Retiro di Gabinete Mark Rutte no ta bay afecta e acuerdo di sosten y reforma cu Aruba. E proposicionnan di e dos rijkwetnan RAft y COHO ta na Raad van State y caida di Gobierno di Hulanda no lo afecta e proceso. Asina vocero di Secretario di Estado Raymond Knops a bisa Bon Dia Aruba.

“Na momento cu Gobierno di Aruba y di Hulanda a firma, e proceso cu tin un duracion di siete aña ta cuminza cana,” Emile Vaessen, vocero di Secretario di Estado Demisionario Raymond Knops a bisa. “E solo hecho cu e acuerdo pa un duracion di siete aña ta ilustra cu e ta uno cu ta traspasa periodonan di Gobernacion. Corsou lo tin eleccion na Maart y Hulanda tambe, y Aruba lo tin eleccion na September.”

Vaessen a sigura cu no obstante cu Gobierno Hulandes ta demisionario awor y cu despues di eleccion lo por tin un otro gabinete, e palabracionnan lo keda respeta pasobra “tin continuacion di gobernacion.”

Inhusticia sin precendencia

Manera ta conoci, Gabinete Mark Rutte a entrega su retiro den su totalidad como reaccion riba e rapport ‘Ongekend onrecht’ (inhusticia sin precedencia) cu ta un blachi scur den historia di Gobierno Hulandes. Segun declaracion di e propio Gabinete, awor demisionario, algun dies mil mayor y nan yiunan a mira nan bida cambia den un pantano di miseria pa motibo di un combinacion di reglanan fuerte, actuacion a base di prehuicio y particularmente pa motibo cu no a duna oido na señalnan di emergencia. “Gabinete ta ofrece su disculpa na tur mayor afecta y nan yiunan. Esaki nunca mester a pasa.”

Kico a pasa

Servicio di Belasting di Hulanda tabata mucho stricto den evaluacion di un grupo di mayor cu a pidi e toeslag pa yuda paga pa cuido di nan yiu, esta e kinderopvangtoeslag. Esaki ta conclusion di e investigacion di e comision Donner, bou liderazgo di ex Minister, ex Vice Presidente di Raad van State y Minister di Estado Piet Hein Donner (ultimo titulo ta uno honorario otorga pa Gobierno di Hulanda). Door di considera e famianan, mayoria di nan persona di descendencia no Hulandes Europeo. Es mas, noticieronan internacional a cataloga e paso di Servicio di Belasting como uno racista.

Segun Comision Donner, e Combiteam Aanpak Facilitators, CAF, a lanta pa atende cu particularmente Bulgaronan cu tabata comete fraude. Pero mesora a conclui cu otro famianan, di etnicidad minoria, tambe lo a comete fraude. E toeslag ta un suma cu mayornan ta haya si ta paga pa cuida nan yiunan (pa un crèche por ehempel).

A acusa e mayornan di a haci uso di intermediarionan pa colecta e toeslag, mientras cu tabata laga welonan cuida nan yiunan. “CAF a haya un prehuicio institucional, cu a pone cu e ambtenaarnan di Servicio di Belasting no por a haci e distincion entre bon y malo mas. Hasta si mayornan no a yena un dato bon, sea pasobra nan no tabata sa of simplemente tabata un poco slordig, nan a keda cataloga como fraudulento. Servicio di Belasting no a duna nan ningun splicacion di e acusacion aki cu a haci cu nan no por a defende nan mes of mehora nan datonan. Pero nan a perde nan toeslag y hasta mester a paga bek locual nan a ricibi e añanan prome. Pa mayoria, e sumanan a acumula na algun mil euro cu a hinca hopi di e famianan aki den problema financiero. Por ehempel, un mayor na 2014 tabatin derecho riba un toeslag di 6 mil euro pa aña. A para esaki despues di 9 luna pa motibo di acusacion di fraude. Y e mayor mester a paga no solamente e 9 lunanan bek, pero tambe tur locual el a ricibi e añanan prome. Den e ehempel aki, ta trata di un suma di 16.500 euro pa famianan cu ya caba tabata den necesidad.

Algun mayor a hasta perde derecho riba nan yiu, pasobra nan no por a demostra despues di un divorcio por ehempel cu nan tin e capacidad pa cria nan yiu pa motibo di debe. “E mayornan no tabatin ningun chens,” Donner a bisa.

E Comision Donner a studia 300 caso, pero a conclui cu tin algun miles di famia afecta y Gobierno y Parlamento Hulandes a reconoce cu mester compensa pa e daño. Aunke cu nan a paga e placa bek, nan tin derecho pa haya e suma di toeslag mas 500 euro pa cada aña cu nan a keda perhudica. Problema ta cu pa hopi, e placa ta bin despues cu nan pasa den hopi trauma caba.

Gabinete Rutte a dicidi cu kier yuda e mayornan afecta y nan yiunan mas lihe posibel, y esnan cu a keda confronta cu un actitud rigido di Servicio di Belasting lo ricibi 30 mil euro. Pero, tambe Gabinete kier papia cu creditornan pa percura cu e placa ta bay pa e famianan y no mesora pa paga debe (Ironicamente, ya caba Servicio di Impuesto a cuminza cobra e mesun famianan afecta cu a haya pago). E intencion di e decision di e Gabinete tabata pa brinda e mayornan y nan yiunan un oportunidad pa futuro.

Tambe Gobierno Hulandes a anuncia di lo trece cambio den e structura actual di toeslagen, unda ta kita e responsabilidad for di mayornan y por garantisa sostenibilidad y ta elimina complicacionnan. Tambe a priminti cu ta bay scucha mas di comunidad y percura cu e reglanan no ta complica pa evita cu ciudadanonan interpreta nan robes. “Un hende cu bay fout sin intencion no ta comete fraude,” segun e relato di Gobierno Hulandes.

Retiro

Sinembargo, e rapport ‘Ongekend onrecht’ tabata asina pisa cu no a keda Gabinete Rutte otro opcion pa entrega retiro, despues cu famianan afecta a exigi esaki. Hasta miembro di oposicion, lider di PvdA , Lodewijk Asscher cu tabata Minister di Asuntonan Social a asumi su responsabilidad politico y a entrega retiro como lider di e partido.

Prome Minister Demisionario Mark Rutte a cita un Prome Minister Hulandes anterior Pieter Cort van der Linden den su carta despues di entrega retiro. E citacion ta cu ‘estado ta pusha e orguyosonan, ta proteha e vulnerabelnan, ta plama e risiconan y ta e guia den actuacion pura.’ “Esaki ta un norma halto y ta cla cu Gobierno no a cumpli cu e norma aki den e caso di kinderopvangtoeslag. Gobierno mester proteha e ciudadano di un aparato publico poderoso y aki a bay robes. A haci foutnan grandi riba nivelnan politico, administrativo y huridico cu a causa un inhusticia grandi na miles di mayor.”

Rutte a bisa cu e sistema a faya y henter gabinete mester carga e responsabilidad politico y pa e motibo ey mes, a entrega retiro y awor ta demisionario

Mester bisa cu diamars ainda e conceptonan di e dos rijkswetnan tabata riba mesa di Prome Minister Mark Rutte ainda. Entre diamars y diabierna, a logra manda e dos leynan pa conseho di Raad van State.