E presidente republicano saliente di e comite di comercio di e senado a pidi e directornan ehecutivo di cinco empresanan importante di tecnologia di Merca pa contesta e preguntanan detaya tocante e decisionnan pa restringi of prohibi permanentemente e cuentanan di usuarionan conservado.
E senador Roger Wicker a manda cartanan na Apple Inc, Facebook Inc, Amazon.com Inc, Alphabet Inc y Twitter den unda a bisa nan “ cu miles di cuentanan y contenido di usuarionan conserva” a ser restringi of elimina permanentemente di e plataformanan”.
E empresanan a tuma su accionnan mas energico hasta e momento contra e presidente Donald Trump pa limita su alcance, por temor na violencia continua deriva di su cargonan despues cu su partidarionan a ataca e edificio di Capitol Mericano di siman pasa.
Apple,Google y Amazon tambe a suspende Parler, un aplicacion Pro-Trump unda e usuarionan a menasa cu mas violencia, di su tiendanan respectivo di aplicacionnan y servicionan di alohamento web, un conhunto di medidanan cu por obstaculisa gravemente e servicio.
Wicker tambe ta busca un splicacion pa e movemento contra Parler.
“E Mericanonan ta merece transparencia y responsabilidad pa loke ta parce di ta un censura politicamente silencioso : silencia e bosnan di usuarionan y figuranan publico por igual” Wicker a skirbi.
Twitter a bisa diabierna cu e compania a ricibi e carta y e lo contesta. Facebook a señala na Reuters e comentarionan di e fundado Mark Zuckerberg cu ta splica e prohibicion di e cuentanan di e presidente. E otro companianan no a contesta di inmediato na e solicitudnan den buskeda di comentarionan.
