Anthony Sneek – ken ta forma parti di grupo cu kier husticia y tambe tabata dilanti di Ministerio Publico pa asina sostene Jeffrey Schuilenburg su lucha – ta duna di conoce cu nan lo cana tur e camindanan legal cu tin mester.

Sr. Sneek ta kere no por djis laga y lubida cu e placa di pueblo cu a desaparece bay di un forma asina silencioso y e pueblo ta esun cu tin cu paga p’e. Loke cu tin actualmente ta un wega politico cu ta keda hunga.

Segun Sr. Sneek, esaki ta e ultimo paso cu lo keda pidi na Ministerio Publico na Aruba pa un reunion. Si no logra cu Ministerio Publico na Aruba, lo mester cana un otro paso y acerca hof di Corsou pa duna un keho oficial. Tambe mester bay hoogeraad na Hulanda, cu ta e corte mas halto den reino Hulandes. Na momento cu yega eynan, si Hulanda no kier duna oido na e situacion cu tin na Aruba, grupo cu kier husticia lo cana e caminda mas halto na Union Europeo y Nacionnan Uni.

Segun Anthony Sneek, no por ta posibel cu por djis desaparece cu placa di pueblo asina aki. E strategianan aki cu ta keda hunga ta e mesun weganan cu a hunga cu nan den pasado, cu ta laga e caso verjaard y di e manera ey por libra di e situacion.

Segun Sneek por a tuma nota cu un mandatario ta sali pafo den un boxershort ta haci acusacionnan di papa cu papa sin ningun prueba; sinembargo e mesun politico aki tin varios prueba y mapnan cu e personanan aki a haci corupcion.

E caso cu ta den investigacion cu ta ‘Tereno-gate’ ta un caso – pero e mesun minister aki tin riba su cabes ‘WattyVos-gate’ pa 825 miyon florin di placa di pueblo y di vierbansweg cu ta e mesun minister y ta trata di 750 miyon. Y te ainda ningun di e dos partinan aki no a keda investiga.

Sinembargo loke cu tin grupo husticia preocupa ta cu no ta ricibiendo ningun informacion di Ministerio Publico. Si mester mira e situacion na Corsou, por ehempel e caso di Gerrit Schotte cu ta un ex-prome minister di Corsou, y mira e caso di Paul Croes na Aruba, ta claramente cu Gerrit Schotte a keda husga y su sentencia a keda confirma y te hasta e la sinta su castigo, ultimo e la sali liber. Mientras cu na Aruba e ex-minister Paul Croes, cu ta afilia na e partido AVP, no ta mira nada cu ta sali afo di su caso. Segun Sneek, e man milagroso cu ta poni riba cabes di AVP y su hendenan so, ta pone cu e investigacionnan no ta sali na cla. Señor Sneek ta duna di conoce cu na momento cu tabatin ‘insinerator-gate’ diripiente Ministerio Publico a cuminsa move y haci investigacion.

Sinembargo pa loke cu e pueblo ta sufriendo, cu ta ‘Hospital-gate’ y ‘Hedge-gate’ no tin investigacion. Segun Anthony Sneek, esaki ta un falta di respet pa tur pagado di belasting. Na varios ocasion na momento cu ex-minister ta sali pafo y ta bisa cu papa a haya contract, esey ta corecto. Ex-mandatario a sali pafo cu un recibo di contract cu a paga papa 54 mil florin cu ta corecto, pero na momento cu mester wak e documento aki bon di cerca y pa kico e la cobra asina, ta sali afo cu papa mester a kibra un contract cu e gobierno anterior a cera cu un refineria, cu tabata un contract cu for di comienso e gobierno anterior tabata sa cu lo ta bay tin problema. Pa kibra un contract asina, e berdad ta cu un abogado lo cobra den un suma asina pa kibra un contract tin hopi miyones.

Segun Sneek, na momento cu mester mira un otro minister di e mes un partido di AVP cu a haya 54mil dollar door di un compania na Maracaibo y cu a manda e suma di placa riba cuenta di e prome minister, e pregunta ta keda: Pero dicon nada no ta keda haci rond di e caso aki? Dicon no tin preguntanan cu no ta sali dor di esey? segun Anthony Sneek. Mirando tur e situacion aki, segun Sneek, si ta midi cu midi robes, e ora pueblo no mester acepta esaki, pero lucha pa e berdad sali na cla, pasobra ta trata aki di placa di pueblo cu ta keda malversa. Si berdaderamente e situacion ta asina lo desenmascara husticia Hulandes na Aruba, segun Sneek.

No por ta posibel cu e Ministerio Publico na Corsou y St Maarten ta traha bon y esun na Aruba e pueblo mester sclama pa sa e berdad. Un hende cu a enrikece su mes cu 60mil meter cuadra di tereno di pueblo mester por tin un investigacion serio. Dia cu a drenta pa prome biaha na cas di ex-minister Sevinger, tabata prome di october 2019. Pa prome di october 2020 ta haci un aña y awor ultimo cu nan a bolbe drenta cas di e ex-minister e ta bira un aña y tres luna y 12 dia desde cu a drenta den e cas di e ex-minister.

Mientrastanto cu na Corsou nan a sentencia Schotte den menos cu 400 dia, mientras cu Schotte a bay hoogeberoep y cu nan a confirma su sentencia. Y di eynan e la sinta su castigo te cu e la sali. Y aki na Aruba nos tin politiconan cu ta djis cambia di abogado, hunga triki y haci diferente strategianan pa mañan e caso verjaard pa pueblo lubida y sali afo trankil – y pueblo ta esun cu tin cu paga pa e actonan aki, segun Anthony Sneek.