Team cu e freezer special pa conserva e vacuna di Pfizer a yega na Aruba caba.

E planificacion ta cu e luna aki mes, entre 25 y 26 di januari, Aruba lo haya bishita di representante di ministerio di Salubridad Publico y Medio Ambiente (RIVM) di Hulanda pa controla si Aruba a cumpli cu tur exigencia prome cu nan ta manda e prome lote di vacuna otro luna.

Te ainda gobierno di Aruba no tin confirmacion cuanto vacuna Hulanda ta bay manda y tampoco ki dia ainda. Pero ya cu e freezernan a yega Aruba caba, representante di RIVM ta bin wak si nan ta bon instala y si Aruba ta cumpli cu tur cos.