Dr. Vallejo: Medidanan tuma den pandemia no a duna resultado

Despues di expresa su pensamento pa e falta di informacion, dr. Carlos Vallejo (Neuricirujano) tambe a mustra di ta haya straño pa e hecho cu medidanan tuma no a duna resultado.

Na Aruba tin hopi hende, debi na nan estatus no legal, no tin acceso na cuido medico. Den e pandemia cu ta asotando mundo, esaki a keda demostra un biaha mas. Y aki na Aruba tambe. E personanan aki no por yega hospital y dr. Vallejo, cumpliendo cu etica di su profesion, ta atende cualkier persona cu yega na su porta.

E no por bisa asina, Aruba of e a atende pashent cu un di e cepanan nobo. Pa haya sa di esaki, mester haci diferente examen, cu ta costoso. Pero clinicamente e mester bisa, cu e no a mira pashentnan cu ta mustra di tin e cepanan nobo. Pero, e ta bisa, no mester descarta esaki mirando cu Aruba ta un isla turistico. “No tin nada straño cu e cepa nobo por cuminsa circula. Si mira cu nos a ricibi turista di Merca, di Reino Uni, etc. E cepanan ta muta diariamente, pasobra esey ta nan forma di sobrevivi.”

E tin palabra di elogio pa e maneho y informacion cu gobierno di Aruba a suministra riba e cautela cu mester tuma pa no keda contagia.

El a papia di e medidanan tuma, un di nan ta e uzo di tapa boca. Di esaki tin diferente modelo. Mester wak cu tin tapaboca cu ta cubri e areanan necesario y tin otro tapaboca ta laga pasadanan habri treciendo riesgonan cu ne. Tin tapaboca ta protégé solamente esun cu ta uz’e y no e otronan. Cada persona mester averigua cua ta e miho tapaboca pa uza, cu ta un bon medida tuma.

E distanciamento ta un bon medida, pero e ta keda puntra den un famia unda tin solamente dos cas, con e persona ey ta bay cumpli cu distanciamento. E ta un aspect hopi dificil.

Medidanan manera labamento di man, come bon, uza tapaboca, practica distanciamento social, Evita yega cerca personanan cu malesa cronico, ta medidanan pa sigui.

Mester sigui medida cu gobernantenan impone, cu ta e autoridad pa duna e recomendacionnan mas adecuado.

Ta dificil pa bisa e hendenan pa mantene nan mes trankil, si nan ta mira cu nan situacion ta bay atras, entre otro entrada cu nan no por cumpli cu nan gastonan.

Tambe el a haci un apelacion na su coleganan pa mustra mas humanidad y no mustra silencio ni indiferencia.