SEPPA a logra mayoria na SABA Sindicato ABV: SEPPA a bruha e trahadonan dunando mal informacion

Ayera tardi un ambiente festivo di victoria a wordo manifesta pafo di San Pedro de Verona Paviljoen, cu e resultado di e referendum cu a mustra cu sindicato SEPPA a haya e mayoria di voto. Esta compara cu e cantidad di voto cu sindicato ABV a haya.

SEPPA a bira e sindicato pa representa e mayoria di trahado di cuido na servicio di fundacion SABA encarga cu e maneho di e casnan di anciano.

Segun informacion di oficina di Mediador di Gobierno un total di 272 trahado tabatin derecho di voto, y e resultado oficial tabata como lo siguiente: 140 voto pa SEPPA; 71 voto pa ABV, 1 voto nulo y 2 trahado a vota pa niun sindicato.

E resultado aki ta duna un mayoria na SEPPA pa salvaguardia e derechonan di e trahadonan aki di cuido. Den un momento crucial di negociacion cu e directiva di SABA pa evita mas cortamento riba nan salario y beneficionan secundario debi na e crisis di Covid.

Sindicato SEPPA

Despues di e resultado di e referendum e representante di SEPPA na SABA, Rodrigo Tromp a bisa cu e ta hopi contento hunto cu e mayoria di e trahadonan cu a vota pro di e sindicato aki. Ya cu nan tabata sinti un ‘enorme presion’ di ABV pa tuma cierto decisionnan cu e trahadonan no tabata di acuerdo cune, entre otro el a menciona pa entrega premienan. E ta haya cu esaki a culmina cu mayoria di hende a vota pa SEPPA.

Despues cu nan a vocifera nan malcontento prome cu fin di aña riba entregamento di premie nan, entre nan bashi premie, Tromp a bisa cu Mediador a papia cu e representantenan di e trahadonan pa duna espacio pa bin cu alternativanan. Diahuebs ultimo nan a bin cu un opcion cu cada trahado ta dicidi con e ta bay haci su escogencia ariba su mes. “Ya no ta SABA of ABV ta dicidi sino cada trahado ta dicidi esey,’ el a bisa.

El a laga sa cu e bashi premie manera nan a kier, e trahadonan di SABA ta bay haye paga tambe. Actualmente como trahado na servicio di e fundacion aki nan ta bay sacrifica mita di e premienan y 5% di e salario. “Esey ta pa awor!,” Tromp a declara.

Secretario general di SEPPA, Magaly Brito a bisa cu tabatin un par di luna cu e trahadonan aki a cuminsa expresa nan deseonan pa cambionan. Pero tambe nan malcontento con e situacion ta bayendo. P’esey den luna di december mirando e discusion riba entrega di un 12.6% di salario cu gobierno ta bin cortando. Ya caba a crea un ambiente di malcontento den ki direccion gerencia di SABA hunto cu sindicato ABV lo kier a bay, el a bisa.

For di december SEPPA a pidi gerencia di SABA pa para tur discusion pa motibo cu e grupo di trahado tabata dividi. Na final nan mester warda e resultado di un referendum pa nan sa cual organisacion sindical ta desea pa hiba e negociacion pa e trahadonan. Brito a bisa cu e resultado di e referendum di ayera tabata e resultado di e trabao di un grupo di trahadonan basta uni pa organisa nan mes.

Sindicato ABV

Di su banda e lider sindical di ABV, Gina Maduro a bisa na Bon Dia Aruba cu e sindicato di enfermeria aki for di october 2015 a drenta SABA pa medio di un referendum. Maduro a bisa cu e tempo aya e trahadonan mes a pidi un referendum pasobra SEPPA tabatin mas cu 20 aña den e fundacion aki, y e trahadonan mes a ripara cu nan no a bay dilanti.

E sindicalista a bisa cu for di october 2015 cu ABV ta den SABA, nan a traha duro durante e ultimo 4 aña y dos luna pa e trahadonan aki por a bay dilanti. Ya cu ora nan a drenta, ABV a haya un situacion hopi dificil, unda tabatin un grupo di trahado cu tabatin un promocion pega desde 2012. Un lucha di 12 aña largo cu ABV a logra solucion’e den 4 aña y dos luna, el a bisa.

“Mi ta contento cu e grupo aki cu tabata frustra y cu tabata desespera cu nan no por a haya aumento di salario,” el a bisa.

For di januari 2020 e grupo aki a haya nan aumento. Igualmente tur trahado a haya un aumento di salario di mey porciento. Tambe nan a haya bonus na luna di december 2019. ABV a zorg pa tur hende den SABA desde mei 2020 no entrega niun cen di nan salario. El a bisa cu e trahadonan aki tabata un di e poco gruponan cu a mantene salario shen porciento.

“Ta diferente na locual a pasa den hospital. Hospital si a entrega 5%. Nos si sa kico e dolor ey ta!,” el a declara na Bon Dia Aruba. Ya cu e cortamento aki tin su efecto riba e trahado su pension y nan vakantie uitkeuring.

Apesar di e resultado di e referendum presidente di AVB, Gina Maduro, a declara cu tur trahado di SABA a bay dilanti den cuater aña y dos luna, pero a keda na nan, y na nan consenshi pa haci e voto na nan escogencia. E por a premira e resultado di e referendum, ya cu na Playa tin e mayoria di e trahadonan di SABA, caminda ABV ta haya cu SEPPA a bruha nan dunando mal informacion.

“Nan sa cu nos a traha pasobra nan pay slip ta papia. Tur luna nan ta wak e aumento, pero nan no ta reconoce,” segun Maduro.

Prome cu e resultado di e referendum aki, Maduro a bisa cu dor di SEPPA nan mal informacion, e trahado a haci nan escogencia malo. Pero e ta kere cu e ta keda na cada trahado cu si nan kier a sigui cu “un sindicato cu si ta traha. Of si nan kier drumi na ICU, mescos cu nan a drumi prome cu 2015.”