Ta ora pa saca e kerntakenanalyse di 2008 for di lachi y us’e como base pa negocia e tarea di Gobierno na 2021.Esaki den luz di e economisacion cu mester bin rapidamente den costo di maneho pa e aparato publico di Aruba. Esey ta e recomendacion di Conseho Social Economico, SER.

Na 2014 ya SER a produci un raport ‘ Economisa den aparato publico’ den luz di e situacion financiero precario. E tempo ey SER a basa su mes riba e cifranan di Banco Central di Aruba cu a indica cu e debe nacional di Aruba na 2013 tabata 71,2 porciento di e Producto Interno Bruto (PIB/GDP). Esaki tabata significa cu na 2013 caba, Aruba tabata 11,6 punto di porciento mas halto cu e standard di 60 porciento cu Union Europeo tabata mantene, considera manehable pa pais grandi, no pa pais manera Aruba. E deficit presupuestario tabata 8,5 porciento cu tabata 5,5 punto di porciento riba e norma internacional di 3 porciento.

Reduci e deficit presupuestario por medio di baha gasto di aparato publico tabata e enfoke di e rapport na 2014.

Sinembargo, envez cu situacion a drecha, el a bira pio, hasta prome cu COVID-19. E debe di Pais Aruba a sigui crece te na 4 biyon of 86 porciento di e Producto Interno Bruto. E deficit financiero den e periodo 2014-2018 tabata di 4.2 porciento. Y cu un crecemento economico average di 0.8 porciento pa aña, esaki a implica cu finanzas publico tabata insostenible.

Gasto di personal a subi na 2017, tambe gasto di bienes y servicio. Pero e pandemia realmente a afecta e posicion financiero di Aruba, cu un proyeccion di un 120 porciento di debe compara cu PIB. Consecuentemente busca forma pa economisa y reduci gasto den aparato publico ta mas cu urgente.

Necesidad di discusion riba tarea esencial (kerntaken)

Economisacion den aparato publico ta enfoca riba aspectonan di funcionamento publico unda por baha gasto y hasta por salba entrada.

Un punto di atencion importante ta cual ta e trabao y servicionan cu Gobierno mes mester haci of cual por laga pa sector priva. SER ta reconoce cu ta un decision politico pa determina kico ta un tarea of servicio publico. Pero SER ta kere cu e argumento principal mester ta cual ta e servicionan na comunidad cu no por pasa pa sector priva.

SER a enfoca riba riba e discusion di kerntakenanalyse. E discusion riba e analisis cual ta e tareanan crucial di Gobierno. E ultimo analisis a keda traha na 2008. Gobierno a pidie, Fondo Desaroyo Aruba a paga p’e pero ningun mandatario ni Gobierno a ehecut’e. SER ta di opinion cu ta deseable y necesario pa tene discusion riba e tareanan crucial di Gobierno, entre gremionan y Gobierno. Di e forma aki Gobierno lo por laga sector priva tuma algun funcion cu no ta crucial y asina haci e aparato publico sostenible y reduci gasto.

Aunke cu e analisis di 2008 por a bira bieu, y probablemente tin algun aspecto cu ya no ta relevante, SER ta kere si cu studia e kerntakenanalyse por fungi como punto di salida pa uno nobo y pa e discusion entre Gobierno y gremionan.

Unda por economisa

Na 2014, SER a indica unda lo por baha gasto den e aparato publico. Berdad a trece cambio cu a reduci algun gasto. Por ehempel, hinca tur museo bao di un capa, Fundacion Museo Aruba, aunke cu esey no ta conta pa Museo Arqueologico cu ta den proceso di bira independiente; e creacion di Air Navigation Services Aruba, ANSA cu a privatisa Direccion di Control di Trafico Aereo, y mara subsidio na fundacionnan na locual nan ta produci, incluso un maximo di subsidio. Pero, mayoria di e consehonan cu SER a duna pa baha gasto of aumenta entrada no a produci nada, y awor mester atencion di Gobierno.

Trabao di seguridad

Gobierno tin su propio servicio di seguridad, Cuerpo Especial Arubano. E costo pa e servicio aki di 2014 pa 2019 tabata un total di casi 14 miyon florin pa aña. Mirando cu aki ta papia di un suma halto, e ta vale la pena pa Gobierno investiga con lo por scapa gasto lagando sector priva tuma henter of sikiera un parti di e responsabilidad aki.

Inspeccion di vehiculo

DTI (Dienst Technische Inspectie) ta haci diferente inspeccion tecnico pa Gobierno, incluso control y inspeccion, incluso di vehiculo. E tarea aki ta pa garantisa seguridad di trafico. SER ta puntra, den cuadro di baha gasto, si e tarea di keur vehiculo mester keda uno publico of si companianan di seguro lo por tuma e responsabilidad aki, cu por baha e gastonan di DTI.

Aumento y cobra belasting

SER a constata cu e cumplimento cu pago di belasting, pago di prima na Aruba no ta suficiente. Na 2019 tabatin un saldo habri di 1,6 biyon florin cu ta 30 porciento di e GDP di Aruba na 2017. Tin un problema grandi pa loke ta cobramento di belasting segun SER, cu ta recomenda pa duna hopi prioridad na stimula pago di belasting.

Combati trabao ‘preto’

Tin poco informacion di e circuito ‘shinishi’, esta e area di trabao preto (zwart werken), unda no ta paga belasting, ni prima y fuera di vista di autoridad. Tin diferente reto den e aparato publico, cu ta haci dificil pa logra control eficiente y efectivo pa bringa e fenomeno aki.

Reduccion Ecologico

Aunke cu Gobierno a ehecuta proyectonan conforme e principio di reduci gasto basa riba sostenibilidad y ecologia, manera cambia luznan di caya pa LED y instala panelnan solar riba algun scol, ainda tin hopi opcion y posibilidad pa reduci mas gasto. SER ta kere cu Gobierno por introduci un standard den su maneho, unda proyectonan nobo manera scol, edificio di Gobierno, lo mester cumpli cu standard ecologico, Tambe tur instancia semi-publico mester cumpli cu e standard aki den nan edificio y operacion. Tur proyecto di FCCA mester sigui e normanan pa reduci gasto di consumo di coriente y awa, por ehempel door di sigui e modelo di e residencia Kibaima, cu ta e asina yama ‘smart community. Gobierno lo por inclui e condicion pa standard ecologico den permiso di construccion. Por baha e consumo di coriente den oficinanan publico por medio di ‘smart lighting systems’ unda ta determina automaticamente e consumo di aparato, luz y finalmente coriente. Uso di toiletnan cu ta traha cu sensor cu ta baha e consumo di awa y haci mas uso y promove mas panel solar pa comunidad.

Auto di servicio

Gobierno ta haci uso di 301 auto di servicio (dienstautos) banda di esunnan pa polis, segun SER. Locual ta yamativo ta cu mas o menos mitar di e autonan aki ta mara na un suma di lease di Afl. 1200 of mas pa luna. Ademas, mas cu mitar di e autonan aki ta SUV, pues autonan cu ta mas grandi cu regular. Na 2014, Gobierno tabata paga AWG 3.7 miyon pa autonan di servicio y e suma di 2020 ta na Afl. 4.1 miyon. SER ta puntra di con tin asina hopi auto cu tin un prijs di lease asina halto. Pasobra na fin di e periodo di lease, Gobierno a paga henter e prijs di compra di e auto, sin cu e ta bira propiedad publico. Mirando e factornan aki, SER ta kere cu Gobierno mester re-evalua e contratonan di lease pa auto di servicio. Lo mester haci un investigacion riba e necesidad di e cantidad di auto di servicio pa ehecuta tareanan publico y riba cual area por baha gasto.

Den nos proximo edicion lo enfoca riba e consehonan di SER pa reduci gastonan di personal.